ຄວາມຕັ້ງໃຈ ດ້ານອະວະກາດ ຂອງ​ ສ.ເກົາຫຼີ​ ຍັງສືບຕໍ່ເພີ່ມຂຶ້ນເລື້ອຍໆ, ໂດຍຕັ້ງເປົ້າວ່າຈະສ້າງສະຖານີສຳຫຼວດຢູ່ເທິງດວງເດືອນ​ ພາຍໃນປີ 2045.

ຕາມສື່ The Korea Times ຂອງ​ ສ. ເກົາຫຼີ​ ໄດ້ລາຍງານເມື່ອວັນທີ 17 ກໍລະກົດ 2025, ໂດຍອ້າງອີງເຖິງ ແຜນງານການສຳຫຼວດອະວະກາດໃນໄລຍະຍາວ ທີ່ອົງການບໍລິຫານການບິນ ແລະ ອະວະກາດ​ ສ​ ເກົາຫຼີ​ (KASA) ໄດ້ສ້າງຂຶ້ນ ແລະ ເປີດເຜີຍໃນລະຫວ່າງການພິຈາລະນາທີ່ມູນນິທິການຄົ້ນຄວ້າແຫ່ງຊາດ​ ສ ເກົາຫຼີ​ ໃນເມືອງ​ Daejeon, ພາກກາງຂອງປະເທດ.

ແຜນງານໄລຍະຍາວດັ່ງກ່າວໄດ້ລະບຸ 5 ພາລະກິດຫຼັກ ຄື:

1. ພາລະກິດສຳຫຼວດໃນວົງໂຄຈອນລະດັບຕໍ່າອ້ອມໂລກ.

2. ພາລະກິດໃນສະພາວະບໍ່ມີນໍ້າໜັກ.

3. ພາລະກິດສຳຫຼວດດວງເດືອນ.

4. ພາລະກິດສຳຫຼວດດວງຕາເວັນ.

5. ພາລະກິດດ້ານວິທະຍາສາດອະວະກາດ.

KASA, ເຊິ່ງກໍ່ຕັ້ງຂຶ້ນໃນເດືອນພຶດສະພາ​2024, ມີເປົ້າໝາຍເພື່ອພັດທະນາ ເທັກໂນໂລຊີ ຍານສຳຫຼວດດວງເດືອນ​ ລວມທັງຄວາມສາມາດໃນການສະກັດ ແລະ ນໍາໃຊ້ຊັບພະຍາກອນເທິງດວງເດືອນ​ (ເຊັ່ນ: ນໍ້າກ້ອນ). ວຽກງານເຫຼົ່ານີ້ບາງສ່ວນແມ່ນກຳລັງດຳເນີນການແລ້ວ, ເຊັ່ນ: ສະຖາບັນທໍລະນີສາດ ແລະ ຊັບພະຍາກອນແຮ່​ ສ​ເກົາຫຼີ (KIGAM) ຫາກໍນຳເອົາ ຕົ້ນແບບລົດສຳຫຼວດດວງເດືອນ ໄປທົດສອບໃນບໍ່ຖ່ານຫີນຮ້າງ ເມື່ອເດືອນມີນາ 2025 ເພື່ອທົດສອບເທັກໂນໂລຊີ​ ທີ່ອາດນຳໄປໃຊ້ໃນການຂຸດຄົ້ນບໍ່ແຮ່ໃນອະວະກາດໃນອະນາຄົດ.

ສ ເກົາຫຼີ​ ມີປະສົບການດ້ານການສົ່ງຍານສຳຫຼວດດວງເດືອນມາແດ່ແລ້ວ. ໃນເດືອນສິງຫາ 2022, ໄດ້ສົ່ງຍານ​ Danuri, ເຊິ່ງເປັນຍານສຳຫຼວດດວງເດືອນລຳທໍາອິດຂອງປະເທດ, ຂຶ້ນສູ່ອະວະກາດດ້ວຍ ຈະຫຼວດຟັລຄອນ 9 (Falcon 9) ຂອງ SpaceX ບໍລິສັດເອກະຊົນດ້ານເທັກໂນໂລຊີອະວະກາດໃນສະຫະລັດອາເມຣິກາ. ຕໍ່ມາຍານໄດ້ເຂົ້າສູ່ວົງໂຄຈອນຂອງດວງເດືອນ​ ໃນເດືອນທັນວາ ແລະ ຍັງຄົງປະຕິບັດພາລະກິດສຳຫຼວດດວງເດືອນ​ ດ້ວຍຊຸດເຄື່ອງມືຕ່າງໆ ເທິງຍານຈົນເຖິງປັດຈຸບັນ.

