ຖະແຫຼງການຂອງເມຕາ (Meta) ບໍລິສັດແມ່ຂອງ WhatsApp ລະບຸວ່າ ໄດ້ດຳເນີນການລຶບບັນຊີທີ່ກ່ຽວຂ້ອງກັບແກ໋ງສະແກຣມເມີ້ຂ້າມຊາດໄປແລ້ວກວ່າ 6.8 ລ້ານບັນຊີ ໃນໄລຍະປີທຳອິດຂອງປີ 2025 ທີ່ຜ່ານມາ ໂດຍສ່ວນໃຫຍ່ມີຖານຢູ່ໃນພາກພື້ນອາຊີອາຄະເນ.
ເມຕາລະບຸວ່າ ບັນຊີເຫຼົ່ານີ້ມີການເຊື່ອມໂຍງກັບສູນສະແກຣມເມີ້ທີ່ດຳເນີນງານໂດຍແກ໋ງອາຊະຍາກຳໃນແຖບອາຊຽນຕາເວັນອອກສຽງໃຕ້ ຊຶ່ງມັກມີການບັງຄັບໃຊ້ແຮງງານ.
ຄວາມເຄື່ອນໄຫວນີ້ເກີດຂຶ້ນຫຼັງຈາກ WhatsApp ໄດ້ປະກາດເປີດໂຕມາດຕະການປ້ອງກັນສະແກຣມເມີ້ອອນໄລນ໌ ໂດຍຈະມີການແຈ້ງເຕືອນຜູ້ໃຊ້ຖ້າພົບກິດຈະກຳທີ່ເຂົ້າຂ່າຍການຫຼອກລວງ ເຊັ່ນ ຖ້າຖືກເພີ່ມເຂົ້າກຸ່ມແຊັດໂດຍຄົນທີ່ບໍ່ຢູ່ໃນລາຍຊື່ຕິດຕໍ່ຂອງຕົນເອງ.
ມາດຕະການນີ້ມຸ່ງເປົ້າສະກັດກັ້ນກົນວິທີທີ່ແກ໋ງສະແກຣມເມີ້ໃຊ້ເພື່ອຄວບຄຸມບັນຊີ WhatsApp ຫຼື ການເພີ່ມຜູ້ໃຊ້ເຂົ້າກຸ່ມແຊັດ ໃນການເຊີນຊວນໃຫ້ຮ່ວມແຜ່ນການລົງທຶນປອມ ຫຼື ຖືກຫຼອກລວງໃນຮູບແບບອື່ນໆ.
ເມຕາເຜີຍວ່າ WhatsApp ສາມາດກວດພົບ ແລະ ດຳເນີນການລຶບບັນຊີເຫຼົ່ານີ້ອອກໄປໄດ້ທັນກ່ອນທີ່ສະແກຣມເມີ້ຈະເລີ່ມການເຮັດວຽກໄດ້.
ເມຕາຍົກຕົວຢ່າງເຄດໜຶ່ງທີ່ WhatsApp ໄດ້ຮ່ວມມືກັບ OpenAI ເຊິ່ງເປັນຜູ້ຢູ່ເບື້ອງຫຼັງ ChatGPT ໃນການສະກັດແກ໋ງສະແກຣມເມີ້ ທີ່ສະເໜີເງິນເພື້ອແລກກັບການກົດໄລໂພສໂຊເຊີຍມີເດຍ ເພື່ອໂປຣໂມດທຸລະກິດປອມ.
ເບື່ອງຕົ້ນມີການເປີດເຜີຍວ່າ ສະແກຣມເມີ້ກຸ່ມນີ້ໃຊ້ ChatGPT ເພື່ອຂຽນຄຳສັ່ງທີ່ໃຊ້ຫຼອກລວງເຫຍື່ອ.
ໂດຍທົ່ວໄປ ຄົນຮ້າຍມັກຈະຕິດຕໍ່ຫາເປົ້າໝາຍຜ່ານທາງຂໍ້ຄວາມ ກ່ອນຈະຍ້າຍການສົນທະນາໄປທາງໂຊເຊີຍມີເດຍ ຫຼື ແອັບສົ່ງຂໍ້ຄວາມສ່ວນຕົວ ແລະ ຈົບລົງດ້ວຍການຫຼອກໃຫ້ຈ່າຍເງິນ ຫຼື ຄຣິບໂທເຄີເຣນຊີ.
ທີ່ຜ່ານມາ ລັດຖະບານຂອງປະເທດໃນພາກພື້ນນີ້ ມັກຈະມີການເຕືອນປະຊາຊົນໃຫ້ລະມັດລະວັງການຫຼອກລວງທີ່ອາດເກີດຂຶ້ນຜ່ານຊ່ອງທາງອອນໄລນ໌ ແລະ ໃຫ້ໃຊ້ຟີຈເຈີປ້ອງກັນການຫຼອກລວງ ເຊັ່ນ ການຢືນຢັນໂຕຕົນສອງຂັ້ນຕອນຂອງ WhatsApp ເພື່ອຊ່ວຍປົກປ້ອງບັນຊີຈາກການຖືກແຮກ.
ຕົວຢ່າງເຊັ່ນ ຢູ່ສິງກະໂປ ຕຳຫຼວດໄດ້ປະຊາສຳພັນໃຫ້ປະຊາຊົນລະມັດລະວັງການເຊີນຊວນທີ່ນ່າສົງໄສ ທີ່ໄດ້ຮັບຜ່ານແອັບສົ່ງຂໍ້ຄວາມ.
ທີ່ມາຈາກ: BBC
