ໃນວັນທີ 8 ຕຸລາ 2026 ຜູ້ນຳລັດຖະບານ ສປປ ລາວ ແລະ ສສ ຫວຽດນາມ ໄດ້ເຂົ້າຮ່ວມພິທີມອບ-ຮັບລະບົບຂໍ້ມູນພົນລະເມືອງ ແລະ ບັດປະຈຳຕົວດິຈິຕອນ ຢ່າງເປັນທາງການ ເພື່ອສະໜັບສະໜູນການພັດທະນາລະບົບບໍລິຫານຈັດການຂໍ້ມູນຂອງລາວໃຫ້ທັນສະໄໝ.
ການນຳໃຊ້ລະບົບຂໍ້ມູນພົນລະເມືອງ ແລະ ບັດປະຈຳຕົວດິຈິຕອນ ຖືເປັນອີກກ້າວສຳຄັນໃນການຜັກດັນແນວທາງລັດຖະບານດິຈິຕອນ, ເສດຖະກິດດິຈິຕອນ ແລະ ສັງຄົມດິຈິຕອນຂອງ ສປປ ລາວ ໃຫ້ເກີດເປັນຮູບປະທຳ ພ້ອມທັງຊ່ວຍຮອງຮັບການພັດທະນາປະເທດໃນຍຸກເຕັກໂນໂລຊີສະໄໝໃໝ່.
ໂຄງການດັ່ງກ່າວໄດ້ຮັບທຶນຊ່ວຍເຫຼືອຈາກລັດຖະບານຫວຽດນາມ ຜ່ານກະຊວງປ້ອງກັນຄວາມສະຫງົບ ເພື່ອສະໜັບສະໜູນລັດຖະບານລາວ ໃນການພັດທະນາລະບົບຂໍ້ມູນ ແລະ ການບໍລິຫານງານຂອງພາກລັດໃຫ້ມີປະສິດທິພາບຫຼາຍຂຶ້ນ.
ລະບົບດິຈິຕອນດັ່ງກ່າວອາດຊ່ວຍປັບປຸງການຈັດເກັບ ແລະ ຄຸ້ມຄອງຂໍ້ມູນພົນລະເມືອງ, ອຳນວຍຄວາມສະດວກໃນການຢືນຢັນຕົວຕົນ ແລະ ສົ່ງເສີມການໃຫ້ບໍລິການຂອງພາກລັດໃຫ້ວ່ອງໄວຂຶ້ນ. ນອກຈາກນີ້ ການຄຸ້ມຄອງຂໍ້ມູນສ່ວນບຸກຄົນ ແລະ ຄວາມປອດໄພທາງໄຊເບີ ກໍເປັນປັດໄຈສຳຄັນທີ່ຕ້ອງໄດ້ຮັບການເອົາໃຈໃສ່ ເພື່ອສ້າງຄວາມເຊື່ອໝັ້ນໃຫ້ແກ່ປະຊາຊົນ. 
ຄວາມຮ່ວມມືຄັ້ງນີ້ ສະທ້ອນເຖິງການສືບຕໍ່ຮ່ວມມືລະຫວ່າງລາວ ແລະ ຫວຽດນາມ ໃນດ້ານເຕັກໂນໂລຊີ ແລະ ການພັດທະນາລະບົບບໍລິຫານພາກລັດ ເພື່ອວາງຮາກຖານສູ່ອະນາຄົດດິຈິຕອນທີ່ທັນສະໄໝ.
ທີ່ມາ: ຄວາມສະຫງົບ