ກ່ອນໜ້ານີ້, ສ. ເກົາຫຼີ​ ເຄີຍລະບຸວ່າຕ້ອງການສົ່ງຍານຫຸ່ນຍົນລົງຈອດ ເທິງດວງເດືອນ​ພາຍໃນປີ 2032. ແຕ່ແຜນງານໄລຍະຍາວທີ່ຫາກໍເປີດເຜີຍອອກມານີ້ໄດ້ເພີ່ມຄວາມທ້າທາຍຂຶ້ນໄປອີກ ໂດຍກ່າວເຖິງການພັດທະນາ ຍານຍົນລົງຈອດດວງເດືອນລຸ້ນໃໝ່ ເຊິ່ງອາດມີປະສິດທິພາບຫຼາຍຂຶ້ນພາຍໃນປີ 2040, ດ້ວຍເປົ້າໝາຍສູງສຸດຄືການສ້າງສະຖານີເທິງພື້ນຜິວດວງເດືອນພາຍໃນປີ 2045.

ຢ່າງໃດກໍຕາມ, ສ​. ເກົາຫຼີ​ ບໍ່ແມ່ນປະເທດດຽວທີ່ຄິດຈະສ້າງສະຖານີສຳຫຼວດເທິງດວງເດືອນ:

ສະຫະລັດ ອາເມຣິກາ ກໍວາງແຜນທີ່ຈະສ້າງສະຖານີສຳຫຼວດເທິງດວງເດືອນຢ່າງໜ້ອຍ 1 ແຫ່ງພາຍໃນທົດສະວັດໜ້າ ຜ່ານ ໂຄງການອາກເຕມິສ (Artemis program) ຂອງນາຊາ.​

ສປ​ ຈີນ ກໍກຳລັງດຳເນີນງານເພື່ອບັນລຸເປົ້າໝາຍນີ້ເຊັ່ນກັນ ໂດຍຮ່ວມມືກັບ ສ​ ຣັດເຊຍ ແລະ ປະເທດອື່ນໆ.

ອິນເດຍ ກໍຕັ້ງເປົ້າຕ້ອງການສ້າງສະຖານີສຳຫຼວດເທິງດວງເດືອນພາຍໃນປີ 2047.

ນອກຈາກດວງເດືອນແລ້ວ, KASA ຍັງມີເປົ້າໝາຍທີ່ໄກກວ່ານັ້ນຄື: ຕ້ອງການໃຫ້​ ສ ເກົາຫຼີ​ ສາມາດ ສົ່ງຍານລົງຈອດເທິງດາວອັງຄານ ໄດ້ສຳເລັດເປັນຄັ້ງທໍາອິດພາຍໃນປີ 2045 ອີກດ້ວຍ.

ອາຈານ ມັດ ຖິ່ນມະນາວ ສາວນັກກິລາ​ຈອມ​ພະລັງ​ ປະເພດລານຍິງ ຕົວແທນຈາກເຈົ້າພາບ ນະຄອນຫຼວງວຽງຈັນ ໃນງານມະຫະກຳກິລາແຫ່ງຊາດ ຄັ້ງທີ XII ຫຼື ນະຄອນຫຼວງວຽງຈັນ ເກມ 2025 ທີ່ຈະຈັດຂຶ້ນ ໃນລະຫວ່າງວັນທີ 15-25 ພະຈິກ 2025 ນີ້.

