ແຂວງບໍລິຄໍາໄຊ ຈັດພິທີຈູດທໍາລາຍຂອງກາງຢາເສບຕິດ ໃນວັນທີ 14 ຕຸລາ 2026 ທີ່ສູນບໍາບັດ ແລະ ຟື້ນຟູຜູ້ຕິດຢາເສບຕິດໜອງດົງ ເມືອງປາກກະດິງ ເນື່ອງໃນໂອກາດວັນແຫ່ງຊາດຕ້ານຢາເສບຕິດ ຄົບຮອບ 25 ປີ (12 ຕຸລາ 2001 – 12 ຕຸລາ 2026).
ທ່ານ ຄໍາແຫວນ ປັນຍານຸວົງ ປະທານຄະນະກໍາມະການປົກຄອງແຂວງ ໃຫ້ກຽດເຂົ້າຮ່ວມ ພ້ອມດ້ວຍຕາງໜ້າພາກສ່ວນຕ່າງໆ, ເຈົ້າໜ້າທີ່ ແລະ ນັກຮຽນ.
ທ່ານ ພົຈວ ກົງຈັນ ໄຊປັນຍາ ຫົວໜ້າກອງບັນຊາການ ປກສ ແຂວງ ລາຍງານວ່າ ໃນປີ 2026 ຂອງກາງທີ່ນໍາມາທໍາລາຍປະກອບມີ ຢາບ້າ 6,350,798 ເມັດ, ກັນຊາແຫ້ງ 3,194 ກິໂລກຣາມ, ຢາໄອສ໌ 45 ກິໂລກຣາມ, ຢາດີໄອ 67,266 ກວດ, ໃບກະທ່ອມ 2,059 ກິໂລກຣາມ, ນໍ້າກະທ່ອມ 360 ຕຸກ, ເຄຕາມິນ 1 ກິໂລກຣາມ, ຄໍລາເຈັນປະສົມສານເສບຕິດ 314 ຊອງ ແລະ ຢາສູບໄຟຟ້າ 163 ອັນ. ນອກນັ້ນ ຍັງມີສານເຄມີ ແລະ ວັດຖຸທີ່ລະບຸວ່າໃຊ້ໃນການຜະລິດຢາບ້າອີກຫຼາຍລາຍການ.
ໃນໄລຍະຜ່ານມາ ແຂວງບໍລິຄໍາໄຊຍັງພົບບັນຫາການລັກລອບຂົນສົ່ງຢາເສບຕິດ ແລະ ການປູກຝິ່ນ-ກັນຊາໃນເຂດພູດອຍ. ຜົນການດໍາເນີນຄະດີທີ່ສານຕັດສິນເຖິງທີ່ສຸດແລ້ວມີ 161 ເລື່ອງ ຜູ້ຕ້ອງໂທດ 211 ຄົນ.
ທາງການແຂວງຈະສືບຕໍ່ປະຕິບັດວາລະແຫ່ງຊາດຕ້ານຢາເສບຕິດ, ເພີ່ມການໂຄສະນາຜົນຮ້າຍຂອງຢາເສບຕິດ ແລະ ສົ່ງເສີມການສ້າງບ້ານ-ຄອບຄົວປອດຢາເສບຕິດ ໂດຍຮຽກຮ້ອງໃຫ້ທຸກພາກສ່ວນຮ່ວມມືປ້ອງກັນ ແລະ ແກ້ໄຂບັນຫາຢ່າງຕໍ່ເນື່ອງ.
ທີ່ມາ: ໜັງສືພິມບໍລິຄຳໄຊ
