ຖືເປັນການເຄື່ອນໄຫວຄັ້ງໃຫຍ່ລະດັບໂລກ ເມື່ອລັດຖະບານອິນໂດເນເຊຍປະກາດມາດຕະການທີ່ເຂັ້ມງວດທີ່ສຸດ ເພື່ອປົກປ້ອງເຍົາວະຊົນຈາກໄພອອນລາຍ ໂດຍການສັ່ງລະງັບບັນຊີໂຊຊຽວມີເດຍທຸກປະເພດຂອງເດັກທີ່ມີອາຍຸຕ່ຳກວ່າ 16 ປີ ເຊິ່ງຈະມີຜົນບັງຄັບໃຊ້ຢ່າງເປັນທາງການໃນວັນທີ 28 ມີນາ 2026 ນີ້ແລ້ວ.
ແພລດຟອມໃດແດ່ທີ່ຈະຖືກ “ປິດ”?
ທ່ານນາງ ມຸດຍາ ຮາຟິດ (Meutya Hafid) ລັດຖະມົນຕີກະຊວງການສື່ສານ ແລະ ດິຈິຕອນ ລະບຸລາຍຊື່ແອັບຍອດຮິດທີ່ໄວລຸ້ນມັກຫຼິ້ນ ເຊິ່ງມີຄວາມສ່ຽງສູງ ແລະ ຈະຖືກລະງັບບັນຊີຂອງເດັກນ້ອຍ ມີດັ່ງນີ້:
1. YouTube, TikTok
2. Facebook, Instagram, Threads, X
3. Roblox, Bigo Live
ເປັນຫຍັງຕ້ອງ “ແບນ” ໃຫ້ເດັດຂາດ?
ລັດຖະບານອິນໂດເນເຊຍໃຫ້ເຫດຜົນວ່າ ເດັກນ້ອຍໃນປັດຈຸບັນພວມປະເຊີນກັບໄພຄຸກຄາມທີ່ຮຸນແຮງຂຶ້ນທຸກມື້:
1. ສື່ລາມົກອານາຈານ: ຂໍ້ມູນຈາກ Unicef ພົບວ່າເດັກເກືອບເຄິ່ງໜຶ່ງເຄີຍເຫັນສື່ລາມົກທາງອອນລາຍ.
2. ການກັ່ນແກ້ງ (Cyberbullying): ເຮັດໃຫ້ເກີດບັນຫາທາງສຸຂະພາບຈິດ.
3. ການຫຼອກລວງອອນລາຍ: ທີ່ນັບມື້ນັບແນບນຽນ.
4. ບັນຫາການຕິດໂຊຊຽວ: ເຊິ່ງເປັນສິ່ງທີ່ໜ້າກັງວົນທີ່ສຸດໃນຍຸກນີ້.
“ລັດຖະບານກຳລັງກ້າວເຂົ້າມາຊ່ວຍເຫຼືອ ເພື່ອບໍ່ໃຫ້ພໍ່ແມ່ຕ້ອງຕໍ່ສູ້ກັບບໍລິສັດຍັກໃຫຍ່ທີ່ຂັບເຄື່ອນດ້ວຍ Algorithm ພຽງລຳພັງອີກຕໍ່ໄປ” ທ່ານນາງ ມຸດຍາ ຮາຟິດ ກ່າວ.
ເທຣນຂອງໂລກ: ຄວາມປອດໄພມາກ່ອນເສລີພາບ?
ອິນໂດເນເຊຍ ຖືເປັນປະເທດທຳອິດນອກກຸ່ມປະເທດຕາເວັນຕົກ ທີ່ກ້າໃຊ້ມາດຕະການນີ້ ຕາມຫຼັງ ອົດສະຕຣາລີ ທີ່ໄດ້ເລີ່ມໃຊ້ໄປແລ້ວໃນເດືອນທັນວາທີ່ຜ່ານມາ. ນອກຈາກນີ້, ບັນດາປະເທດໃນຢູໂຣບເຊັ່ນ: ຝຣັ່ງ, ດານມາກ ແລະ ອັງກິດ ກໍກຳລັງພິຈາລະນາກົດໝາຍໃນລັກສະນະດຽວກັນ.
ທີ່ມາ: TNN Tech
