ໃນຍຸກປັດຈຸບັນ, ປະຕິເສດບໍ່ໄດ້ເລີຍວ່າພວກເຮົາເກືອບທຸກຄົນລ້ວນແຕ່ໃຊ້ AI ເຊັ່ນ ChatGPT, Google Gemini ຫຼື Claude ເຂົ້າມາຊ່ວຍໃນການເຮັດວຽກ ບໍ່ວ່າຈະເປັນການຂຽນຄອນເທນ, ການຄິດໄອເດຍ ຫຼື ການວິເຄາະຂໍ້ມູນ ແຕ່ຮູ້ ຫຼື ບໍ່ວ່າ? ການພິ່ງພາ AI ຫຼາຍເກີນໄປ ກຳລັງສົ່ງຜົນຮ້າຍຕໍ່ສະໝອງ ແລະ ຄວາມສາມາດຂອງມະນຸດໂດຍບໍ່ຮູ້ໂຕ.
ເປີດຜົນວິໄຈຈາກ MIT: ໃຊ້ AI ຄິດແທນ ເຮັດໃຫ້ສະໝອງເຮັດວຽກຫຼຸດລົງ 55%!
ນາຕາລີຢາ ຄອສມິນາ (Nataliya Kosmyna) ນັກວິທະຍາສາດຈາກສະຖາບັນ MIT Media Lab ໄດ້ສັງເກດເຫັນວ່າ ບົດຮຽງຄວາມ ຫຼື ໃບສະໝັກງານຂອງນັກສຶກສາຍຸກນີ້ ເຖິງວ່າຈະມີພາສາທີ່ງົດງາມ ແຕ່ກັບ “ຄ້າຍຄືກັນ” ແລະ ຂາດຄວາມຄິດສ້າງສັນໃໝ່ໆ.
ຈາກການທົດລອງກວດວັດຄື້ນສະໝອງຂອງນັກສຶກສາ 54 ຄົນ ຂະນະຂຽນບົດຄວາມ ພົບຂໍ້ມູນທີ່ໜ້າຕົກໃຈວ່າ:
• ສະໝອງຢຸດເຮັດວຽກ: ກຸ່ມທີ່ໃຊ້ ChatGPT ຊ່ວຍຄິດ, ສະໝອງໃນສ່ວນຄວາມຄິດສ້າງສັນ ແລະ ການປະມວນຜົນ ຫຼຸດລົງສູງເຖິງ 55% ໃນຂະນະທີ່ກຸ່ມທີ່ຄິດເອງ ມີສະພາບສະໝອງທີ່ຕື່ນຕົວ ແລະ ກະຕຸ້ນຫຼາຍສ່ວນ.
• ສູນເສຍຄວາມຈຳ: ນັກສຶກສາກຸ່ມທີ່ໃຊ້ AI ບໍ່ສາມາດຈື່ ຫຼື ຍົກຂໍ້ຄວາມໃນບົດຄວາມທີ່ຕົນເອງຫາກໍສົ່ງໄປມາອ້າງອີງໄດ້ເລີຍ ແລະ ຮູ້ສຶກວ່າຕົນເອງບໍ່ໄດ້ເປັນເຈົ້າຂອງຜົນງານນັ້ນແທ້ໆ.
ພາວະ “ຍອມຈຳນົນທາງຄວາມຄິດ”
ເລື່ອງນີ້ຮຸນແຮງຮອດຂັ້ນທີ່ນັກວິທະຍາສາດນິຍາມພາວະທີ່ມະນຸດເລືອກຈະເຊື່ອ ແລະ ຍອມຮັບສິ່ງທີ່ AI ບອກທັນທີໂດຍບໍ່ກວດສອບວ່າ “ການຍອມຈຳນົນທາງຄວາມຄິດ”
ແມ່ນແຕ່ໃນກຸ່ມວິຊາຊີບທີ່ມີຄວາມສ່ຽງສູງ ເຊັ່ນ: ແພດທີ່ໃຊ້ AI ຊ່ວຍຄັດກອງມະເຮັງລຳໄສ້ຕິດຕໍ່ກັນ 3 ເດືອນ ພົບວ່າ ຄວາມສາມາດໃນການກວດຫາເນື້ອງອກດ້ວຍໂຕເອງ “ຫຼຸດລົງທັນທີ” ໃນຍາມທີ່ບໍ່ມີ AI ຄອຍຊ່ວຍເຫຼືອ.
