ນະຄອນຫຼວງວຽງຈັນ, ວັນທີ 14 ກັນຍາ 2026 ຢູ່ທີ່ ກະຊວງແຮງງານ ແລະ ສະຫວັດດີການສັງຄົມ ໄດ້ມີພິທີມອບ-ຮັບ ເງິນຊ່ວຍເຫຼືອມະນຸດສະທຳສຸກເສີນ ເພື່ອຊ່ວຍເຫຼືອປະຊາຊົນຜູ້ທີ່ໄດ້ຮັບຜົນກະທົບຈາກໄພພິບັດນ້ຳຖ້ວມ ຢູ່ບັນດາແຂວງພາກເໜືອ ຂອງ ສປປ ລາວ.
ຕາງໜ້າສະຖານທູດ ຈີນ ໂດຍແມ່ນ ສະຫາຍ ນາງ ຟາງຫົງ, ເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງ ສປ ຈີນ ປະຈຳ ສປປ ລາວ ໄດ້ມອບເງິນຊ່ວຍເຫຼືອ ມູນຄ່າ 20,000 ໂດລາສະຫະລັດ ແລະ ຕາງໜ້າໃຫ້ ລັດຖະບານ ແຫ່ງ ສປປ ລາວ ກ່າວຮັບໂດຍ ສະຫາຍ ໂພໄຊ ໄຊຍະສອນ, ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ, ຮອງປະທານຜູ້ປະຈຳການ ຄະນະກຳມະການຄຸ້ມຄອງໄພພິບັດຂັ້ນສູນກາງ ພ້ອມຄະນະເຂົ້າຮ່ວມເປັນສັກຂີພິທີ.
ໂອກາດນີ້, ສະຫາຍ ນາງ ຟາງຫົງ ໄດ້ສະແດງຄວາມເຫັນອົກເຫັນໃຈ ແລະ ຄວາມຫ່ວງໃຍຢ່າງເລິກເຊິ່ງ ເຖິງປະຊາຊົນລາວ ຢູ່ບັນດາແຂວງພາກເໜືອ ທີ່ໄດ້ຮັບຜົນກະທົບຢ່າງໜັກໜ່ວງຈາກໄພທຳມະຊາດນ້ຳຖ້ວມ.
ສະຫາຍ ທູດ ໄດ້ສະແດງເຖິງມິດຕະພາບ ຈີນ – ລາວ , ລາວ-ຈີນ ເປັນມິດສະຫາຍ ແລະ ຫຸ້ນສ່ວນ ຍຸດທະສາດ ທີ່ມີຊະຕາກຳຮ່ວມກັນ, ເພື່ອນມິດສະຫາຍ ປະສົບຄວາມຍຸ້ງຍາກ, ຈີນ ພ້ອມທີ່ຈະຢູ່ຄຽງຂ້າງ ແລະ ໃຫ້ການຊ່ວຍເຫຼືອຢ່າງສຸດອົກສຸດໃຈ ເພື່ອໃຫ້ປະຊາຊົນລາວ ທີ່ປະສົບໄພ ສາມາດຟື້ນຟູຊີວິດການເປັນຢູ່ ແລະ ກັບຄືນสู่ສະພາບປົກກະຕິໄດ້ໂດຍໄວ.
ພ້ອມນີ້, ສະຫາຍ ໂພໄຊ ໄຊຍະສອນ ໄດ້ສະແດງຄວາມຂອບໃຈຢ່າງຈິງໃຈ ແລະ ຮູ້ບຸນຄຸນຢ່າງເລິກເຊິ່ງ ຕໍ່ກັບລັດຖະບານ ແລະ ປະຊາຊົນຈີນ ທີ່ໄດ້ໃຫ້ການຊ່ວຍເຫຼືອຢ່າງທັນການ. ການຊ່ວຍເຫຼືອໃນຄັ້ງນີ້ ບໍ່ພຽງແຕ່ເປັນການບັນເທົາທຸກໃຫ້ກັບຜູ້ປະສົບໄພທຳມະຊາດເທົ່ານັ້ນ, ແຕ່ຍັງເປັນການສ່ອງແສງໃຫ້ເຫັນເຖິງ ມາຍາຈິດມິດພາບ ອັນອົບອຸ່ນ ແລະ ຄວາມຮັກແພງ ແບບ “ສະຫາຍ ແລະ ເພື່ອນມິດ” ລະຫວ່າງ ສອງຊາດ ລາວ-ຈີນ ຢ່າງແທ້ຈິງ.
ກະຊວງແຮງງານ ແລະ ສະຫວັດດີການສັງຄົມ ຈະນຳໃຊ້ເງິນຊ່ວຍເຫຼືອດັ່ງກ່າວ ເຂົ້າໃນການຈັດຊື້ເຄື່ອງອຸປະໂພກ-ບໍລິໂພກ, ຢາປົວໂລກ ແລະ ການຟື້ນຟູພື້ນຖານໂຄງລ່າງທີ່ເສຍຫາຍ ໃຫ້ຮອດມືປະຊາຊົນຜູ້ທີ່ໄດ້ຮັບຄວາມເດືອດຮ້ອນ ຢູ່ແຂວງພາກເໜືອຢ່າງໂປ່ງໃສ ແລະ ໄວທັນກັບເວລາ.
ທີ່ມາ: ກະຊວງແຮງງານ ແລະ ສະຫວັດດີການສັງຄົມ
