ຫ້ອງການແຮງງານ ແລະ ສະຫວັດດີການສັງຄົມ ເມືອງນາຊາຍທອງ ໄດ້ອອກໜັງສືແຈ້ງການສະບັບເລກທີ 308/ຮສສມ.ນທ, ລົງວັນທີ 2 ພະຈິກ 2026 ເຖິງ: ຕາແສງ ໂພນທອງ, ຕາແສງອີ່ໄລ, ຕາແສງ ສີເກີດ, ບັນດາບ້ານພາຍໃນ ເມືອງນາຊາຍທອງ ນະຄອນຫຼວງວຽງຈັນ ຊາບວ່າ: ເມືອງຈູງຈຸ, ເມືອງອິມຊອງ, ແຂວງຊຸງຊອງບົກໂດ ແລະ ເມືອງມວນ, ແຂວງ ຈອນລານໍາໂດ ສ.ເກົາຫຼີ ຕ້ອງການໃຊ້ແຮງງານລາວ ຄູ່ຜົວເມຍ, ແຮງງານຍິງດ່ຽວ, ແຮງງານຊາຍດ່ຽວ ເປັນຈໍານວນຫຼາຍ ເພື່ອໄປເຮັດວຽກຕາມລະດູການໃນໄລຍະ 5 ເດືອນ ຢູ່ເມືອງດັ່ງກ່າວໃນປີ 2027.
– ສະນັ້ນ, ໃຜທີ່ມີຄວາມສົນໃຈທີ່ຢາກໄປເຮັດວຽກຕາມລະດູການ ຢູ່ປະເທດ ສ.ເກົາຫຼີ, ໃຫ້ມາລົງທະບຽນຢູ່ຫ້ອງການແຮງງານ ແລະ ສະຫວັດດີການສັງຄົມເມືອງນາຊາຍທອງ ນັບແຕ່ມື້ອອກແຈ້ງການສະບັບນີ້ ຈົນເຖິງ ວັນທີ 1/12/ 2026 ເພື່ອຈະໄດ້ກະກຽມເອກະສານເຂົ້າມາສໍາພາດໃຫ້ທັນຕາມກຳນົດເວລາ, ເຮັດໃຫ້ຂະບວນການຮັບສະໝັກ ແລະ ຄັດເລືອກແຮງງານມີຄວາມສະດວກໂປ່ງໃສ ແລະ ຖືກຕ້ອງຕາມລະບຽບການທີ່ກຳນົດໄວ້ ຫຼີກລ້ຽງບໍ່ໃຫ້ມີນາຍໜ້າເຂົ້າມາມີສ່ວນຮ່ວມໃນການຄັດເລືອກແຮງງານໃນຄັ້ງນີ້ຢ່າງເດັດຂາດ.
– ສໍາດັບ ວັນເວລາໃນການສໍາພາດ ແລະ ຄັດເລືອກແຮງານແມ່ນ:
– ວັນທີ 1/12/2026 ເວລາ 08:00ໂມງ-16:00 ໂມງ ຢູ່ສະໂມສອນປົກຄອງ ເມືອງນາຊາຍທອງ ນະຄອນຫຼວງວຽງຈັນ.
- ແບບຟອມການສະໝັກກົມຈັດຫາງານ ກະຊວງແຮງງານ ແລະ ສະຫວັດດີການສັງຄົມ ຈະກະກຽມ ມາແຈກຢາຍໃນມື້ລົງທະບຽນສໍາພາດ.
- ຄ່າລົງທະບຽນ, ຄ່າສະໝັກ ແລະ ຄັດເລືອກ ແມ່ນຈະບໍ່ໄດ້ເສຍຄ່າໃຊ້ຈ່າຍ
ເງື່ອນໄຂການສະໝັກ:
1. ເປັນພົນລະເມືອງລາວ ແລະ ອາໄສຢູ່ ເມືອງນາຊາຍທອງ ຢ່າງໜ້ອຍ 1 ປີ;
2. ເພດຊາຍ ແລະ ເພດຍິງ ອາຍຸ 25-40ປີ; (ສໍາລັບເພດຍິງ ແມ່ນບໍ່ຢູ່ໃນໄລຍະຖືພາ ແລະ ບໍ່ມີລູກນ້ອຍຕໍ່າກວ່າ 1 ປີ);
3. ເປັນຜູ້ທີ່ປະກອບອາຊີບ ໃນຂະແໜງກະສິກຳ ເຊັ່ນ: ເຮັດໄຮ່, ເຮັດນາ, ເຮັດສວນ ເປັນພື້ນຖານໃນການດໍາລົງຊີວິດ;
4. ມີສຸຂະພາບແຂງແຮງ, ຕາບໍ່ບອດສີ, ບໍ່ເປັນພະຍາດຕ້ອງຫ້າມ ເປັນຕົ້ນ: ໄວຣັດຕັບບີ, ພະຍາດຕິດຕໍ່ (ວັນນະໂລກ, ໂຄວິດ-19, ປອດແຫ້ງ) ແລະ ພະຍາດຕິດຕໍ່ທາງເພດສຳພັນ (ຊີຟີລິສ; ຜູ້ທີ່ໃຊ້ຢາເສບຕິດ);
5. ບໍ່ມີຄະດີ, ບໍ່ມີປະຫວັດຫ້າມເຂົ້າ-ອອກ ສ.ເກົາຫຼີ ຫຼື ບໍ່ຖືກການຈຳກັດການເດີນທາງອອກນອກປະເທດ;
6. ລວງສູງ 155 ຊັງຕີແມັດຂຶ້ນໄປ;
ເອກະສານປະກອບມີດັ່ງນີ້:
ໃນເວລາ ມາສໍາພາດຄັດເລືອກແຮງງານ ໃຫ້ແຮງງານຖືເອກະສານຈໍາເປັນມາພ້ອມດັ່ງນີ້:
1. ພາດສປອດ ຂອງແທ້ (ພ້ອມທັງກອບປີ້ 2 ຊຸດ).
2. ໃບຢັ້ງຢືນທີ່ຢູ່ 1 ສະບັບ.
3. ກອບປີ້ ສໍາມະໂນຄົວ 2 ສະບັບ.
4. ກອບປີ້ ບັດປະຈຳຕົວ 1 ສະບັບ.
5. ຮູບຂະໜາດ 3X4 ພື້ນຂາວ ຈໍານວນ 6 ໃບ (ຮູບຖ່າຍບໍ່ເກີນ 3 ເດືອນ ພື້ນຂາວ).
6. ຮູບຂະໜາດ 3,5X4,5 ຈໍານວນ 6 ໃບ (ຮູບຖ່າຍບໍ່ເກີນ 3 ເດືອນ ພື້ນຂາວ).
7. ຕ້ອງມີໃບຕາດິນເປັນໃບຂອບທອງ ມາພ້ອມໃນມື້ສໍາພາດ (ພ້ອມທັງກອບປີ້ 02 ຊຸດ).
8. ຖ່າຍຮູບຕອນດິນທີ່ເອົາມາຄໍ້າປະກັນພ້ອມໃນມື້ສໍາພາດ.
ສອບຖາມໂທ: ເບີໂທ: 020 54199281, 020 55333665.


