22 ມິຖຸນາ 2026 – ທີ່ກະຊວງການຕ່າງປະເທດ, ໄດ້ມີພິທີລົງນາມເອກະສານແລກປ່ຽນ ໂຄງການສະໜອງທຶນການສຶກສາເພື່ອການພັດທະນາຊັບພະຍາກອນມະນຸດ (The Project for Human Resource Development Scholarship ຫຼື JDS) ປະຈຳປີ 2026 ລະຫວ່າງ ລັດຖະບານ ແຫ່ງ ສປປ ລາວ ແລະ ລັດຖະບານຍີ່ປຸ່ນ ໃນມູນຄ່າ 378 ລ້ານເຢນ (ປະມານ 2.3 ລ້ານໂດລາສະຫະລັດ).
ໃຫ້ກຽດຮ່ວມລົງນາມໃນຄັ້ງນີ້ໂດຍ:
ທ່ານ ອານຸພາບ ວົງໜໍ່ແກ້ວ, ຮອງລັດຖະມົນຕີກະຊວງການຕ່າງປະເທດ (ຕາງໜ້າລັດຖະບານ ສປປ ລາວ).
ທ່ານ ໂຄອິຊຸມິ ຊຶໂຕະມຸ (Mr. KOIZUMI Tsutomu), ເອກອັກຄະຣາຊະທູດວິສາມັນຜູ້ມີອຳນາດເຕັມ ແຫ່ງ ຍີ່ປຸ່ນ ປະຈຳ ສປປ ລາວ (ຕາງໜ້າລັດຖະບານຍີ່ປຸ່ນ).
ໂດຍມີຜູ້ຕາງໜ້າຈາກພາກສ່ວນທີ່ກ່ຽວຂ້ອງຂອງທັງສອງຝ່າຍ ເຂົ້າຮ່ວມເປັນສັກຂີພິຍານ.
ໃນໂອກາດດັ່ງກ່າວ, ທ່ານ ຮອງລັດຖະມົນຕີ ອານຸພາບ ວົງໜໍ່ແກ້ວ ໄດ້ສະແດງຄວາມຂອບໃຈຢ່າງຈິງໃຈ ມາຍັງລັດຖະບານ ແລະ ປະຊາຊົນຍີ່ປຸ່ນ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອ ສປປ ລາວ ຢ່າງຕໍ່ເນື່ອງ ເຊິ່ງໄດ້ປະກອບສ່ວນໂດຍກົງເຂົ້າໃນການຍົກລະດັບຊີວິດການເປັນຢູ່ຂອງປະຊາຊົນລາວບັນດາເຜົ່າ. ພ້ອມທັງຢືນຢັນວ່າ ຈະນຳໃຊ້ທຶນການສຶກສາຄັ້ງນີ້ໃຫ້ເກີດຜົນປະໂຫຍດສູງສຸດ ເພື່ອຜັນຂະຫຍາຍການເປັນ “ຄູ່ຮ່ວມຍຸດທະສາດຮອບດ້ານ ລາວ-ຍີ່ປຸ່ນ” ທີ່ໄດ້ຮັບການຍົກລະດັບຮ່ວມກັນໃນປີ 2025 ໃຫ້ເປັນຮູບປະທຳ ແລະ ເລິກເຊິ່ງຍິ່ງໆຂຶ້ນ.
ທາງດ້ານ ທ່ານເອກອັກຄະຣາຊະທູດ ໂຄອິຊຸມິ ຊຶໂຕະມຸ ກໍໄດ້ສະແດງຄວາມໝາຍໝັ້ນທີ່ຈະສືບຕໍ່ເຮັດວຽກຮ່ວມກັບຝ່າຍລາວຢ່າງໃກ້ຊິດ ເພື່ອສົ່ງເສີມສາຍພົວພັນມິດຕະພາບ, ການຮ່ວມມືອັນດີງາມ ແລະ ການເປັນຄູ່ຮ່ວມຍຸດທະສາດຮອບດ້ານ ເພື່ອນຳເອົາຜົນປະໂຫຍດສູງສຸດມາສູ່ປະຊາຊົນສອງຊາດໃນຕໍ່ໜ້າ.
ທຶນການສຶກສາເພື່ອການພັດທະນາຊັບພະຍາກອນມະນຸດ ຖືເປັນໂຄງການຍຸດທະສາດທີ່ປະສົບຜົນສຳເລັດຢ່າງຫຼວງຫຼາຍ ເຊິ່ງທີ່ຜ່ານມາໄດ້:
ຍົກລະດັບຂີດຄວາມສາມາດໃຫ້ແກ່ພະນັກງານ-ລັດຖະກອນໜຸ່ມຂອງລາວ ຫຼາຍກວ່າ 500 ຄົນ ໃນການສຶກສາລະດັບປະລິຍາໂທ ແລະ ປະລິຍາເອກ ຢູ່ມະຫາວິທະຍາໄລຊັ້ນນຳຂອງຍີ່ປຸ່ນ.
ເປັນຕົ້ນແມ່ນ ການບໍລິຫານລັດ, ເດດຖະກິດ, ການພົວພັນສາກົນ, ກະສິກຳ ແລະ ສິ່ງແວດລ້ອມ ເພື່ອນຳຄວາມຮູ້ກັບມາພັດທະນາປະເທດຊາດ.
ນອກຈາກທຶນການສຶກສາແລ້ວ, ຍີ່ປຸ່ນຍັງໄດ້ຊ່ວຍເຫຼືອໃນການກໍ່ສ້າງ-ສ້ອມແປງໂຮງຮຽນໃນເຂດຫ່າງໄກສອກຫຼີກ, ປັບປຸງສູນພັດທະນາຄູ ແລະ ສະໜອງອຸປະກອນການສຶກສາທີ່ຈຳເປັນ.
ນອກຈາກຂົງເຂດການສຶກສາແລ້ວ, ລັດຖະບານຍີ່ປຸ່ນ ຍັງໄດ້ໃຫ້ການຮ່ວມມື ແລະ ຊ່ວຍເຫຼືອ ສປປ ລາວ ໃນການພັດທະນາເສດຖະກິດ-ສັງຄົມ ຮອບດ້ານ ເປັນຕົ້ນແມ່ນໂຄງລ່າງພື້ນຖານ, ສາທາລະນະສຸກ, ກະສິກຳ-ປ່າໄມ້, ການບັນເທົາທຸກຈາກໄພພິບັດທາງທຳມະຊາດ ແລະ ວຽກງານເກັບກູ້ລະເບີດທີ່ບໍ່ທັນແຕກ (UXO) ຢ່າງທັນການ.
ທີ່ມາ: ກະຊວງການຕ່າງປະເທດ
Lao Youth Radio FM90MHz
