ໃນວັນທີ 12 ພຶດສະພາ 2026 ທີ່ຜ່ານມາ, ກະຊວງວັດທະນະທຳ ແລະ ທ່ອງທ່ຽວ ແຫ່ງ ສປປ ລາວ ຮ່ວມກັບ ກະຊວງວັດທະນະທຳ, ກິລາ ແລະ ທ່ອງທ່ຽວ ແຫ່ງ ສສ ຫວຽດນາມ ໄດ້ຮ່ວມກັນຈັດພິທີເປີດ “ງານສັບປະດາວັດທະນະທຳ ແລະ ທ່ອງທ່ຽວຫວຽດນາມ ຢູ່ ສປປ ລາວ” ຢ່າງເປັນທາງການ.
ເປັນກຽດເຂົ້າຮ່ວມໃນພິທີມີ ທ່ານ ນາງ ສວນສະຫວັນ ວິຍະເກດ, ກຳມະການສູນກາງພັກ, ລັດຖະມົນຕີກະຊວງວັດທະນະທຳ ແລະ ທ່ອງທ່ຽວ ແຫ່ງ ສປປ ລາວ ແລະ ທ່ານ ນາງ ເລິມ ທິ ເຟືອງ ແທງ, ກຳມະການສູນກາງພັກ, ລັດຖະມົນຕີກະຊວງວັດທະນະທຳ, ກິລາ ແລະ ທ່ອງທ່ຽວ ແຫ່ງ ສສ ຫວຽດນາມ, ພ້ອມດ້ວຍບັນດາຮອງລັດຖະມົນຕີ ແລະ ແຂກຖືກເຊີນຈາກທັງສອງພາກສ່ວນ.
ການຈັດງານໃນຄັ້ງນີ້ ຖືເປັນຂີດໝາຍອັນສຳຄັນໃນການເລີ່ມຕົ້ນຜັນຂະຫຍາຍ ແຜນການຮ່ວມມືດ້ານວັດທະນະທຳ ແລະ ການທ່ອງທ່ຽວ ສົກປີ 2026-2030 ລະຫວ່າງ ສອງປະເທດ. ທ່ານ ນາງ ສວນສະຫວັນ ວິຍະເກດ ໄດ້ເນັ້ນໜັກວ່າ:
“ກິດຈະກຳນີ້ແມ່ນການເປີດສັງກາດໃໝ່ແຫ່ງການພົວພັນ ທີ່ສະແດງໃຫ້ເຫັນເຖິງຄວາມສະໜິດສະໜົມ ແລະ ສາຍພົວພັນມິດຕະພາບອັນເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ ທີ່ເປັນແວ່ນແຍງອັນດີງາມໃນການພົວພັນສາກົນ.”
ຈຸດເດັ່ນຂອງງານແມ່ນການສະແດງ ສິລະປະລະຄອນຕຸກກະຕານ້ຳ, ເຊິ່ງເປັນມໍລະດົກທາງວັດທະນະທຳອັນລ້ຳຄ່າ ແລະ ເປັນເອກະລັກສະເພາະຂອງຫວຽດນາມ ທີ່ສືບທອດກັນມາຫຼາຍພັນປີ. ທ່ານ ນາງ ເລິມ ທິ ເຟືອງ ແທງ ໄດ້ກ່າວຊື່ນຊົມວ່າ: ການສະແດງດັ່ງກ່າວບໍ່ພຽງແຕ່ສະທ້ອນໃຫ້ເຫັນເຖິງວິຖີຊີວິດອັນລຽບງ່າຍ ແລະ ຈິດວິນຍານຂອງຊາວນາຫວຽດນາມເທົ່ານັ້ນ, ແຕ່ຍັງເປັນການສົ່ງເສີມພາບພົດຂອງປະເທດຫວຽດນາມ ທີ່ມີຄວາມເປັນມິດ ແລະ ພັດທະນາຢ່າງບໍ່ຢຸດຢັ້ງ ສູ່ສາຍຕາຊາວລາວ ແລະ ເພື່ອນມິດສາກົນ.
ງານສັບປະດາວັດທະນະທຳໃນຄັ້ງນີ້ ບໍ່ພຽງແຕ່ແມ່ນການແລກປ່ຽນສິລະປະວັນນະຄະດີ, ແຕ່ຍັງເປັນການຢືນຢັນເຖິງຄວາມແໜ້ນແຟ້ນຂອງສອງພັກ, ສອງລັດ ແລະ ສອງກະຊວງ ທີ່ໄດ້ຊຸກຍູ້ການແລກປ່ຽນກິດຈະກຳຕ່າງໆຢ່າງຕໍ່ເນື່ອງ ເພື່ອຜົນປະໂຫຍດສູງສຸດຂອງປະຊາຊົນທັງສອງຊາດ ລາວ-ຫວຽດນາມ ໃນພາລະກິດສ້າງສາ ແລະ ພັດທະນາປະເທດຊາດໃຫ້ຮຸ່ງເຮືອງສີວິໄລ.
ທີ່ມາ: ປະຊາຊົນ
