ວັນທີ 13 ຕຸລາ 2026, ຄະນະກຳມະການເສດຖະກິດ ແລະ ການເງິນ ສະພາປະຊາຊົນແຂວງສະຫວັນນະເຂດ ນຳໂດຍທ່ານນາງ ແກ້ວວິໄລ ໂຄດສົມບັດ ຮອງປະທານຄະນະກຳມະການ ພ້ອມຄະນະ ໄດ້ລົງຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດບັນດາໂຄງການລົງທຶນຂອງລັດ ຢູ່ນະຄອນໄກສອນພົມວິຫານ.
ການລົງຕິດຕາມຄັ້ງນີ້ ມີທ່ານ ອານຸຊາ ໄກສອນ ຮອງປະທານຄະນະກຳມະການປົກຄອງນະຄອນ, ທ່ານນາງ ແກ້ວອຸດອນ ໄຊຍັນທອນ ສະມາຊິກສະພາປະຊາຊົນແຂວງ ແລະ ຕົວແທນຈາກພາກສ່ວນກ່ຽວຂ້ອງເຂົ້າຮ່ວມ.
2 ໂຄງການທາງສຳຄັນ ຄືບໜ້າສຳເລັດ
1. ໂຄງການກໍ່ສ້າງທາງເບຕົງເຂົ້າສູ່ພຣະທາດອີງຮັງ
ໂຄງການນີ້ມີລວງຍາວ 2,500 ແມັດ ໜ້າທາງກວ້າງ 9 ແມັດ ແລະ ຊ່ວງໜ້າວັດຍາວ 250 ແມັດ ກວ້າງ 14 ແມັດ. ມູນຄ່າການກໍ່ສ້າງຫຼາຍກວ່າ 19 ຕື້ກີບ ໂດຍໃຊ້ງົບປະມານເກີນແຜນຂອງແຂວງປີ 2025 ແລະ ເງິນຈາກກອງທຶນທ່ອງທ່ຽວແຂວງອີກຫຼາຍກວ່າ 1 ຕື້ກີບ.
ໂຄງການເລີ່ມກໍ່ສ້າງໃນປີ 2025 ໂດຍມີບໍລິສັດ ຈະເລີນສຸກກໍ່ສ້າງຂົວທາງ ແລະ ຊົນລະປະທານ ກຳຈັດ ເປັນຜູ້ຮັບເໝົາ. ຕາມລາຍງານ ປັດຈຸບັນໂຄງການສຳເລັດແລ້ວ 100%.
2. ໂຄງການກໍ່ສ້າງສ້ອມແປງທາງດິນແດງ ເລກທີ RR 6356
ເສັ້ນທາງນີ້ເລີ່ມແຕ່ແຍກທາງຫຼວງແຫ່ງຊາດເລກທີ 9 ບ້ານດົງບັງ ໄປຫາທາງຫຼວງແຫ່ງຊາດເລກທີ 11E ບ້ານບຶງທະເລ ນະຄອນໄກສອນພົມວິຫານ. ເສັ້ນທາງມີລວງຍາວ 12 ກິໂລແມັດ ໜ້າທາງກວ້າງ 7 ແມັດ ແລະ ໃຊ້ງົບປະມານລັດຫຼາຍກວ່າ 11 ຕື້ກີບ.
ໂຄງການນີ້ມີຄວາມສຳຄັນຕໍ່ການເຊື່ອມຕໍ່ແຫຼ່ງທ່ອງທ່ຽວດົງນາຕາດ ແລະ ພຣະທາດອີງຮັງ. ຕາມຂໍ້ມູນລາຍງານ ໜ້າວຽກສ່ວນໃຫຍ່ສຳເລັດແລ້ວ 100%.
ເນັ້ນຄຸນນະພາບ ແລະ ການໃຊ້ງົບປະມານຢ່າງຄຸ້ມຄ່າ
ໃນໂອກາດດັ່ງກ່າວ ທ່ານນາງ ແກ້ວວິໄລ ໂຄດສົມບັດ ໄດ້ເນັ້ນໃຫ້ອົງການປົກຄອງທ້ອງຖິ່ນ ແລະ ບໍລິສັດຜູ້ຮັບເໝົາ ເພີ່ມທະວີຄວາມຮັບຜິດຊອບ ຕິດຕາມກວດກາຢ່າງສະໝ່ຳສະເໝີ ແລະ ປະຕິບັດຕາມມາດຕະຖານເຕັກນິກຢ່າງເຄັ່ງຄັດ.
ທັງນີ້ ເພື່ອໃຫ້ງົບປະມານຂອງລັດທີ່ນຳມາລົງທຶນ ເກີດປະໂຫຍດສູງສຸດຕໍ່ສັງຄົມ ພ້ອມທັງຮັບປະກັນຄຸນນະພາບ ແລະ ຄວາມທົນທານຂອງເສັ້ນທາງໃນໄລຍະຍາວ.
ສະຫຼຸບ: ການລົງກວດກາຄັ້ງນີ້ເປັນການຕິດຕາມຜົນການດຳເນີນງານຂອງໂຄງການພັດທະນາທາງສຳຄັນ 2 ແຫ່ງ ຢູ່ນະຄອນໄກສອນພົມວິຫານ ເຊິ່ງມີບົດບາດຕໍ່ການເດີນທາງ ແລະ ການເຊື່ອມໂຍງແຫຼ່ງທ່ອງທ່ຽວຂອງແຂວງ.
ທີ່ມາ: ວິທະຍຸກະຈ່າຍສຽງ ສະຫວັນນະເຂດ
