ສູນບໍລິຫານລັດ ດີຈິຕອນ ກະຊວງເຕັກໂນໂລຊີ ແລະ ການສື່ສານ ຈັດສໍາມະນາກ່ຽວກັບ ລະບົບປັນຍາປະດິດລາວ (Lao AI) ໂດຍການເປັນປະທານຂອງ ທ່ານ ສັນຕິສຸກ ສິມມາລາວົງ ຮອງລັດຖະມົນຕີກະຊວງເຕັກໂນໂລຊີ ແລະ ການສື່ສານ, ມີຜູ້ຕາງໜ້າຈາກບັນດາກະຊວງ, ອົງການທຽບເທົ່າ, ມະຫາວິທະຍາໄລແຫ່ງຊາດ ແລະ ບັນດາບໍລິສັດ ເຂົ້າຮ່ວມ.
ການສໍາມະນາໃນຄັ້ງນີ້, ໄດ້ນໍາສະເໜີ ແລະ ລາຍງານຄວາມຄືບໜ້າການຄົ້ນຄວ້າ ແລະ ພັດທະນາ ລະບົບປັນຍາປະດິດລາວ ໃນຮູບແບບພາສາລາວ. ນອກນັ້ນ, ຍັງເປີດເວທີເພື່ອແລກປ່ຽນກັນລະຫວ່າງພາກລັດ ແລະ ບັນດາຜູ້ຊ່ຽວຊານ, ນັກຄົ້ນຄວ້າ ແລະ ບໍລິສັດເອກະຊົນທີ່ມີບົດຮຽນກ່ຽວກັບການນໍາໃຊ້ລະບົບປັນຍາປະດິດເຂົ້າໃນວຽກງານ, ການສ້າງວິໄສທັດກ່ຽວກັບການພັດທະນາ ແລະ ການນໍາໃຊ້ AI, ການກໍານົດທິດທາງ, ຍຸດທະສາດ ແລະ ແຜນງານໃນການສ້າງ ລະບົບ Lao AI ໃຫ້ມີຄວາມເຂັ້ມແຂງ ສາມາດຕອບສະໜອງຂໍ້ມູນໃຫ້ແກ່ຜູ້ຊົມໃຊ້ ໂດຍອີງໃສ່ຜົນປະໂຫຍດຂອງຊາດເປັນຫລັກ ແລະ ການຊຸກຍູ້ຮ່ວມມື ເພື່ອສ້າງເປັນເຄືອຂ່າຍ ແລະ ສາມາດຮ່ວມມືກັນໄດ້ທຸກພາກສ່ວນໃນການພັດທະນາ ລະບົບ Lao AI ໃນ ສປປ ລາວ ໃຫ້ກ້າວໄປທາງໜ້າໄດ້.
ການສ້າງລະບົບປັນຍາປະດິດລາວ “Lao AI” ບໍ່ແມ່ນການນໍາໃຊ້ເຕັກໂນໂລຊີພຽງເທົ່ານັ້ນ, ທັງເປັນການພັດທະນາລະບົບປັນຍາປະດິດທີ່ເຂົ້າໃຈ ແລະ ໂຕ້ຕອບໃນຮູບແບບພາສາລາວ, ຮຽນຮູ້ວັດທະນະທໍາຮີດຄອງປະເພນີຂອງຊາດລາວ, ເຂົ້າໃຈເນື້ອໃນ, ຊ່ວຍເຫລືອຄົນລາວໃນການພັດທະນາຕໍ່ຍອດ ແລະ ສ້າງມູນຄ່າເພີ່ມໃນການນໍາໃຊ້ລະບົບປັນຍາປະດິດ ໃຫ້ເກີດປະໂຫຍດອີກດ້ວຍ. ນອກຈາກນີ້, ການພັດທະນາລະບົບປັນຍາປະດິດລາວ ຍັງພັດທະນາຕາມຈຸດສຸມຂອງ ສປປ ລາວ ເພື່ອຊຸກຍູ້ ແລະ ສົ່ງເສີມໃນດ້ານຕ່າງໆເຊັ່ນ: ດ້ານກະສິກໍາ, ດ້ານສາທາ ລະນະສຸກ, ດ້ານການສຶກສາ, ດ້ານການທ່ອງທ່ຽວ ແລະ ການບໍລິການ ເຊິ່ງຍັງມີສິ່ງທ້າທາຍຫລາຍປະການ ໃນດ້ານການສ້າງບຸກຄະລາກອນ, ການພັດທະນາລະບົບພື້ນຖານໂຄງລ່າງ, ການສ້າງຖານຂໍ້ມູນພາສາລາວຂະໜາດໃຫຍ່ ແລະ ການວາງຂອບກົດໝາຍ-ຈັນຍາບັນໃນການນຳໃຊ້ AI ໃຫ້ມີຄຸນນະພາບ, ມີປະສິດທິພາບ-ປະສິດທິຜົນດີຍິ່ງຂຶ້ນ.
ທີ່ມາ: ຂ່າວສານປະເທດລາວ