ໄດ້ໃຫ້ສຳພາດ ວ່າ: ນ້ອງຮູ້ສຶກດີໃຈ ແລະ​ ເປັນກຽດຢ່າງສູງ​ ທີ່ໄດ້ສືບຕໍ່ຮັບໃຊ້ບ້ານເກີດເມືອງນອນ ກໍ່ຄື​ ແຂວງ​ເຈົ້າພາບ​ ນະຄອນຫຼວງວຽງຈັນ ອີກປີໜຶ່ງ​ ໃນການເຂົ້າຮ່ວມງານມະຫະກຳກິລາແຫ່ງຊາດ​,​ ພາຍຫຼັງທີ່ໄດ້ເກັບຕົວຝຶກຊ້ອມມາໄດ້ 2 ເດືອນ​ ຢູ່ສະຖາບັນກິລາ-ກາຍະກຳ (ເຂດບ້ານສີເກີດ) ເຮັດໃຫ້ນ້ອງໄດ້​ພັກຟື້ນກຳລັງ, ເທັກນິກ ແລະ ທັກສະກັບຄືນມາໄດ້ຢ່າງມີປະສິດທິພາບ​ ແລະ ກ່ອນຈະຮອດມື້ແຂ່ງຂັນຕົວຈິງ​ ນ້ອງເຊື່ອວ່າ ນ້ອງຈະສາມາດທຳສະຖິຕິໄດ້ດີກວ່າຄັ້ງທີ່ຜ່ານມາແນ່ນອນ.​

ສາວມັດ ຖິ່ນມະນາວ ເກີດທີ່ບ້ານໂນນຊາຍ ເມືອງ​ປາກງື່ມ ນະຄອນຫຼວງວຽງຈັນ,​ ເກີດວັນທີ 20 ມີນາ​ 1995 ອາຍຸ​ 30 ປີ,​ ອາຊີບເປັນອາຈານສອນຢູ່ ສະຖາບັນກິລາ-ກາຍຍະກຳ.

​ຜ່ານມາ​ ເຄີຍໄດ້ເປັນຕົວແທນໃຫ້ນະຄອນຫຼວງວຽງຈັນ ໃນງານມະຫະກຳກິລາແຫ່ງຊາດ ມາແລ້ວ​ 3 ຄັ້ງ ຄື:

– ງານມະຫະກຳກິລາແຫ່ງຊາດ ຄັ້ງທີ 9 ທີ່ແຂວງ​ ຫຼວງພະບາງ ໃນປີ 2011 ຜົນງານຍາດໄດ້ 1 ຫຼຽນຄຳ ປະເພດຊັດຫຼາວ ແລະ 1 ຫຼຽນທອງ ແກວ່ງຄ້ອນ.

– ງານມະຫະກຳກິລາແຫ່ງຊາດ ຄັ້ງທີ 10 ທີ່ແຂວງ​ ອຸດົມໄຊ ໃນປີ 2014 ຍາດໄດ້ 2 ຫຼຽນຄຳ ຈາກຊັດຫຼາວ ແລະ ຊຸກນໍ້າໜັກ.​

-​ ງານມະຫະກຳກິລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ ໃນປີ 2022 ກໍຍາດໄດ້ 2 ຫຼຽນຄຳ ຈາກຊັດຫຼາວ, ສະຖິຕິເຮັດໄດ້ 36 ແມັດ ແລະ ແກວ່ງຄ້ອນ ສະຖິຕິເຮັດໄດ້ 40,89 ແມັດ.

Cr: Mut Thinmanao

ກະຊວງການຕ່າງປະເທດ ຮ່ວມກັບ ສະຖານເອກອັກ ຄະລັດຖະທູດ ແຫ່ງ ຍີ່ປຸ່ນ ປະຈໍາ ສປປ ລາວ ຈັດພິທີລົງ ນາມເອກະສານແລກປ່ຽນການຊ່ວຍເຫຼືອລ້າໃນໂຄງການ “ພັດທະນາທ້ອງຖິ່ນ ຜ່ານການ ການແກ້ໄຂບັນຫາລະເບີດບໍ່ທັນແຕກ ຢູ່ພາກໃຕ້ຂອງ ສປປ ລາວ (ໄລຍະ 3)” ໃນວັນ ທີ 20 ຕຸລາ 2025,ໂດຍການລົງນາມຂອງ ທ່ານ ອານຸພາບ ວົງໜໍ່ແກ້ວ ຮອງລັດຖະມົນຕີກະຊວງການຕ່າງປະເທດ ແລະ ທ່ານ ໂຄອິຊຸມິ ຊຶໂຕະມຸ ເອກອັກຄະລັດຖະທູດ ວິສາ ມັນ ຜູ້ມີອໍານາດເຕັມ ແຫ່ງຍີ່ປຸ່ນ ປະຈຳ ສປປ ລາວ, ໂດຍລັດຖະບານຍີ່ປຸ່ນ ສະໜອງການຊ່ວຍເຫຼືອລ້າ ມູນຄ່າ 673 ລ້ານເຢນ ຫຼື 4,5 ລ້ານໂດລາສະຫະລັດ ໃຫ້ແກ່ ສປປ ລາວ ເພື່ອສຸມໃສ່ການພັດທະນາຄວາມສາມາດຂອງໂຄງການເກັບກູ້ລະເບີດເເຫ່ງຊາດ ຢູ່ພາກໃຕ້ຂອງ ສປປ ລາວ.

