ໃນວັນທີ 28 ກັນຍາ 2025 ເວລາ 22:30 ໂມງ, ເຈົ້າໜ້າທີ່ພາສີພະແນກສືບສວນ-ສອບສວນ ແລະ ປາບປາມການຄ້າຂາຍເຖື່ອນ, ເຈົ້າໜ້າທີ່ພາສີ ປະຈໍາດ່ານພາສີສາກົນສະໜາມບິນວັດໄຕ ແລະ ເຈົ້າໜ້າທີ່ຕໍາຫຼວດກວດຄົນເຂົ້າ-ອອກເມືອງ ແລະ ພາກສ່ວນເອັກສະເລຂອງສະໜາມບິນວັດໄຕອາຄານສາກົນ, ໄດ້ພ້ອມກັນການກວດກາກະເປົາເດີນທາງຂອງຄົນສັນຊາດ ສ ເກົາຫຼີ ອາຍຸ 21 ປີ, ທີ່ສົງໃສວ່າມີສານເສບຕິດທີ່ສະໝາມບິນສາກົນວັດໄຕ.

ຜ່ານການກວດກາພົບເຫັນ ຢາເສບຕິດ (ປະເພດເຄຕາມີນ) ນໍ້າໝັກ 457 ກຣາມ; ພ້ອມຫຸ້ມຫໍ່ໄດ້ຊຸກເຊື່ອງໃສ່ໃນກະເປົາເດີນທາງທີ່ຈະເດີນທາງອອກໄປປະເທດ ສ ເກົາຫຼີ. ດັ່ງນັ້ນ, ເຈົ້າໜ້າທີ່ພາສີຈຶ່ງໄດ້ສືບສວນ-ສອບສວນ ເອົາຄໍາໃຫ້ການເບື້ອງຕົ້ນພ້ອມເຮັດບົດບັນທຶກຢຶດຂອງກາງແລ້ວສົ່ງມອບຄະດີດັ່ງກ່າວຂອງກາງພ້ອມຜູ້ຖືກຫາ ມອບໃຫ້ເຈົ້າໜ້າທີ່ ຕໍາຫຼວດ ກົມຕຳຫຼວດສະກັດກັ້ນ ແລະ ຕ້ານຢາເສບຕິດ (303) ເພື່ອນໍາໄປດໍາເນີນຄະດີຕາມຂະບວນການຍຸຕິທໍາ.

ທີ່ມາ: ກະຊວງການເງິນ

ນະຄອນຫຼວງວຽງຈັນ, ສປປ ລາວ (30 ກັນຍາ 2025) — ທະນາຄານພັດທະນາ ອາຊີ ຫຼື ADB ລາຍງານໃຫ້ຮູ້ວ່າ ຂະແໜງການບໍລິການ ຍັງຄົງເປັນຕົວຂັບເຄື່ອນຫຼັກຂອງການເຕີບໂຕ ຢູ່ ສປປ ລາວ ສໍາລັບປີ 2025, ໂດຍຄາດວ່າຂະແໜງດັ່ງກ່າວຈະຂະຫຍາຍຕົວ 4.5%, ອີງຕາມລາຍງານສະບັບໃໝ່ຂອງ Asian Development Bank (ADB).

ຂະແໜງການທ່ອງທ່ຽວໄດ້ຟື້ນຕົວຢ່າງແຂງແຮງ ດ້ວຍຈໍານວນນັກທ່ອງທ່ຽວ 2.3 ລ້ານຄົນໃນໄລຍະເຄຶ່ງປີທໍາອິດ, ສະທ້ອນເຖິງການເຊື່ອມຕໍ່ພາກພື້ນທີ່ດີຂຶ້ນ ແລະ ການຕະຫຼາດທີ່ມີເປົ້າໝາຍ. ການທ່ອງທ່ຽວໄດ້ຊຸກດັນການຄ້າປີກ, ການບໍລິການທີ່ພັກ, ແລະ ການຂົນສົ່ງ.

ຂະແໜງອຸດສາຫະກໍາຂອງ ສປປ ລາວ ຄາດວ່າຈະເຕີບໂຕ 3.6% ໃນປີ 2025, ໂດຍໄດ້ຮັບການສະໜັບສະໜູນຈາກຜົນກໍາໄລໃນຂະແໜງພະລັງງານ ແລະ ການຜະລິດ, ອີງຕາມລາຍງານ Asian Development Outlook (ADO) September 2025 ທີ່ເປັນລາຍງານຫຼັກຂອງ ADB.

