ວັນທີ 23 ກັນຍາຂອງທຸກໆປີ ແມ່ນ ວັນພາສາມືສາກົນ (International Day of Sign Languages) ເຊິ່ງອົງການສະຫະປະຊາຊາດ (UN) ໄດ້ຮັບຮອງວັນດັ່ງກ່າວຜ່ານມະຕິໃນປີ 2017 ໂດຍມີຈຸດປະສົງເພື່ອສ້າງຄວາມຮັບຮູ້ເຖິງຄວາມສຳຄັນຂອງພາສາມື ຕໍ່ການບັນລຸສິດທິມະນຸດຢ່າງເຕັມສ່ວນຂອງຄົນຫູໜວກ ແລະ ຍືນຍັນຄຸນຄ່າຂອງພາສາມືໃນຖານະສ່ວນໜຶ່ງຂອງຄວາມຫຼາກຫຼາຍທາງພາສາ ແລະ ວັດທະນະທຳ.
ການເລືອກວັນທີ 23 ກັນຍາ ເປັນວັນພາສາມືສາກົນ ເພາະວັນທີ 23 ກັນຍາ 1951 ແມ່ນວັນທີ່ ສະຫະພັນຄົນຫູໜວກໂລກ (World Federation of the Deaf – WFD) ຖືກກໍ່ຕັ້ງຂຶ້ນທີ່ນະຄອນໂຣມ ປະເທດອິຕາລີ ໂດຍມີຜູ້ແທນຈາກ 25 ປະເທດເຂົ້າຮ່ວມ.
ພາສາມືບໍ່ແມ່ນພຽງວິທີການສື່ສານດ້ວຍທ່າທາງ ແຕ່ເປັນພາສາທຳມະຊາດທີ່ມີໂຄງສ້າງ, ໄວຍາກອນ ແລະ ຄຳສັບຂອງຕົນເອງ ເຊິ່ງມີຄຸນສົມບັດທາງພາສາຄົບຖ້ວນຄືກັບພາສາເວົ້າ. ໃນໂລກມີພາສາມືແຫ່ງຊາດຫຼາຍກວ່າ 200 ພາສາ ແລະ ແຕ່ລະພາສາມີເອກະລັກດ້ານພາສາ ແລະ ວັດທະນະທຳຂອງຕົນ.
ວັນພາສາມືສາກົນຈຶ່ງເປັນໂອກາດໃຫ້ສັງຄົມຮ່ວມສ້າງຄວາມຕະໜັກຮູ້ເຖິງສິດທິດ້ານພາສາ ແລະ ການສື່ສານຂອງຄົນຫູໜວກ ພ້ອມທັງສົ່ງເສີມການໃຊ້ພາສາມືໃນການສຶກສາ, ການເຂົ້າເຖິງຂໍ້ມູນ, ການບໍລິການສາທາລະນະ ແລະ ການມີສ່ວນຮ່ວມໃນສັງຄົມ. WFD ເນັ້ນວ່າ ການຮັບຮູ້ ແລະ ການນຳໃຊ້ພາສາມືແຫ່ງຊາດ ແມ່ນສ່ວນສຳຄັນຕໍ່ການສ້າງສັງຄົມທີ່ຄົນຫູໜວກສາມາດເຂົ້າເຖິງ ແລະ ມີສ່ວນຮ່ວມຢ່າງເທົ່າທຽມ.
ສຳລັບປີ 2026, International Week of Deaf People ຈັດຂຶ້ນໃນວັນທີ 21–27 ກັນຍາ ພາຍໃຕ້ຫົວຂໍ້ “Declaring Deaf People’s Human Rights” ຫຼື “ການປະກາດຮັບຮອງສິດທິມະນຸດຂອງຄົນຫູໜວກ”. ສຳລັບວັນທີ 23 ກັນຍາ ເຊິ່ງເປັນ International Day of Sign Languages ກໍໃຊ້ຫົວຂໍ້ດຽວກັນ ໂດຍເນັ້ນການຮັບຮອງ ແລະ ນຳໃຊ້ສິດທິຂອງຄົນຫູໜວກຢ່າງເປັນຮູບປະທຳ.
ປີ 2026 ຍັງເປັນວາລະ ຄົບຮອບ 75 ປີ ຂອງ World Federation of the Deaf ແລະ 20 ປີ ຂອງອະນຸສັນຍາສະຫະປະຊາຊາດວ່າດ້ວຍສິດຄົນພິການ (CRPD). WFD ລະບຸວ່າ CRPD ໄດ້ຮັບຮອງສິດທິດ້ານພາສາມື ແລະ ການໃຊ້ພາສາມືແຫ່ງຊາດໃນຫຼາຍບົດບັນຍັດ.
ວັນພາສາມືສາກົນຈຶ່ງບໍ່ແມ່ນພຽງວັນສຳຄັນສຳລັບຄົນຫູໜວກ ແຕ່ເປັນວັນທີ່ຊ່ວຍສ້າງຄວາມຕະໜັກຮູ້ໃນສັງຄົມເຖິງຄວາມຫຼາກຫຼາຍດ້ານພາສາ, ສິດທິໃນການສື່ສານ ແລະ ສິດທິມະນຸດຂອງຄົນຫູໜວກ.
