ອົງການອາຫານ ແລະ ການກະເສດ ແຫ່ງສະຫະປະຊາຊາດ (FAO) ຮ່ວມກັບ ລັດຖະບານຍີ່ປຸ່ນ ແລະ ກະຊວງກະສິກຳ ແລະ ປ່າໄມ້ ໄດ້ປະກາດຄວາມສຳເລັດໃນການຈັດຕັ້ງປະຕິບັດ ໂຄງການສ້າງຄວາມເຂັ້ມແຂງໃນການດຳລົງຊີວິດຢູ່ເຂດຊົນນະບົດ (LRRA) ທີ່ສາມາດຫັນປ່ຽນຊີວິດການເປັນຢູ່ຂອງປະຊາຊົນໃນ 48 ໝູ່ບ້ານ ໃຫ້ດີຂຶ້ນຢ່າງເຫັນໄດ້ຊັດ.
ໂຄງການດັ່ງກ່າວໄດ້ສຸມໃສ່ການຍົກລະດັບຄວາມສາມາດໃນການຜະລິດກະສິກຳ ແລະ ການເຂົ້າເຖິງຕະຫຼາດ ໂດຍມີຕົວເລກຄວາມສຳເລັດດັ່ງນີ້:
• ລະບົບຊົນລະປະທານຂະໜາດນ້ອຍ: ກໍ່ສ້າງ ແລະ ຟື້ນຟູສຳເລັດ 31 ແຫ່ງ, ຊ່ວຍໃຫ້ຊາວກະສິກອນສາມາດເຮັດນາໄດ້ທັງລະດູຝົນ ແລະ ລະດູແລ້ງ.
• ເສັ້ນທາງຄົມນາຄົມ: ປັບປຸງເສັ້ນທາງໃນຊົນນະບົດ 17 ແຫ່ງ, ເພື່ອອຳນວຍຄວາມສະດວກໃນການຂົນສົ່ງຜົນຜະລິດອອກສູ່ຕະຫຼາດ.
• ລາຍໄດ້ໂດຍກົງ: ຫຼາຍກວ່າ 1,150 ຄົວເຮືອນ ມີລາຍໄດ້ເສີມຈາກກິດຈະກຳ “ແຮງງານແລກເງິນສົດ” (Cash-for-Work) ໃນໄລຍະການກໍ່ສ້າງ.
ໃນໂອກາດນີ້, ທ່ານ ສຶໂຕມຸ ໂຄອິຊຶມິ (Tsutomu Koizumi), ເອກອັກຄະລັດຖະທູດຍີ່ປຸ່ນ ປະຈຳ ສປປ ລາວ ພ້ອມດ້ວຍ ທ່ານນາງ ຄຽງມີ ກິມ (Kyung-Mee Kim), ຜູ້ຕາງໜ້າອົງການ FAO ແລະ ທ່ານ ດຣ. ບຸນເດດ ສຸດທະວິໄລ, ຫົວໜ້າກົມແຜນການ ແລະ ການຮ່ວມມື (ກປ) ໄດ້ລົງຢ້ຽມຢາມພື້ນທີ່ຕົວຈິງຢູ່ ເມືອງແບ່ງ ແຂວງອຸດົມໄຊ ເພື່ອຕິດຕາມການນຳໃຊ້ລະບົບຊົນລະປະທານ ແລະ ພົບປະກັບຊາວກະສິກອນທີ່ໄດ້ຮັບຜົນປະໂຫຍດ.
”ການລົງທຶນໃນຊົນລະປະທານ ແລະ ໂຄງລ່າງພື້ນຖານ ແມ່ນວິທີທີ່ກົງຈຸດທີ່ສຸດໃນການຫຼຸດຜ່ອນຄວາມທຸກຍາກ ແລະ ສ້າງຄວາມຢືນຢົງຕໍ່ກັບໄພທຳມະຊາດ” ທ່ານເອກອັກຄະລັດຖະທູດຍີ່ປຸ່ນ ກ່າວ.
ນອກຈາກສິ່ງກໍ່ສ້າງແລ້ວ, ໂຄງການຍັງໄດ້ສ້າງຮາກຖານດ້ານຄວາມຮູ້ໂດຍ:
• ໂຮງຮຽນຊາວນາ: ຝຶກອົບຮົມເຕັກນິກການກະເສດທີ່ທັນກັບສະພາບພູມອາກາດ (Climate-Smart Agriculture).
• ກຸ່ມຜູ້ຊົມໃຊ້ນ້ຳ: ສ້າງຕັ້ງກຸ່ມບໍລິຫານຈັດການນ້ຳ 20 ກຸ່ມ ເພື່ອຮັບປະກັນການນຳໃຊ້ທີ່ຍືນຍົງ.
• ສູນລວມຜົນຜະລິດ: ສ້າງຕັ້ງສູນລວບລວມຜົນຜະລິດ 2 ແຫ່ງ ເພື່ອຍົກສູງມູນຄ່າການຂາຍ.
ໂຄງການສ້າງຄວາມເຂັ້ມແຂງໃນການດຳລົງຊີວິດຢູ່ເຂດຊົນນະບົດ (LRRA) ເລີ່ມຈັດຕັ້ງປະຕິບັດຕັ້ງແຕ່ເດືອນພະຈິກ 2023 ໂດຍໄດ້ຮັບການສະໜັບສະໜູນງົບປະມານຈາກລັດຖະບານຍີ່ປຸ່ນ ເພື່ອແນໃສ່ຊ່ວຍເຫຼືອຊຸມຊົນທີ່ໄດ້ຮັບຜົນກະທົບຈາກການປ່ຽນແປງຂອງສະພາບພູມອາກາດ ແລະ ສ້າງຄວາມໝັ້ນຄົງທາງດ້ານອາຫານໃນໄລຍະຍາວ.
ຂໍ້ມູນຈາກ: FAO in LaoPDR