ການຜະລິດໄຟຟ້າເພີ່ມຂຶ້ນ 3.2% ໃນໄລຍະເຄຶ່ງປີທໍາອິດ ຂອງປີ 2025 ແລະ ຄາດວ່າຈະຂະຫຍາຍຕົວ 6.5% ສໍາລັບປີນີ້.

ຂະແໜງກະສິກໍາຄາດວ່າຈະຂະຫຍາຍຕົວເລັກນ້ອຍ 1.3% ໃນປີ 2025, ໄດ້ຮັບການສະໜັບສະໜູນຈາກສະພາບອາກາດທີ່ເອື້ອອໍານວຍ.

ADB ໄດ້ປັບປຸງການຄາດຄະເນການເຕີບໂຕ ແລະ ອັດຕາເງິນເຟີ້ສໍາລັບປີ 2025 ເນື່ອງຈາກສິ່ງທ້າທາຍທາງດ້ານເສດຖະກິດທີ່ຍັງດໍາເນີນຢູ່ ແລະ ແຮງກົດດັນດ້ານເງິນເຟີ້ທີ່ຫຼຸດລົງ. ໃນຂະນະທີ່ການຫຼຸດລົງຂອງເງິນເຟີ້ ບັນເທົາບາງຢ່າງ, ຄວາມເຄັ່ງຕຶງທາງດ້ານການຄ້າ ແລະ ຂໍ້ຈໍາກັດດ້ານງົບປະມານອາດຈະເຮັດໃຫ້ການຟື້ນຕົວຊ້າລົງຫຼາຍກວ່າທີ່ຄາດໄວ້. ການຄາດຄະເນການເຕີບໂຕສໍາລັບ ສປປ ລາວ ໄດ້ຖືກປັບລົງເປັນ 3.7% ສໍາລັບປີ 2025 ແລະ 3.8% ສໍາລັບປີ 2026, ຕົ້ນຕໍແມ່ນເນື່ອງຈາກຄວາມອ່ອນແອດ້ານໜີ້ສິນ, ຄວາມຕ້ອງການທີ່ຫຼຸດລົງ, ແລະ ພາສີສີນຄ້າ.

“ເຖິງວ່າຈະມີສິ່ງທ້າທາຍ, ADB ມີຄວາມໝັ້ນໃຈກ່ຽວກັບທ່າແຮງການເຕີບໂຕຂອງ ສປປ ລາວ. ຄວາມພະຍາຍາມຂອງລັດຖະບານໃນການຄຸ້ມຄອງໜີ້ສິນ ແລະ ສ້າງສະຖຽນລະພາບເສດຖະກິດແມ່ນສົມຄວນໄດ້ຮັບການຍ້ອງຍໍ. ADB ຈະສືບຕໍ່ສະໜັບສະໜູນ ສປປ ລາວ ໃນການບັນລຸການພັດທະນາແບບຍືນຍົງ,” ນາງ Shanny Campbell, ຜູ້ອໍານວຍການປະຈໍາປະເທດຂອງ ADB ປະຈໍາ ສປປ ລາວ ກ່າວ.

ການເກັບລາຍຮັບມີການປັບປຸງ, ບັນລຸໄດ້ 93% ຂອງເປົ້າໝາຍໃນເຄຶ່ງປີທໍາອິດ. ແຮງກົດດັນດ້ານເງິນເຟີ້ໄດ້ຫຼຸດລົງຢ່າງຫຼວງຫຼາຍໃນປີ 2025, ໂດຍເງິນເຟີ້ຫຼຸດລົງເປັນ 5.0% ໃນເດືອນສິງຫາ ຈາກ 11.1% ໃນເດືອນເມສາ. ເງິນເຟີ້ດ້ານອາຫານຫຼຸດລົງຢ່າງຫຼວງຫຼາຍເປັນ 3.1% ຈາກ 24.3% ໃນເດືອນສິງຫາ 2024, ໃນຂະນະທີ່ເງິນເຟີ້ສິນຄ້າອື່ນ ທີ່ບໍ່ແມ່ນອາຫານຍັງຄົງສູງຢູ່.