ການຊ່ວຍເຫຼືອຄັ້ງນີ້, ເປັນການຊ່ວຍເຫຼືອຂອງໄລຍະທີ 3 ວຽກງານເກັບກູ້ລະເບີດບໍ່ທັນແຕກ(ລບຕ) ໃນ 3 ແຂວງ ພາກໃຕ້ ທີ່ປັດຈຸບັນ ຍັງມີລະເບີດບໍ່ທັນແຕກເປັນຈໍານວນຫຼວງຫຼາຍທີ່ຍັງຕົກຄ້າງຢູ່ ຄື: ແຂວງຈຳປາສັກ, ສາລະວັນ ແລະ ແຂວງເຊກອງ, ເປົ້າໝາຍຕົ້ນຕໍຂອງໂຄງການ ແມ່ນເພື່ອສະໜອງການສະໜັບ ສະໜູນ ໂດຍກົງໃຫ້ແກ່ໂຄງ ການເກັບກູ້ລະເບີດແຫ່ງຊາດ (ຄກລ) ເພື່ອຮັບປະກັນວ່າການສ້າງຂີດຄວາມສາມາດ ແລະ ການສະໜອງອຸປະກອນທີ່ຈໍາເປັນສໍາລັບການດໍາເນີນງານສໍາຫຼວດກວດກູ້ລະເບີດທີ່ຍັງຕົກຄ້າງ ໄດ້ໃນໄລຍະຍາວ, ມີຄວາມຍືນຍົງ ແລະ ມີປະສິດທິພາບ.ທຶນດັ່ງກ່າວ ຈະຖືກຈັດສັນໃຫ້ແກ່ຂົງເຂດທີ່ສໍາຄັນ ຄື: ສະໜອງທຶນໃຫ້ແກ່ການປະຕິບັດງານພາກສະ ໜາມໃນ 3 ແຂວງພາກໃຕ້ ເພື່ອສໍາຫຼວດກວດກູ້ພື້ນທີ່ອັນ ຕະລາຍ ທີ່ໄດ້ຮັບການຢັ້ງຢືນ ( CHAs ), ສະໜອງອຸປະ ກອນທີ່ສໍາຄັນໃນວຽກງານສໍາຫຼວດກວດກູ້,ລວມທັງພາ ຫະນະຂົນສົ່ງໜັກ ແລະ ເບົາ ( ລົດບັນທຸກຕິດລໍ້ພ່ວງ ແລະ ລົດບັນທຸກ ), ເຄື່ອງກວດຈັບລະເບີດທີ່ທັນສະໄໝ ແລະ ອຸປະກອນໄອທີ ແທັບເລັດດີຈິຕ໋ອນ ເພື່ອປັບປຸງການຄຸ້ມ ຄອງຂໍ້ມູນ,ການລາຍງານໃນພາກສະໜາມ ເເລະ ການເສີມສ້າງການຕິດຕາມກວດກາ ລວມທັງຄ່າໃຊ້ຈ່າຍສໍາລັບກິດຈະກໍາ ແລະ ວຽກງານການຄຸ້ມຄອງ ແລະ ຈັດການທີ່ສໍາຄັນ ເຊັ່ນ: ການສໍາຫຼວດຜົນກະທົບທາງດ້ານສັງຄົມ-ເສດ ຖະກິດ ແລະ ການກວດສອບບັນຊີ ເພື່ອຮັບປະກັນການນໍາໃຊ້ທຶນທີ່ມີຄວາມຈະແຈ້ງ ແລະ ຄວາມໂປ່ງໃສໃນລະ ດັບສູງສຸດ.

