ໃນວັນທີ 17 ມິຖຸນາ 2026 ທີ່ນະຄອນຫຼວງວຽງຈັນ ກະຊວງສາທາລະນະສຸກ ໄດ້ຈັດພິທີສະເຫຼີມສະຫຼອງວັນສາທາລະນະສຸກແຫ່ງຊາດ ຫຼື ວັນແພດລາວ ຄົບຮອບ 61 ປີ (18 ມິຖຸນາ 1965 – 18 ມິຖຸນາ 2026) ຢ່າງເປັນທາງການ ເພື່ອຫວນຄືນມູນເຊື້ອແຫ່ງການກຳເນີດ ແລະ ເຕີບໃຫຍ່ຂະຫຍາຍຕົວຂອງຂະແໜງສາທາລະນະສຸກລາວຕະຫຼອດໄລຍະ 61 ປີຜ່ານມາ.
ໃນພິທີດັ່ງກ່າວ ທ່ານນາງ ໃບຄໍາ ຂັດທິຍະ ລັດຖະມົນຕີກະຊວງສາທາລະນະສຸກ ໄດ້ສະແດງຄວາມກະຕັນຍູຮູ້ບຸນຄຸນຢ່າງສູງ ຕໍ່ບັນດາແພດໝໍ, ພະຍາບານ ແລະ ບຸກຄະລາກອນສາທາລະນະສຸກ ທີ່ໄດ້ເສຍສະຫຼະຊີວິດ ແລະ ເລືອດເນື້ອໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ໂດຍສະເພາະແມ່ນການກອບກູ້ເອົາຊີວິດຂອງປະຊາຊົນລາວບັນດາເຜົ່າ.
ພ້ອມກັນນີ້, ທ່ານຍັງໄດ້ຍ້ອງຍໍຊົມເຊີຍບັນດາ “ນັກຮົບເສື້ອຂາວ” ທີ່ຍຶດໝັ້ນໃນອຸດົມການ, ເສຍສະຫຼະເພື່ອປະຕິບັດໜ້າທີ່ຢ່າງບໍ່ຮູ້ອິດຮູ້ເມື່ອຍ ບໍ່ວ່າຈະຢູ່ໃນເງື່ອນໄຂສົງຄາມ ຫຼື ສັນຕິພາບ.
ການສະຫຼອງຄັ້ງນີ້ ມີຄວາມໝາຍສໍາຄັນ ການກຽມພ້ອມສູ່ຍຸກໃໝ່: ຂະແໜງສາທາລະນະສຸກ ໝັ້ນໝາຍຈະສືບຕໍ່ພັດທະນາຕົນເອງຢ່າງຮອບດ້ານ ເພື່ອຍົກສູງຄວາມຮັບຜິດຊອບໃນການປະຕິບັດໜ້າທີ່ການເມືອງ ໃນຍຸກແຫ່ງການເຊື່ອມໂຍງ, ການແຂ່ງຂັນ ແລະ ຍຸກປັນຍາປະດິດ.
ເນັ້ນໃສ່ສຸຂະພາບປະຊາຊົນ: ໃນປີນີ້, ພິທີດັ່ງກ່າວໄດ້ເນັ້ນໜັກການແລກປ່ຽນວິຊາການໃນ 2 ຫົວຂໍ້ພະຍາດສຳຄັນ ຄື: ພະຍາດບໍ່ຕິດຕໍ່ (NCDs) ແລະ ພະຍາດທາລາເຊເມຍ, ເຊິ່ງເປັນບັນຫາທີ່ສົ່ງຜົນກະທົບໂດຍກົງຕໍ່ຄຸນນະພາບຊັບພະຍາກອນມະນຸດຂອງຊາດ ແລະ ໄດ້ຮັບການເອົາໃຈໃສ່ຈາກອົງການອະນາໄມໂລກ.
ການວາງສະແດງຜົນງານ: ພາຍໃນງານ ຍັງມີການວາງສະແດງຜົນງານດ້ານວິຊາການຈາກທັງພາກລັດ ແລະ ພາກທຸລະກິດ ເພື່ອສະແດງໃຫ້ເຫັນເຖິງຜົນສຳເລັດອັນພົ້ນເດັ່ນຂອງຂະແໜງການ.
ຕອນທ້າຍ, ທ່ານລັດຖະມົນຕີ ໄດ້ສົ່ງຄຳອວຍພອນໄຊອັນປະເສີດມາຍັງພະນັກງານແພດໝໍທົ່ວປະເທດ, ພະນັກງານບຳນານ ແລະ ນັກປະຕິວັດອາວຸໂສ ໃຫ້ມີສຸຂະພາບແຂງແຮງ, ປະສົບຜົນສຳເລັດໃນໜ້າທີ່ອັນມີກຽດ ແລະ ສືບຕໍ່ເປັນທີ່ເພິ່ງທີ່ໄວ້ວາງໃຈຂອງປະຊາຊົນລາວບັນດາເຜົ່າຕະຫຼອດໄປ.
ທີ່ມາ: ວຽງຈັນໃໝ່