ທະນາຄານ ແຫ່ງ ສປປ ລາວ ໄດ້ຫຼຸດອັດຕາດອກເບ້ຍນະໂຍບາຍຈາກ 10% ໃນເດືອນມີນາ ເປັນ 9.0% ໃນເດືອນສິງຫາ, ເປັນການຫຼຸດລົງຄັ້ງທີສາມຂອງປີນີ້. ອັດຕາແລກປ່ຽນມີຄວາມໝັ້ນຄົງ, ໂດຍເງິນກີບແຂງຄ່າຂຶ້ນ 0.5% ທຽບກັບໂດລາສະຫະລັດ ໃນຂະນະທີ່ອ່ອນຄ່າລົງ 6.0% ທຽບກັບເງິນບາດໄທ. ທຶນສໍາຮອງຕ່າງປະເທດເພີ່ມຂຶ້ນເປັນ 2.7 ຕື້ໂດລາ ໃນເດືອນສິງຫາ 2025 ຈາກ 2.1 ຕື້ໂດລາ ໃນເດືອນທັນວາ 2024, ໃຫ້ການຄຸ້ມຄອງການນໍາເຂົ້າໄດ້ 3.1 ເດືອນ.

ADB ແມ່ນທະນາຄານພັດທະນາຫຼາຍຝ່າຍຊັ້ນນໍາທີ່ສະໜັບສະໜູນການເຕີບໂຕແບບລວມທຸກຄົນ, ທົນທານ ແລະ ຍືນຍົງໃນທົ່ວເອເຊຍ ແລະ ປາຊີຟິກ. ການເຮັດວຽກຮ່ວມກັບສະມາຊິກ ແລະ ຄູ່ຮ່ວມງານເພື່ອແກ້ໄຂສິ່ງທ້າທາຍທີ່ສັບສົນຮ່ວມກັນ, ADB ໃຊ້ເຄື່ອງມືການເງິນທີ່ມີນະວັດຕະກໍາ ແລະ ການຮ່ວມມືທາງຍຸດທະສາດເພື່ອປ່ຽນແປງຊີວິດ, ສ້າງໂຄງສ້າງພື້ນຖານທີ່ມີຄຸນນະພາບ, ແລະ ປົກປ້ອງໂລກຂອງພວກເຮົາ.

ປັດຈຸບັນແຂວງຄຳມ່ວນ ມີຄອບຄົວທຸກຍາກຫລຸດລົງຈາກ 21.256 ຄອບຄົວ ໃນປີ 2021 ຍັງເຫລືອ 11.553 ຄອບຄົວ ໃນປີ 2025, ມີຄອບຄົວພົ້ນທຸກ 73.380 ຄອບຄົວ, ຄອບຄົວພັດທະນາມີ 61.549 ຄອບຄົວ; ບ້ານພົ້ນທຸກ 480 ບ້ານ, ບ້ານທຸກຍາກຈາກ 232 ບ້ານ ຍັງເຫລືອ 90 ບ້ານ, ເມືອງພົ້ນທຸກເພີ່ມຂຶ້ນຈາກ 2 ເມືອງ ມາເປັນ 7 ເມືອງ, ຍັງເຫລືອເມືອງທຸກຍາກ 3 ເມືອງ.