ໂຄງການໄລຍະ 3 ດັ່ງກ່າວ ແມ່ນມີຄວາມໝາຍຄວາມສໍາຄັນຕໍ່ກັບ ສປປ ລາວ ໂດຍສະເພາະແມ່ນການບັນລຸຄວາມໝາຍໝັ້ນໃນການຈັດຕັ້ງປະຕິບັດ ເປົ້າໝາຍການພັດທະນາແບບຍືນຍົງ (ປພຍ) ຫຼື SDG 18, ຊີວິດປອດໄພຈາກ ລບຕ. ປັດຈຸບັນ, ບັນຫາຂອງ ລບຕ ຍັງເປັນອຸປະສັກອັນຕົ້ນຕໍ ທີ່ສໍາຄັນຕໍ່ການພັດທະນາເສດຖະກິດ-ສັງຄົມ, ທັງເປັນການກີດຂວາງການຜະລິດກະສິກໍາ, ໂຄງການພັດ ທະນາພື້ນຖານໂຄງລ່າງ ແລະ ການດໍາລົງຊີວິດໂດຍລວມຂອງຊຸມຊົນໃນເຂດຊົນນະບົດ. ລັດຖະບານ ສປປ ລາວ ໄດ້ສືບຕໍ່ໃຫ້ບຸລິມະສິດແກ່ການກໍາຈັດອຸປະສັກນີ້ ພາຍໃຕ້ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 9 (2021-2025) ແລະ ເປົ້າໝາຍການພັດທະນາແບບຍືນຍົງ (SDG) ທີ 18 ຊຶ່ງເປັນເປົ້າໝາຍສະເພາະຂອງລາວ ຄື: “ ຊີ ວິດ ປອດໄພຈາກ ລບຕ ”

ທ່ານ ອານຸພາບ ວົງໜໍ່ແກ້ວ ຮອງລັດຖະມົນຕີກະຊວງການຕ່າງປະເທດ ໃນນາມຮອງປະທານຄະນະກຳມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັກແຕກທີ່ຕົກຄ້າງຢູ່ ສປປ ລາວ (ຄຊກລ) ໄດ້ກ່າວວ່າ: ໃນໂອກາດທີ່ມີຄວາມໝາຍນີ້, ຂ້າພະເຈົ້າຂໍສະແດງຄວາມຂອບໃຈຢ່າງສຸດຊຶ້ງຕໍ່ລັດຖະບານ ແລະ ປະຊາຊົນຍີ່ປຸ່ນ ສຳລັບການຊ່ວຍເຫຼືອຢ່າງຕໍ່ເນື່ອງໃນການແກ້ໄຂບັນຫາ ລບຕ ທີ່ເປັນສິ່ງເສດເຫຼືອເເຕ່ປາງສົງຄາມ ແລະ ປັບປຸງຊີວິດການເປັນຢູ່ຂອງປະຊາຊົນລາວ. ການຮ່ວມມືນີ້ ແມ່ນສອດຄ່ອງກັບການຍົກລະດັບສາຍພົວພັນສອງຝ່າຍຂອງພວກເຮົາ ໃຫ້ເປັນ “ຄູ່ຮ່ວມຍຸດທະສາດຮອບດ້ານ” ເພື່ອສືບຕໍ່ກ້າວໄປສູ່ອະນາຄົດແຫ່ງສັນຕິພາບ,ຄວາມປອດໄພ ແລະ ວັດທະນະ ຖາວອນ.

ພາບ-ຂ່າວ: ກົມການຂ່າວ ກະຊວງການຕ່າງປະເທດ

ຂປລ. ຕາແສງ ແມ່ນເຂດການປົກຄອງທ້ອງຖິ່ນຂັ້ນລຸ່ມສຸດ ທີ່ຂຶ້ນກັບເມືອງ, ນະຄອນ ປະ ກອບດ້ວຍຫລາຍບ້ານ ຊຶ່ງມີເຂດແດນຕິດຈອດກັນ, ການກຳນົດຂອບເຂດຂອງຕາແສງ ໄດ້ອີງໃສ່ຄວາມສະດວກໃນການເຂົ້າເຖິງການບໍລິການຂອງລັດ, ພື້ນຖານໂຄງລ່າງ, ສະພາບພູມສັນຖານ, ຄວາມສະດວກໃນການເດີນທາງ ແລະ ອື່ນໆ. ສິ່ງສຳຄັນ ການສ້າງຕັ້ງຕາແສງ ເພື່ອຮັບປະກັນໃຫ້ປະຊາຊົນ ໄດ້ເຂົ້າເຖິງການບໍລິການ ຂອງລັດ ຢ່າງທົ່ວເຖິງ, ສະດວກ, ວ່ອງໄວ, ໂປ່ງໃສ ແລະ ຍຸຕິທຳ.

