𝐍𝐏𝐀 ຈະເລີ່ມຫຼຸດການປະຕິບັດງານຢູ່ ສປປ ລາວ ລົງ​ ເຊິ່ງສົ່ງຜົນກະທົບໃຫ້ພະນັກງານຫຼາຍກວ່າພັນຄົນ​

ອົງການເອັນພີເອ​ ໄດ້ແຈ້ງຜ່ານເພຈເຟດສະບຸກ “Norwegian People’s Aid Lao PDR” ໃຫ້ຊາບວ່າ: 𝐍𝐏𝐀 𝐭𝐨 𝐬𝐭𝐚𝐫𝐭 𝐫𝐞𝐝𝐮𝐜𝐢𝐧𝐠 𝐨𝐩𝐞𝐫𝐚𝐭𝐢𝐨𝐧𝐬 𝐢𝐧 𝐋𝐚𝐨 𝐏𝐃𝐑 ພວກເຮົາຈະເລີ່ມຫຼຸດການປະຕິບັດງານຂອງພວກເຮົາຢູ່ ສປປ ລາວ ລົງ​ ເຊິ່ງສົ່ງຜົນກະທົບໃຫ້ພະນັກງານທ້ອງຖິ່ນ ແລະ ພະນັກງານຕ່າງປະເທດຫຼາຍກວ່າ 1,000 ຄົນ​ ທີ່ບໍ່ໄດ້ໄປຕໍ່.

ສະຖານະການນີ້ບໍ່ໄດ້ມີຜົນເນື່ອງມາຈາກການປະຕິບັດງານ ຫຼື ພຶດຕິກຳຂອງພະນັກງານ ຫຼື ຄຸນນະພາບ, ຄວາມສຳຄັນ ແລະ ຜົນໄດ້ຮັບສູງຂອງການປະຕິບັດວຽກຢູ່ ສປປ ລາວ.

ຫ້ອງການໃຫຍ່ຂອງອົງການເອັນພີເອ ໄດ້ຕັດສິນໃຈວ່າ ອົງການເອັນເອພີບໍ່ສາມາດເຮັດສັນຍາໃໝ່ໃດໆຮ່ວມກັບລັດຖະບານສະຫະລັດອາເມລິກາໄດ້ ເນື່ອງຈາກເງື່ອນໄຂໃໝ່ຂອງທຶນຊ່ວຍເຫຼືອ ທີ່ປະກາດໃຊ້ຕົ້ນປີນີ້.

ອົງການເອັນພີເອເຮັດວຽກຮ່ວມກັບລັດຖະບານລາວ ແລະ ຊຸມຊົນທີ່ໄດ້ຮັບຜົນກະທົບຈາກລະເບີດບໍ່ທັນແຕກ ເພື່ອກວດກູ້ເນື້ອທີ່ດິນທີ່ມີການປົນເປື້ອນ, ໄດ້ທຳລາຍລະເບີດຢ່າງປອດໄພ, ເຮັດການໂຄສະນາຄວາມສ່ຽງໄພຈາກລະເບີດບໍ່ທັນແຕກ ແລະ ສະໜັບສະໜູນການເຂົ້າເຖິງພື້ນທີ່ດິນຢ່າງປອດໄພ. ພວກເຮົາພາກພູມໃຈເປັນຢ່າງຍິ່ງໃນຄວາມທຸ້ມເທ ແລະ ການເຮັດວຽກແບບມືອາຊີບຂອງພະນັກງານຄົນລາວຂອງພວກເຮົາທຸກໆຄົນ ເຊິ່ງຫຼາຍຄົນໄດ້ອຸທິດຕົນຕໍ່ວຽກງານນີ້ມາດົນຫຼາຍປີ.

ເຖິງຢ່າງໃດກໍ່ຕາມ, ອົງການເອັນພີເອຍັງຄົງມຸ່ງໝັ້ນທີ່ຈະສະໜັບສະໜູນບຸລິມະສິດທີ່ສໍາຄັນແຫ່ງຊາດໃນວຽກງານລະເບີດທີ່ບໍ່ທັນແຕກ (ລບຕ). ອົງການເອັນພີເອຄາດຫວັງວ່າຈະໄດ້ຮັບທຶນສະໜັບສະໜູນຢ່າງຕໍ່ເນື່ອງຈາກລັດຖະບານນອກແວໃນປີ 2027 ໂດຍມີເປົ້າໝາຍເພື່ອຮັກສາຂີດຄວາມສາມາດໃນການປະຕິບັດງານຂະໜາດນ້ອຍເພື່ອໃຫ້ມີປະສິດທິພາບ ແລະ ປະສິດທິຜົນໃນພາກໃຕ້ຂອງລາວ ໃນຂະນະດຽວກັນ ອົງການເອັນພີເອ​ ຍັງຄົງຈະສືບຕໍ່ຊອກຫາທຶນຊ່ວຍເຫຼືອ ຈາກຜູ້ໃຫ້ທຶນອື່ນຕໍ່ໄປ.

​ທີ່ມາ: Norwegian People’s Aid Lao PDR