ໃນວັນທີ 14 ຕຸລາ 2026 ທີ່ກົມພົວພັນຕ່າງປະເທດ ກອງທັບປະຊາຊົນຫວຽດນາມ ໄດ້ຈັດກອງປະຊຸມພົບປະ 3 ລັດຖະມົນຕີກະຊວງປ້ອງກັນປະເທດ ລາວ-ຫວຽດນາມ-ກຳປູເຈຍ ໂດຍມີ ສະຫາຍ ພົນເອກ ຄຳລຽງ ອຸທະໄກສອນ ຮອງນາຍົກລັດຖະມົນຕີ ແລະ ລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ, ສະຫາຍ ພົນເອກ ຟານ ວັນ ຢາງ ລັດຖະມົນຕີກະຊວງປ້ອງກັນປະເທດ ແຫ່ງ ສສ ຫວຽດນາມ ແລະ ສະຫາຍ ພົນເອກ ເຕຍ ໄຊຫາ ລັດຖະມົນຕີກະຊວງປ້ອງກັນປະເທດ ແຫ່ງຣາຊະອານາຈັກກຳປູເຈຍ ພ້ອມຄະນະທັງສາມຝ່າຍເຂົ້າຮ່ວມ.
ກອງປະຊຸມໄດ້ທົບທວນຜົນການຮ່ວມມືຜ່ານມາ ແລະ ເຫັນດີສືບຕໍ່ຮັດແໜ້ນສາຍພົວພັນມິດຕະພາບ, ຄວາມສາມັກຄີ ແລະ ການຮ່ວມມືລະຫວ່າງສາມກອງທັບ ໂດຍເນັ້ນການແລກປ່ຽນຂໍ້ມູນຂ່າວສານ, ການລາດຕະເວນຮ່ວມຕາມຊາຍແດນ, ການຝຶກຊ້ອມຮ່ວມກອບກູ້ໄພພິບັດ ແລະ ການແລກປ່ຽນນາຍທະຫານໜຸ່ມ.
ນອກຈາກນີ້ ສາມຝ່າຍຍັງເນັ້ນການປະສານງານເພື່ອສະກັດກັ້ນການເຂົ້າເມືອງຜິດກົດໝາຍ, ອາຊະຍາກຳຂ້າມຊາດ, ການຄ້າມະນຸດ, ການຄ້າເຖື່ອນ, ການລັກລອບຂົນສົ່ງຢາເສບຕິດ ແລະ ອາວຸດ ພ້ອມທັງສືບຕໍ່ຮ່ວມມືປົກປັກຮັກສາ ແລະ ບູລະນະຫຼັກໝາຍຊາຍແດນ ເພື່ອສ້າງເຂດຊາຍແດນໃຫ້ເປັນພື້ນທີ່ແຫ່ງສັນຕິພາບ, ມິດຕະພາບ ແລະ ການພັດທະນາ.
ໃນໂອກາດນີ້ ຝ່າຍລາວຍັງໄດ້ສະເໜີໃຫ້ສືບຕໍ່ຈັດກອງປະຊຸມ 3 ລັດຖະມົນຕີຢ່າງເປັນປົກກະຕິ, ຜັດປ່ຽນກັນເປັນເຈົ້າພາບ ແລະ ຂະຫຍາຍການຮ່ວມມືໃນປີ 2027. ພ້ອມນີ້ ສາມຝ່າຍໄດ້ເຊັນບົດບັນທຶກການຮ່ວມມືຊ່ວຍເຫຼືອເຊິ່ງກັນ ແລະ ກັນ ເພື່ອສືບຕໍ່ສົ່ງເສີມການປະສານງານໃນອະນາຄົດ.
ໃນວັນດຽວກັນ ສະຫາຍ ພົນເອກ ຄຳລຽງ ອຸທະໄກສອນ ພ້ອມຄະນະ ຍັງໄດ້ເຂົ້າຢ້ຽມຂໍ່ານັບ ສະຫາຍ ໂຕ ເລີມ ເລຂາທິການໃຫຍ່ ແລະ ປະທານປະເທດ ແຫ່ງ ສສ ຫວຽດນາມ ເນື່ອງໃນໂອກາດເຂົ້າຮ່ວມກອງປະຊຸມດັ່ງກ່າວ.
ທີ່ມາ: ໜັງສືພິມກອງທັບ