ການສ້າງຕັ້ງຕາແສງ ຕ້ອງມີຄົບເງື່ອນໄຂຕາມທີ່ໄດ້ກຳນົດໄວ້ໃນມາດຕາ 60 ຂອງກົດໝາຍວ່າດ້ວຍການ ປົກຄອງທ້ອງຖິ່ນ ສະບັບປັບປຸງ ປີ 2025 ເປັນຕົ້ນ ຕ້ອງມີທີ່ຕັ້ງທາງດ້ານພູມສາດທີ່ເໝາະສົມແກ່ການປົກຄອງ ແລະ ການສະໜອງການບໍລິການຂອງລັດ ໃຫ້ແກ່ປະຊາຊົນ. ຕາແສງຢູ່ໃນຕົວເມືອງ ຕ້ອງມີພົນລະເມືອງຢ່າງໜ້ອຍ 10 ພັນກວ່າຄົນ; ຕາແສງຢູ່ເຂດທົ່ງພຽງ, ພູພຽງ ມີພົນລະເມືອງຢ່າງໜ້ອຍ 7 ພັນຄົນ; ຕາແສງຢູ່ເຂດພູດອຍ ມີພົນລະເມືອງຢ່າງໜ້ອຍ 2 ພັນກວ່າຄົນ ແລະ ຕ້ອງມີຢ່າງໜ້ອຍ 3 ບ້ານ ຂຶ້ນໄປ ຈຶ່ງຈະສາມາມາດສ້າງເປັນຕາແສງໄດ້.

ສ່ວນບຸກຄະລາກອນຕາແສງ ປະກອບມີ: ປະທານ ຄະນະກຳມະການປົກຄອງຕາແສງ 1 ທ່ານ, ມີຕຳແໜ່ງບໍລິຫານປະເພດ 4 ເທົ່າກັບຫົວໜ້າຫ້ອງການຂັ້ນເມືອງ, ທັງເປັນເລຂາຄະນະພັກຕາແສງ; ມີຮອງປະທານ ຄະນະກຳມະການປົກຄອງຕາແສງ ບໍ່ເກີນ 2 ທ່ານ, ມີຕຳແໜ່ງບໍລິຫານປະເພດ 5, ທັງເປັນຮອງເລຂາຄະນະພັກ ຫລື ກຳມະການປະຈຳຄະນະພັກຕາແສງ; ມີກຳມະການ ທີ່ເປັນຫົວໜ້າໜ່ວຍງານ, ໜ່ວຍງານລະ 1 ທ່ານ, ມີຕຳແໜ່ງບໍລິຫານປະເພດ 6, ທັງເປັນກຳມະການຄະນະພັກຕາ ແສງ; ມີພະນັກງານຊ່ວຍວຽກ 3-5 ທ່ານ. ສະນັ້ນ, ບຸກຄະລາກອນທີ່ປະກອບຢູ່ຕາແສງ ລວມທັງໝົດບໍ່ເກີນ 13 ທ່ານຕໍ່ຕາແສງ. ໃນນັ້ນ, ໃຫ້ມີພະນັກງານ-ລັດຖະກອນ ທີ່ເປັນປະທານ, ຮອງປະທານ ແລະ ຄະນະກຳມະການ ບໍ່ເກີນ 8 ທ່ານ ແລະ ພະນັກງານ ຊ່ວຍວຽກ ທີ່ບໍ່ແມ່ນລັດຖະກອນ ບໍ່ເກີນ 5 ທ່ານ.

