ກົມອຸຕຸນິຍົມ ແລະ ອຸທົກກະສາດ ອອກຄໍາເຕືອນລ່າສຸດໃຫ້ປະຊາຊົນທົ່ວ ສປປ ລາວ ເພີ່ມຄວາມລະມັດລະວັງສູງສຸດ ຫຼັງສະພາບອາກາດຍັງຄົງໄດ້ຮັບອິດທິພົນຈາກຮ່ອງຄວາມກົດອາກາດຕໍ່າ ປະສົມກັບລົມມໍລະສຸມຕາເວັນຕົກສ່ຽງໃຕ້ທີ່ມີກຳລັງແຮງ ສົ່ງຜົນໃຫ້ຫຼາຍແຂວງທົ່ວປະເທດມີຝົນຕົກໜັກ ພ້ອມຟ້າຮ້ອງ ຟ້າແຫລບ ແລະ ລົມແຮງ ໃນໄລຍະ 2–3 ມື້ຂ້າງໜ້າ.
ອຸຕຸນິຍົມລະບຸວ່າ ການມີຝົນຕົກຕໍ່ເນື່ອງຫຼາຍມື້ ເຮັດໃຫ້ດິນໃນຫຼາຍພື້ນທີ່ອີ່ມນ້ຳເກືອບຮອດຈຸດວິກິດ ເພີ່ມຄວາມສ່ຽງຕໍ່ການເກີດ ນ້ຳປ່າໄຫຼຊາກ, ດິນເຈື່ອນ ແລະ ນ້ຳຖ້ວມຊົ່ວຄາວ ໂດຍສະເພາະເຂດພູດອຍ, ຮ່ອມພູ ແລະ ພື້ນທີ່ຕິດລຳນ້ຳ.
ສະພາບອາກາດແຕ່ລະພາກ
ພາກເໜືອ: ແຂວງຜົ້ງສາລີ, ຫົວພັນ ແລະ ຊຽງຂວາງ ຈະມີຝົນຕົກປົກຄຸມ 40–50% ຂອງພື້ນທີ່ ພ້ອມຄວາມສ່ຽງຟ້າຜ່າ. ເຂດພູສູງເຊັ່ນ ເມືອງບຸນເໜືອ ອຸນຫະພູມຈະຫຼຸດລົງເຫຼືອປະມານ 16°C.
ຂະນະດຽວກັນ ອຸດົມໄຊ, ບໍ່ແກ້ວ, ຫຼວງນ້ຳທາ, ຫຼວງພະບາງ ແລະ ໄຊຍະບູລີ ຈະມີຝົນຕົກກະຈາຍເປັນບໍລິເວນກວ້າງ ອຸນຫະພູມສູງສຸດບໍ່ເກີນ 30°C.
ນະຄອນຫຼວງວຽງຈັນ ຈະມີອາກາດຮ້ອນອົບອ້າວ ອຸນຫະພູມສູງສຸດປະມານ 31°C ຊຶ່ງເປັນປັດໄຈເອື້ອຕໍ່ການເກີດຝົນຟ້າຄະນອງ.
ເຂດ ສີໂຄດຕະບອງ ມີໂອກາດຝົນຕົກສູງສຸດເຖິງ 60% ຂະນະທີ່ ປາກງື່ມ, ສັງທອງ ແລະ ໄຊທານີ ມີໂອກາດຝົນຟ້າຄະນອງປະມານ 50% ແລະ ອາດເກີດນ້ຳຖ້ວມຂັງໃນບາງຈຸດ.
ສ່ວນ ບໍລິຄຳໄຊ, ຄຳມ່ວນ ແລະ ສະຫວັນນະເຂດ ຈະມີຝົນຕົກປົກຄຸມຫຼາຍພື້ນທີ່ ຢູ່ໃນລະດັບ 50–60%.
ພາກໃຕ້: ແຂວງຈຳປາສັກ, ສາລະວັນ, ເຊກອງ ແລະ ອັດຕະປື ຍັງຈະມີຝົນຟ້າຄະນອງຕໍ່ເນື່ອງ ໂດຍນະຄອນປາກເຊມີໂອກາດຝົນຕົກປະມານ 50%.
ຂະນະທີ່ ເຂດພູພຽງບູລະເວນ ໂດຍສະເພາະ ປາກຊ່ອງ ແລະ ນິຄົມ 34 ຍັງຄົງມີອາກາດເຢັນ ອຸນຫະພູມຕ່ຳສຸດພຽງ 15–16°C ພ້ອມຝົນຕົກກວມເອົາສູງເຖິງ 60%.
ລະດັບຝົນທີ່ຄວນເຝົ້າລະວັງ
50.1–90 ມມ/24 ຊົ່ວໂມງ ມີຄວາມສ່ຽງເກີດນ້ຳຖ້ວມຂັງໃນເຂດຕົວເມືອງ ແລະ ຖະໜົນລື່ນ ຜູ້ໃຊ້ລົດໃຊ້ຖະໜົນຄວນຫຼຸດຄວາມໄວ.
ຫຼາຍກວ່າ 90 ມມ/24 ຊົ່ວໂມງ ຖືວ່າເປັນລະດັບອັນຕະລາຍ ມີໂອກາດເກີດນ້ຳປ່າໄຫຼ, ດິນເຈື່ອນ ແລະ ນ້ຳຖ້ວມ ຊຶ່ງອາດກະທົບຕໍ່ຊີວິດ, ຊັບສິນ ແລະ ເສັ້ນທາງຄົມມະນາຄົມ.
ຫຼີກລ້ຽງການເດີນທາງຜ່ານເຂດສ່ຽງນ້ຳປ່າ ແລະ ດິນເຈື່ອນ.
ຕິດຕາມປະກາດຈາກກົມອຸຕຸນິຍົມ ແລະ ໜ່ວຍງານທ້ອງຖິ່ນຢ່າງໃກ້ຊິດ.
ຜູ້ອາໄສຢູ່ເຂດພູດອຍ, ຕີນພູ ແລະ ແຄມນ້ຳ ຄວນກຽມແຜນຮັບມື ແລະ ພ້ອມອົບພະຍົບ ຫາກມີການແຈ້ງເຕືອນສຸກເສີນ.
ຂໍໃຫ້ປະຊາຊົນຢ່າປະໝາດ ເນື່ອງຈາກຝົນທີ່ຕົກສະສົມຫຼາຍມື້ ອາດເຮັດໃຫ້ເກີດນ້ຳປ່າໄຫລ ແລະ ດິນເຈື່ອນໄດ້ທຸກເວລາ ບາງພື້ນທີ່ຈະມີຝົນບໍ່ຫຼາຍກໍຕາມ.
