ຕະຫຼອດໄລຍະ 6 ເດືອນຕົ້ນປີ 2026 ຜ່ານມາ, ລັດຖະບານລາວໄດ້ສຸມໃສ່ຢ່າງຕັ້ງໜ້າ ແລະ ມີແບບແຜນ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາ ສົ່ງຜົນໃຫ້ເສດຖະກິດມີການຂະຫຍາຍຕົວຢ່າງຕໍ່ເນື່ອງ.
ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ໄດ້ລາຍງານສະຫຼຸບຕີລາຄາ ຕໍ່ກອງປະຊຸມສະໄໝວິສາມັນເທື່ອທີ 1 ຂອງສະພານແຫ່ງຊາດຊຸດທີ X ກ່ຽວກັບຜົນງານທີ່ພົ້ນເດັ່ນໃນແຕ່ລະດ້ານ ດັ່ງນີ້:
1. ການເຕີບໂຕທາງດ້ານເສດຖະກິດ (GDP):
ເສດຖະກິດໃນ 6 ເດືອນຕົ້ນປີ ເຕີບໂຕໃນລະດັບ 5% (ສະເລ່ຍມູນຄ່າເທົ່າກັບ 199,987 ຕື້ກີບ ຫຼື 48% ຂອງແຜນການ) ໂດຍມີການຂະຫຍາຍຕົວໃນແຕ່ລະຂະແໜງການ ດັ່ງນີ້:
ຂະແໜງກະສິກຳ: ຂະຫຍາຍຕົວ 4.3% (ກວມເອົາ 17.4% ຂອງ GDP).
ຂະແໜງອຸດສາຫະກຳ: ຂະຫຍາຍຕົວ 5.1% (ກວມເອົາ 35.0% ຂອງ GDP).
ຂະແໜງບໍລິການ: ຂະຫຍາຍຕົວ 5.3% (ກວມເອົາ 37.2% ຂອງ GDP).
ພາສີ-ອາກອນຜະລິດຕະພັນສຸດທິ: ຂະຫຍາຍຕົວ 4.9% (ກວມເອົາ 10.5% ຂອງ GDP).
2. ການຈັດເກັບລາຍຮັບ ແລະ ງົບປະມານ:
ລາຍຮັບທັງໝົດ: ຈັດເກັບໄດ້ 44,956 ຕື້ກີບ (ເທົ່າກັບ 54% ຂອງແຜນການ).
ເມື່ອທຽບໃສ່ໄລຍະດຽວກັນຂອງປີຜ່ານມາ ເພີ່ມຂຶ້ນ 19% (ຄິດເປັນມູນຄ່າເພີ່ມຂຶ້ນປະມານ 7,198 ຕື້ກີບ) ເຊິ່ງເປັນທ່າອ່ຽງທີ່ດີ ແລະ ບັນລຸເກີນແຜນການເຄິ່ງປີ.
3. ສະຖຽນລະພາບທາງດ້ານເງິນຕາ:
ລັດຖະບານໄດ້ດຳເນີນນະໂຍບາຍເງິນຕາແບບປະສົມປະສານ ແລະ ຄຸ້ມຄອງອັດຕາແລກປ່ຽນຕາມກົນໄກຕະຫຼາດ ເຮັດໃຫ້ຕົວເລກທາງການເງິນມີຄວາມໝັ້ນຄົງ:
ອັດຕາດອກເບ້ຍພື້ນຖານ (ສະກຸນເງິນກີບ): ປັບຫຼຸດລົງຈາກ 8.5% ຕໍ່ປີ ມາເປັນ 8% ຕໍ່ປີ ພ້ອມທັງອອກພັນທະບັດໄລຍະສັ້ນ ແລະ ຊຸກຍູ້ການຊື້-ຂາຍເງິນຕາຜ່ານລະບົບເອເລັກໂຕຣນິກ (LFX).
ປະລິມານເງິນ M2: ຂະຫຍາຍຕົວໃນລະດັບ 15.92%.
ຄັງສຳຮອງເງິນຕາຕ່າງປະເທດ: ກຸ້ມການນຳເຂົ້າໄດ້ 5.17 ເດືອນ (ສູງກວ່າແຜນການທີ່ກຳນົດໄວ້ຢ່າງໜ້ອຍ 5 ເດືອນ) ສາມາດຮອງຮັບການຊຳລະໜີ້ສິນຕ່າງປະເທດໄດ້ດີ.
ໜີ້ບໍ່ເກີດດອກອອກຜົນ (NPLs): ຄວບຄຸມໃຫ້ຢູ່ລະດັບຕ່ຳພຽງ 0.98%.
4. ອັດຕາເງິນເຟີ້: ສະເລ່ຍ 6 ເດືອນຕົ້ນປີ ຢູ່ໃນລະດັບ 8%.
ຄ່າເງິນກີບ: ມີສະຖຽນລະພາບ ໂດຍດັດສະນີເງິນກີບສະເລ່ຍອ່ອນຄ່າລົງພຽງ 3.09% ເມື່ອທຽບກັບໄລຍະດຽວກັນຂອງປີ 2025.
5. ວຽກງານປ້ອງກັນຊາດ-ປ້ອງກັນຄວາມສະຫງົບ:
ສາມາດຮັກສາສະຖຽນລະພາບທາງການເມືອງ ແລະ ຄວາມເປັນລະບຽບຮຽບຮ້ອຍໃນສັງຄົມໄດ້ຢ່າງເຂັ້ມງວດ, ໂດຍມີຜົນງານການປາບປາມປະກົດການຫຍໍ້ທໍ້ທີ່ສຳຄັນ:
ບັນຫາຢາເສບຕິດ: ມ້າງຄະດີໄດ້ 1,700 ກວ່າເລື່ອງ, ກັກຕົວຜູ້ຕ້ອງຫາ 4,025 ຄົນ ພ້ອມຢຶດຂອງກາງ ແລະ ພາຫະນະໄດ້ເປັນຈຳນວນຫຼວງຫຼາຍ.
ອາຊະຍາກຳທາງໄຊເບີ (ແກ້ງຄໍເຊັນເຕີ/ສໍ້ໂກງອອນລາຍ): ມ້າງໄດ້ທັງໝົດ 44 ຄັ້ງ, ກັກຕົວຜູ້ຕ້ອງຫາໄດ້ 4,400 ກວ່າຄົນ (ຍິງ 1,032 ຄົນ) ລວມທັງໝົດ 25 ສັນຊາດ.
ທີ່ມາ: ຄວາມສະຫງົບ
Lao Youth Radio FM90MHz