ຂ່າວສານປະເທດລາວ

ໃນວັນທີ 19 ຕຸລາ 2025 ທີ່ຜ່ານມາ.​ສະມາຄົມ ລາວ-ໄທ,​ ໄທ-ລາວ ເພື່ອມິດຕະພາບ ໄດ້ນຳກອງກະຖິນພຣະຣາຊະທານ ຂອງເຈົ້າຊີວິດແຫ່ງຣາຊະອານາຈັກໄທ ມາທອດຖວາຍຢູ່ວັດສຸນັນທາຣາມ, ນະຄອນໄກສອນພົມວິຫານ ແຂວງສະຫວັນນະເຂດ ໃຫ້ກຽດຮັບກອງກະຖິນໂດຍ ພຣະອາຈານ ວົງສິນ ຣັດຕະນະພອນ, ເຈົ້າອະທິການວັດ ສຸນັນທາຣາມ ໂດຍການໃຫ້ກຽດເຂົ້າຮ່ວມຂອງ ທ່ານ ບຸນໂຈມ ອຸບົນປະເສີດ, ປະທານຄະນະກຳມະການປົກຄອງແຂວງສະຫວັນນະເຂດ, ທ່ານ ຫຼີ ບຸນຄໍ້າ, ປະທານສະມາຄົມ ລາວ-ໄທ ເພື່ອມິດຕະພາບ, ທ່ານ ຄຳພັນ ອັ່ນລາວັນ, ເອກອັກຄະລັດຖະທູດລາວ ປະຈໍາໄທ, ທ່ານ ກຽດຕິຄຸນ ຊາດປະເສີດ, ປະທານສະມາຄົມ ໄທ-ລາວ ເພື່ອມິດຕະພາບ ພ້ອມດ້ວຍພຣະສົງ ແລະ ພຸດທະສາສະນິກຊົນທັງລາວ ແລະ ໄທ ເຂົ້າຮ່ວມເປັນເຈົ້າສັດທາ.

ລວມຍອດສັດທາທີ່ໄດ້ຮັບຈາກກອງກະຖິນ ທີ່ສະມາຄົມລາວ-ໄທ,ໄທ-ລາວ ເພື່ອມິດຕະພາບ​ ນຳມາທອດຖວາຍຄັ້ງນີ້ມີທັງໝົດ 1,262,200 ບາດ ແລະ 261 ໂດລາ. ເງິນຈຳນວນນີ້ ເພື່ອສົມທົບທຶນກໍ່ສ້າງອາຣາມ, ກຸຕິ ແລະ ຫໍພຣະ ຢູ່ວັດສຸນັນທາຣາມ ທີ່ສ້າງບໍ່ທັນສຳເລັດ ແລະ ນຳໃຊ້ເຂົ້າໃນວຽກງານທີ່ຈຳເປັນອື່ນໆ.

ການທອດຖວາຍກະຖິນພະຣາຊະທານຄັ້ງນີ້ ແມ່ນກິດຈະກຳປະຈໍາປີ ຂອງສອງສະມາຄົມ ລາວ-ໄທ, ໄທ-ລາວ ເພື່ອມິດຕະພາບ ທີ່ເຄີຍປະຕິບັດຮ່ວມກັນເປັນປົກກະຕິ, ຊຶ່ງຄັ້ງນີ້ ເປັນຄັ້ງທີ່ 26 ເພື່ອສົ່ງເສີມ ແລະ ອະນຸລັກວັດທະນະທຳ, ຮີດຄອງປະເພນີອັນດີງາມຂອງປະຊາຊົນສອງຊາດລາວ-ໄທ, ເປັນການຊຸກຍູ້ໃຫ້ມີການໄປມາຫາສູ່ກັນ, ປະກອບສ່ວນສຳຄັນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ມີມູນເຊື້ອອັນດີງາມ ລະຫວ່າງສອງປະເທດ ແລະ ປະຊາຊົນສອງຊາດລາວ-ໄທ.

ທີ່ມາ: ວສລ

ຫ້ອງວ່າການແຂວງບໍ່ແກ້ວ, ວັນທີ 15 ຕຸລາ 2025 – ລັດຖະບານຍີ່ປຸ່ນໄດ້ໃຫ້ການຊ່ວຍເຫຼືອເປັນມູນຄ່າປະມານ 88,546 ໂດລາສະຫະລັດ ໃນ “ໂຄງການກໍ່ສ້າງໂຮງຮຽນປະຖົມສົມບູນບ້ານຫາດສະ” ເຊິ່ງແມ່ນໂຄງການທີ່ຢູ່ພາຍໃຕ້ກອບຮ່ວມມືທີ່ມີຊື່ວ່າ “ໂຄງການເສີມສ້າງຄວາມໝັ້ນຄົງຂອງມະນຸດຂັ້ນຮາກຖານ (GGP)”.

