ເພື່ອຜັນຂະຫຍາຍ ແລະ ຈັດຕັ້ງປະຕິບັດແຜນຍຸດທະສາດ ຂອງກະຊວງ ກະສິກຳ ແລະ ສິ່ງແວດລ້ອມ ແລະ ແຜນວາລະແຫ່ງຊາດ ໃຫ້ສຳເລັດຜົນຕາມຈຸດປະສົງ ແລະ ຄາດໝາຍທີ່ວາງໄວ້ ໂດຍສະເພາະ ແມ່ນການແກ້ໄຂບັນຫາທາງດ້ານເສດຖະກິດ ທີ່ຕິດພັນກັບຂະແໜງການກະສິກຳ ແລະ ສິ່ງແວດລ້ອມ. ສະນັ້ນ, ໃນຕອນບ່າຍວັນທີ 22 ມິຖຸນາ 2026 ທີ່ ທ່າບົກທ່ານາແລ້ງ, ນະຄອນຫຼວງວຽງຈັນ ໄດ້ມີພິທີເປີດຂະບວນການສົ່ງອອກ, ສົ່ງຜ່ານ ພືດ ຜະລິດຕະພັນພືດ ລະຫວ່າງ ສປປ ລາວ ແລະ ຣາຊະອານາຈັກກຳປູເຈຍ ຢ່າງເປັນທາງການ.
ໂດຍການເປັນປະທານຮ່ວມຂອງທ່ານ ປອ. ລິນຄໍາ ດວງສະຫວັນ ລັດຖະມົນຕີ ກະຊວງກະສິກໍາ ແລະ ສິ່ງແວດລ້ອມ, ທ່ານ ດິດ ທິນາ ລັດຖະມົນຕີ ກະຊວງກະສິກຳ, ປ່າໄມ້ ແລະ ການປະມົງ ແຫ່ງ ຣາຊະອານາຈັກ ກໍາປູເຈຍ.
ທ່ານ ບຸນຈັນ ກົມບຸນຍະສິດ ຫົວໜ້າກົມປູກຝັງ ໄດ້ລາຍງານໃຫ້ຮູ້ວ່າ: “ສຳລັບ ການສົ່ງອອກ ຣາຊະອານາຈັກ ກຳປູເຈຍຄັ້ງນີ້ ເປັນຂີດໝາຍໃໝ່ຂອງພັກ ແລະ ລັດຖະບານລາວ ກ່ຽວກັບ ການຫັນເປັນປະເທດ ແລນລັອກເປັນແລນລິ້ງ ຫັນເອົາທ່າແຮງທີ່ຕັ້ງຂອງ ສປປ ລາວ ເພື່ອເຊື່ອມໂຍງກັບພາກພື້ນ ແລະ ສາກົນ. ສອງກະຊວງ ລາວ – ກຳປູເຈຍ ໄດ້ດຳເນີນການເຈລະຈາ ການສົ່ງອອກ, ສົ່ງຜ່ານ ພືດ ໃນຕົ້ນປີນີ້ 2026 ນີ້ ໂດຍສະເພາະ ພວກເຮົາໄດ້ບັນລຸການລົງນາມໃນຂໍ້ກຳນົດເງື່ອນໄຂດ້ານສຸຂານາໄມພືດ ລະຫ່ວາງ ສອງຝ່າຍ ຈຳນວນ 12 ລາຍການ (ມີ 6 ຂໍ້ກຳນົດເງື່ອນໄຂດ້ານສຸຂານາໄມພືດ ສໍາລັບ ສົ່ງຜ່ານ ໝາກຖົ່ວລຽນ, ໝາກລໍາໄຍ, ໝາກກ້ວຍ, ໝາກມ່ວງ, ເຂົ້າສານ ແລະ ມັນຕົ້ນ ຈາກ ຣາຊະອານາຈັກກຳປູເຈຍ ໄປຍັງ ສປ ຈີນ. ແລະ 6 ຂໍ້ກຳນົດເງື່ອນໄຂດ້ານສຸຂານາໄມພືດ ສຳລັບ ສົ່ງອອກ ເຂົ້າສານ, ກາເຟ, ບຣູເບີລີ້, ໝາກອຶ, ກະລໍ່າ ແລະ ໝາກຂາມ ສົ່ງອອກ ຈາກ ສປປ ລາວ ໄປຍັງ ຣາຊະອານາຈັກກຳປູເຈຍບົດພື້ນຖານຕ່າງຝ່າຍ ຕ່າງມີຜົນປະໂຫຍດ ແລະ ສອດຄ່ອງກັບເງືອນໄຂການສົ່ງອອກ, ສົ່ງຜ່ານ ດ້ານສຸຂານາໄມພືດ ຢ່າງຖືກຕ້ອງຕາມທຸກຂັ້ນຕອນ ຊື່ງໄລຍະຜ່ານມາ ສອງຝ່າຍໄດ້ມີການຄ້າຂາຍພືດຕາມຊາຍແດນ ໄດ້ປະມານ ຈຳນວນ 3.671 ໂຕນ, ມູນຄ່າ 4,019,606 ໂດລາສະຫະລັດ.
ເພື່ອໃຫ້ພິທີດັ່ງກ່າວມີຄວາມໝາຍສໍາຄັນ ຄະນະປະທານ ໄດ້ໃຫ້ກຽດຂຶ້ນກົດປຸ່ມ ເພື່ອເປີດປ້າຍ ແລະ ພິທີການສົ່ງອອກ, ສົ່ງຜ່ານ ພືດ ຜະລິດຕະພັນພືດ ຢ່າງເປັນທາງການ.
ທີ່ມາ: ຂ່າວສານກະສິກຳ ແລະ ສິ່ງແວດລ້ອມ
