ນະຄອນຫຼວງມານິລາ, ສາທາລະນະລັດ ຟີລິບປິນ – ໃນວັນທີ 22 ກໍລະກົດ 2026 ນີ້, ທ່ານ ທອງສະຫວັນ ພົມວິຫານ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ເຂົ້າຮ່ວມພົບປະສອງຝ່າຍກັບ ທ່ານ ນາງ ອານິຕາ ອານັນ (Anita Anand), ລັດຖະມົນຕີກະຊວງການຕ່າງປະເທດ ແຫ່ງ ການາດາ ການພົບປະດັ່ງກ່າວຈັດຂຶ້ນ ໃນໂອກາດເຂົ້າຮ່ວມກອງປະຊຸມປິ່ນອ້ອມ ກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 59, ເຊິ່ງ ສປປ ລາວ ໄດ້ຮັບກຽດເປັນປະເທດປະສານງານ ໃຫ້ແກ່ ອາຊຽນ-ການາດາ (ໄລຍະປີ 2024-2027).
ການພົບປະໄດ້ດຳເນີນໄປໃນບັນຍາກາດອັນອົບອຸ່ນ, ເຕັມໄປດ້ວຍໄມຕີຈິດ ແລະ ມິດຕະພາບ.
ທັງສອງຝ່າຍໄດ້ຕີລາຄາສູງຕໍ່ມິດຕະພາບ ແລະ ການຮ່ວມມືອັນຍາວນານ (15 ມິຖຸນາ 1974 – 2026) ເຊິ່ງໄດ້ຮັບການເພີ່ມພູນຄູນສ້າງຢ່າງຕໍ່ເນື່ອງ ຈົນປະກົດຜົນເປັນຮູບປະທຳ ທັງໃນຂອບສອງຝ່າຍ ແລະ ຫຼາຍຝ່າຍ.
ຮ່ວມກັນກຳນົດທິດທາງການຮ່ວມມືໃນຕໍ່ໜ້າ ເພື່ອຍົກລະດັບສາຍພົວພັນໃຫ້ແໜ້ນແຟ້ນ, ໂດຍສະເພາະການຊຸກຍູ້ການຮ່ວມມືດ້ານການຄ້າ-ການລົງທຶນ ໃຫ້ຂະຫຍາຍຕົວສອດຄ່ອງກັບຄວາມກ້າວໜ້າດ້ານການເມືອງ.
ເຫັນດີເປັນເອກະພາບໃນການຊຸກຍູ້ໃຫ້ມີການຈັດ ກອງປະຊຸມປຶກສາຫາລືດ້ານການເມືອງ ລະດັບຫົວໜ້າກົມ ລະຫວ່າງ ສອງກະຊວງການຕ່າງປະເທດ ລາວ-ການາດາ ຄັ້ງທີ 5 ໃນໄວໆນີ້.
ໃນຕອນທ້າຍ, ລັດຖະມົນຕີທັງສອງທ່ານ ຍັງໄດ້ແລກປ່ຽນທັດສະນະ ແລະ ຄວາມຄິດເຫັນຢ່າງກົງໄປກົງມາ ກ່ຽວກັບສະພາບການພົ້ນເດັ່ນໃນພາກພື້ນ ແລະ ສາກົນ ທີ່ສອງຝ່າຍໃຫ້ຄວາມສົນໃຈຮ່ວມກັນ.
ທີ່ມາ: ກະຊວງການຕ່າງປະເທດ
Lao Youth Radio FM90MHz