ໂຄງການດັ່ງກ່າວແມ່ນການສະໜັບສະໜູນທຶນຮອນເພື່ອກໍ່ສ້າງອາຄານຮຽນໃໝ່, ຫ້ອງນໍ້າ ແລະ ສະໜອງອຸປະກອນເຄື່ອງໃຊ້ໃຫ້ແກ່ໂຮງຮຽນມັດທະຍົມຕົ້ນບ້ານຫາດສະໃນເມືອງປາກທາແຂວງບໍ່ແກ້ວ ເພື່ອປະກອບສ່ວນເຂົ້າໃນການຍົກລະດັບສະພາບແວດລ້ອມການສຶກສາຮ່ຳຮຽນຂອງໂຮງຮຽນດັ່ງກ່າວ.

ພິທີລົງນາມໄດ້ຖືກຈັດຂຶ້ນທີ່ຫ້ອງວ່າການແຂວງບໍ່ແກ້ວ ລະຫວ່າງ ພະນະທ່ານ ໂຄອິຊຶມິ ຊຶໂຕະມຸ, ເອກອັກຄະຣາຊະທູດຍີ່ປຸ່ນ ປະຈໍາ ສປປ ລາວ ແລະ ພະແນກສຶກສາ ແລະ ກິລາເມືອງປາກທາ ໂດຍມີ ພະນະທ່ານ ພົຈວ ແປ້ນຄໍາ ບຸດຈັນແພງ, ເຈົ້າແຂວງບໍ່ແກ້ວ ໃຫ້ກຽດເຂົ້າຮ່ວມເປັນສັກຂີພະຍານ.

ລັດຖະບານຍີ່ປຸ່ນຫວັງເປັນຢ່າງຍິ່ງວ່າ ການຊ່ວຍເຫຼືອຈາກລັດຖະບານຍີ່ປຸ່ນ ຈະຊ່ວຍເຮັດໃຫ້ສະພາບແວດລ້ອມການສຶກສາຮ່ຳຮຽນຂອງນັກຮຽນທີ່ຈະກາຍເປັນອະນາຄົດຂອງຊາດໄດ້ຮັບການປັບປຸງ ແລະ ຊ່ວຍຍົກລະດັບສະພາບການເຮັດວຽກຂອງຄູອາຈານ ແລະ ພະນັກງານໃນໂຮງຮຽນ.

ໂຄງການເສີມສ້າງຄວາມໝັ້ນຄົງຂອງມະນຸດຂັ້ນຮາກຖານ (GGP) ແມ່ນ ການສະໜອງທຶນໃນໂຄງການຂະໜາດນ້ອຍທີ່ສ້າງຜົນປະໂຫຍດໂດຍກົງແກ່ປະຊາຊົນທ້ອງຖິ່ນ ແລະ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງປະເທດທີ່ກໍາລັງພັດທະນາ ກໍ່ຄືປະເທດລາວ.

ມາຮອດປະຈຸບັນ, ລັດຖະບານຍີ່ປຸ່ນໄດ້ໃຫ້ການສະໜັບສະໜູນໃຫ້ແກ່ແຂວງບໍ່ແກ້ວ ລວມເປັນມູນຄ່າຫຼາຍກວ່າ 870,000 ໂດລາສະຫະລັດ ໃນຂະແໜງການສຶກສາ, ສາທາລະນະສຸກ ແລະ ໂຍທາທິການ, ໂຄງການນີ້ ຖືວ່າເປັນໂຄງການທີ່ 7 ໃນຂະແໜງສຶກສາ ແລະ ເປັນໂຄງການທໍາອິດຂອງເມືອງປາກທາ.

ປະເທດຍີ່ປຸ່ນຈະສືບຕໍ່ໃຫ້ການຊ່ວຍເຫຼືອປະເທດລາວໃນການປັບປຸງພື້ນຖານຊີວິດການເປັນຢູ່ຂັ້ນຮາກຖານຕໍ່ໄປເພື່ອຮັບປະກັນ “ບໍ່ໃຫ້ມີໃຜຖືກຖິ້ມໄວ້ທາງຫຼັງ” ຜ່ານການແກ້ໄຂຄວາມແຕກໂຕນໃນພາກພື້ນ.

ຂໍ້ມູນ: Embassy of Japan in Laos