ຕະຫລອດໄລຍະຜ່ານມາ ຄະນະພັກ-ຄະນະນໍາຂອງແຂວງ ໄດ້ເອົາໃຈໃສ່ຈັດຕັ້ງປະຕິບັດແຜນງານພັດທະນາຊົນນະບົດ ແລະ ແກ້ໄຂຄວາມທຸກຍາກ ໂດຍສະເພາະ ການແກ້ໄຂ ແລະ ປັບປຸງຊີວິດການເປັນຢູ່ຂອງປະຊາຊົນ ຢູ່ຊົນນະບົດ ໄດ້ຮັບການປົວແປງໃຫ້ດີຂຶ້ນຢ່າງຈະແຈ້ງ ເພື່ອບັນລຸຕາມມາດຕະຖານພົ້ນທຸກຕາມດໍາລັດ 348/ລບ ແລະ ບົດແນະນໍາ 0830 ກະຊວງກະສິກໍາ ແລະ ສິ່ງແວດລ້ອມ, ແຂວງໄດ້ຊອກຫາແຫລ່ງທຶນຈາກພາກສ່ວນຕ່າງໆ ທັງພາຍໃນ ແລະ ຕ່າງປະເທດ, ການມີສ່ວນຮ່ວມຢ່າງຕັ້ງໜ້າຂອງສັງຄົມ ອັນພົ້ນເດັ່ນແມ່ນອົງການປົກຄອງແຂວງ ໄດ້ຈັດສັນງົບປະມານເກີນແຜນຂອງແຂວງຫລາຍກວ່າ 78 ຕື້ກີບ ເຂົ້າໃນການພັດທະນາຊົນນະບົດ ແລະ ແກ້ໄຂຄວາມທຸກຍາກໂດຍກົງ ດ້ວຍການປັບປຸງ ແລະ ກໍ່ສ້າງພື້ນຖານໂຄງລ່າງ ຢູ່ເຂດຊົນນະບົດ ເປັນຕົ້ນ: ການກໍ່ສ້າງທາງ, ໂຮງຮຽນ, ສຸກສາລາ, ນໍ້າສະອາດ, ລະບົບຊົນລະປະທານ.

ນອກຈາກນີ້, ຍັງໄດ້ລົງທຶນເຂົ້າໃນການກໍ່ສ້າງທາງປູຢາງ 2 ຊັ້ນ ເຊື່ອມຕໍ່ ລະຫວ່າງເມືອງຕໍ່ເມືອງ ເຮັດໃຫ້ການພັດທະນາ ລະຫວ່າງຕົວເມືອງ ແລະ ຊົນນະບົດຫຍັບເຂົ້າໃກ້ກັນ.

ທີ່ມາ: ຂປລ

ໃນຍຸກປັດຈຸບັນ, ການເດີນທາງດ້ວຍລົດຍົນໄຟຟ້າກໍາລັງໄດ້ຮັບຄວາມນິຍົມຫຼາຍຂຶ້ນເລື້ອຍໆ ໃນ ສປປ ລາວ ດັ່ງນັ້ນ, “ສະຖານີສາກລົດໄຟຟ້າ” ຈຶ່ງກາຍເປັນຈຸດໝາຍສໍາຄັນທີ່ຄົນຂັບລົດ EV ຕ້ອງຮູ້ຈັກ!

“BlueDot Charger” ແມ່ນສະຖານີສາກລົດໄຟຟ້າ ທີ່ເປັນອີກໜຶ່ງທຸລະກິດສໍາຄັນຢູ່ໃນເຄື່ອຂອງ “ບໍລິສັດລາວທານີ” ເຊິ່ງເປັນບໍລິສັດຂະໜາດໃຫຍ່ໃນປະເທດ ເປັນຕົວແທນຈໍາໜ່າຍ ລົດຍົນຍີ່ຫໍ້ TOYOTA ທີ່ທຸກຄົນຮູ້ຈັກກັນດີໃນຊື່ “ໂຕໂຢຕ້າ ລາວທານີ” ແລະ ຍັງໄດ້ນໍາເຂົ້າລົດຍົນ ປະເພດອື່ນໆ. ນອກນີ້, ຍັງມີລົດກົນຈັກໜັກ ທີ່ຕອບໂຈດວຽກງານກະສິກໍາ, ກໍ່ສ້າງ ແລະ ຂຸດຄົ້ນບໍ່ແຮ່. ພ້ອມທັງ, ຍັງມີສິນຄ້າ ປະເພດອາໄຫຼ່ ແລະ ອຸປະກອນໃນສ່ວນຂອງ Aftermarket ທີ່ພ້ອມໃຫ້ບໍລິການ.