ນອກຈາກນີ້, ວິເວນ ມິງ (Vivienne Ming) ນັກປະສາດວິທະຍາສາດ ຍັງເຕືອນວ່າ ການທີ່ພວກເຮົາພົບເຈິວຽກຍາກແລ້ວຖາມ AI ທັນທີ ໂດຍບໍ່ປ່ອຍໃຫ້ສະໝອງສ່ວນຄື້ນ “ແກມມາ” (Gamma wave) ໄດ້ທຳງານ ອາດສົ່ງຜົນໃຫ້ສະໝອງສ່ວນນີ້ອ່ອນແອລົງ ແລະ ເພີ່ມຄວາມສ່ຽງຕໍ່ ໂລກສະໝອງເສື່ອມ ໃນອະນາຄົດ.
ທາງອອກຍຸກໃໝ່: ປ່ຽນສູ່ “Hybrid Intelligence” (ມະນຸດ + ເຕັກໂນໂລຊີ)
ງານວິໄຈພົບວ່າ ມີຄົນກຸ່ມນ້ອຍ (ຕໍ່າກວ່າ 10%) ທີ່ໃຊ້ AI ພຽງແຕ່ເປັນ “ເຄື່ອງມືຮວບຮວມຂໍ້ມູນ” ແລ້ວເອົາມາວິເຄາະຕໍ່ດ້ວຍໂຕເອງ ເຊິ່ງກຸ່ມນີ້ມີສະໝອງທີ່ແຂງແຮງ ແລະ ວິເຄາະຂໍ້ມູນໄດ້ຖືກຕ້ອງທີ່ສຸດ.
ວິເວນ ມິງ ໄດ້ແນະນຳ 2 ເຕັກນິກໃນການເຮັດວຽກຮ່ວມກັບ AI ໂດຍບໍ່ເສຍສັກກາຍະພາບຂອງສະໝອງ ດັ່ງນີ້:
1. ຕັ້ງ AI ເປັນສັດຕູຕະຫຼອດການ: ແທນທີ່ຈະໃຫ້ AI ຄິດຄຳຕອບໃຫ້ ໃຫ້ປ່ຽນເປັນປ້ອນຄວາມຄິດຂອງເຮົາລົງໄປ ແລ້ວສັ່ງໃຫ້ AI ສວມບົດບາດເປັນຄູ່ແຂ່ງ ທີ່ຄອຍຈັບຜິດ ແລະ ອະທິບາຍວ່າເປັນຫຍັງໄອເດຍຂອງເຮົາຈຶ່ງບໍ່ດີ ວິທີນີ້ຈະບັງຄັບໃຫ້ສະໝອງເຮົາຕ້ອງຄິດຫາເຫດຜົນມາໂຕ້ແຍ່ງ
2. ສ້າງແຮງສຽດທານທີ່ເກີດຜົນ: ຕັ້ງຄ່າ ຫຼື ສັ່ງໃຫ້ AI ຄອຍສະໜອງພຽງແຕ່ຂໍ້ມູນບໍລິບົດ ແລະ “ຄອຍຕັ້ງຄຳຖາມກັບມາຫາເຮົາ” ແທນການປ້ອນຄຳຕອບສຳເລັດຮູບ ວິທີນີ້ຈະກະຕຸ້ນໃຫ້ເຮົາເກີດຄວາມກະຕືລືລົ້ນໃນການຄິດຄົ້ນຄຳຕອບດ້ວຍໂຕເອງ.
ສະຫຼຸບ: AI ບໍ່ແມ່ນຕົວຮ້າຍທີ່ເຮົາຕ້ອງເລີກໃຊ້ ແຕ່ພວກເຮົາຕ້ອງຮູ້ເທົ່າທັນ ໂດຍການ “ຄິດແລະຮຽນຮູ້ດ້ວຍໂຕເອງໃຫ້ແຂງແຮງກ່ອນ ແລ້ວຈຶ່ງດຶງ AI ເຂົ້າມາຊ່ວຍເສີມໃນພາຍຫຼັງ” ເພື່ອຮັກສາສັກກາຍະພາບຂອງສະໝອງ ແລະ ສ້າງຜົນງານທີ່ມີປະສິດທິພາບສູງສຸດໃນອະນາຄົດ.
ແຫຼ່ງຂໍ້ມູນອ້າງອີງ:
• MIT Media Lab
• Hybrid Intelligence
