ໂຄງການປັບປຸງເສັ້ນທາງເລກ 13 ເໜືອ ຊ່ວງ ກມ 202–212 ຈາກບ້ານຈຽງ ຫາ ບ້ານວຽງແກ້ວ ເມືອງກາສີ ແຂວງວຽງຈັນ ຄວາມຍາວປະມານ 10 ກິໂລແມັດ ໄດ້ດຳເນີນການສຳເລັດ 100% ຕາມແຜນການ ແລະ ສຳເລັດກ່ອນກຳນົດ ໃນວັນທີ 30 ມິຖຸນາ 2026.
ທ່ານ ອາພິສິດ ພັນຕິສິລິ ວິຊາການປະຈຳສະໜາມ ສັງກັດຫ້ອງການໂຍທາທິການ ແລະ ຂົນສົ່ງ ເມືອງກາສີ ໃຫ້ຮູ້ວ່າ ໂຄງການໄດ້ດຳເນີນໄປຕາມແຜນທີ່ວາງໄວ້ ໂດຍບໍລິສັດຮັບເໝົາໄດ້ດຳເນີນສຳເລັດທຸກໜ້າວຽກຢ່າງຮຽບຮ້ອຍ ແລະ ບັນລຸຜົນສຳເລັດ 100%.
ໂຄງການນີ້ຊ່ວຍຍົກລະດັບສະພາບຖະໜົນໃຫ້ມີຄວາມປອດໄພ ແລະ ສະດວກສະບາຍຫຼາຍຂຶ້ນ ສຳລັບປະຊາຊົນ ແລະ ຜູ້ໃຊ້ລົດໃຊ້ຖະໜົນ ທີ່ເດີນທາງຜ່ານເສັ້ນທາງສາຍສຳຄັນສາຍນີ້.
ສຳລັບຜູ້ຮັບເໝົາດຳເນີນໂຄງການ ແມ່ນ ບໍລິສັດພັດທະນາສາມຫຼ່ຽມເສດຖະກິດຄົບວົງຈອນ ຈຳກັດຜູ້ດຽວ, ໂດຍມີເປົ້າໝາຍເພື່ອອຳນວຍຄວາມສະດວກໃນການສັນຈອນ ແລະ ຍົກລະດັບໂຄງສ້າງພື້ນຖານດ້ານຄົມມະນາຄົມ ໃຫ້ຮອງຮັບການເດີນທາງ ແລະ ການຂົນສົ່ງໄດ້ຢ່າງມີປະສິດທິຜົນ.
ການສຳເລັດຂອງໂຄງການນີ້ ນັບເປັນອີກໜຶ່ງບາດກ້າວສຳຄັນ ໃນການພັດທະນາເຄືອຂ່າຍຄົມມະນາຄົມຂອງລາວ ເພື່ອສົ່ງເສີມການຄ້າ, ການທ່ອງທ່ຽວ ແລະ ການພັດທະນາເສດຖະກິດໃນພື້ນທີ່.
ທີ່ມາ: ຂ່າວເສດຖະກິດການຄ້າ