ຕາມທີ່ທຸກຄົນຮູ້, ພະລັງງານເຊື້ອໄຟເປັນສິ່ງສໍາຄັນໃນການເປັນຢູ່ ລວມເຖິງການຂົນສົ່ງ ແລະ ທົ່ວໂລກຫັນມາໃຫ້ຄວາມສໍາຄັນກັບພະລັງງານສະອາດ ທີ່ເປັນມິດຕໍ່ສິ່ງແວດລ້ອມ ແລະ ສາມາດຜະລິດໄດ້ພາຍໃນປະເທດ, ທາງພາກລັດເອງກໍໄດ້ມີການສົ່ງເສີມໃຫ້ມີການນໍາໃຊ້ລົດໄຟຟ້າຫຼາຍຂຶ້ນ ແລະ ໃນຈຸດນີ້ເອງ ລາວທານີ ເຫັນເຖິງຄວາມສໍາຄັນວ່າ ການນໍາໃຊ້ລົດໄຟຟ້າບໍ່ຄວນມີຂໍ້ຈໍາກັດ ໃນດ້ານການເດີນທາງ.

ດັ່ງນັ້ນ, ທາງ ລາວທານີ ຈຶ່ງໄດ້ສຶກສາຄວາມເປັນໄປໄດ້ໃນສະຖານີສາກຄວາມໄວສູງແບບຄົບວົງຈອນ ໂດຍເນັ້ນເຖິງຄວາມປອດໄພສູງສຸດຂອງລູກຄ້າ ແລະ ໃນປີ 2022 ຈຶ່ງໄດ້ລົງທຶນຂະຫຍາຍສະຖານີສາກລົດໄຟຟ້າ ພາຍໃຕ້ແບລນ “BlueDot Charger” ທີ່ມີເປົ້າໝາຍໃຫ້ BlueDot ເປັນຈຸດສີຟ້າ ທີ່ເຊື່ອມຕໍ່ທຸກການເດີນທາງ ເພື່ອໃຫ້ຄົນລາວ ແລະ ນັກທ່ອງທ່ຽວຕ່າງປະເທດ ທີ່ເດີນທາງດ້ວຍລົດໄຟຟ້າໄດ້ຢ່າງໜັ້ນໃຈ ເພາະ BlueDot ມີສະຖານີສາກທີ່ຄອບຄຸມຫຼາຍກວ່າ 40 ຈຸດ (ມີຫົວສາກຫຼາຍກວ່າ 120 ຫົວ) ແລະ ຍັງມີແຜນຂະຫຍາຍອີກ ເພື່ອໃຫ້ຄອບຄຸມທົ່ວປະເທດລາວ.

ຄຽງຄູ່ກັນນັ້ນ, ຍັງໄດ້ຍຶດໝັ້ນເອົາເລື່ອງຄຸນນະພາບຄວາມປອດໄພເປັນຫຼັກ ເພື່ອຫຼຸດຜ່ອນຄວາມສ່ຽງ ຂອງອັນຕະລາຍທີ່ອາດຈະເກີດຂຶ້ນກ່ຽວກັບລະບົບໄຟຟ້າ, ລາວທານີ ຈຶ່ງໄດ້ມີທີມງານທີ່ຜ່ານການຝຶກອົບຮົມຈາກຕ່າງປະເທດ ລວມເຖິງເຄື່ອງມືພິເສດໃນການກວດເຊັກຕູ້ສາກ ແບບ AC ແລະ DC ທີ່ມີພຽງ 2 ເຄື່ອງໃນປະເທດລາວ. ພ້ອມທັງຍັງມີທີມງານໃຫ້ຄໍາປຶກສາ ແລະ ແກ້ໄຂບັນຫາໃຫ້ລູກຄ້າ 24 ຊົ່ວໂມງ ເພື່ອສ້າງຄວາມໝັ້ນໃຈວ່າ ລູກຄ້າທຸກໆຄົນຈະໄດ້ຮັບການບໍລິການທີ່ດີທີສຸດ ຈາກ BlueDot ຫຼື ລາວທານີ ນັ້ນເອງ.

ສຳລັບຂໍ້ມູນເພີ່ມເຕີມຕິດຕໍ່ຫາ:
📞ເບີໂທລະສັບ: 020 5737 8222
☎️ 020 5738 8222
ເຟສບຸກເພຈ: Blue Dot Charger-ບຼູດອດ ຊາດເຈີ້

ທ່ານສາມາດດາວໂຫຼດແອັບພິເຄຊັ້ນເພື່ອເບິ່ງສະຖານີ EV Station Pluz Blue Dot ໄດ້ທີ່:
Android: Link
IOS: Link