ເກີດເຫດໄຟໄໝ້ “ສາລາເຣກາໂດ” (Reikado / 霊火堂) ມໍລະດົກທາງວັດທະນະທຳ ຢູ່ປະເທດຍີ່ປຸ່ນ ເຊິ່ງເປັນສາລາສັກສິດອັນເກົ່າແກ່ ທີ່ມີປະຫວັດສາດຍາວນານກວ່າ 1,200 ປີ ຢູ່ເທິງຍອດພູ ໃນເກາະມິຢາຈິມະ, ແຂວງຮິໂຣຊິມະ ໄດ້ຖືກໄຟໄໝ້ເກືອບໝົດຫຼັງ.
ເຫດການເກີດຂຶ້ນໃນຕອນເຊົ້າ ຂອງວັນທີ 20 ພຶດສະພາ 2026 ທີ່ຜ່ານມາ, ໂດຍເຈົ້າໜ້າທີ່ດັບເພີງໄດ້ຮັບແຈ້ງເຫດໃນເວລາປະມານ 08:30 ໂມງ (ຕາມເວລາທ້ອງຖິ່ນ).
ຕົ້ນເພີງໄດ້ລຸກໄໝ້ຈາກພາຍໃນສາລາ Reikado ເຊິ່ງເປັນສ່ວນໜຶ່ງຂອງ “ວັດໄດໂຊອິນ” ວັດເກົ່າແກ່ຂອງນິກາຍຊິນງອນ ກ່ອນທີ່ແປວໄຟຈະລຸກລາມໄປຍັງພື້ນທີ່ປ່າໄມ້ທີ່ຢູ່ໃກ້ຄຽງ.
ເຈົ້າໜ້າທີ່ຕ້ອງໄດ້ໃຊ້ເຮລິຄອບເຕີຂົນສົ່ງນ້ຳຂຶ້ນໄປສະກັດກັ້ນໄຟ ເນື່ອງຈາກສະຖານທີ່ຕັ້ງຢູ່ເທິງຍອດພູສູງ. ເບື້ອງຕົ້ນ ບໍ່ມີລາຍງານຜູ້ໄດ້ຮັບບາດເຈັບ ຫຼື ເສຍຊີວິດ, ສ່ວນສາເຫດຂອງການເກີດໄຟໄໝ້ແມ່ນກຳລັງຢູ່ພາຍໃຕ້ການສືບສວນຂອງເຈົ້າໜ້າທີ່ຕຳຫຼວດ ແລະ ພາກສ່ວນກ່ຽວຂ້ອງ.
ສາລາ Reikado ແຫ່ງນີ້ ເປັນສະຖານທີ່ປະດິດສະຖານ “ແປວໄຟນິລັນດອນ” (Kie-nai-no-hi) ຫຼື ໃນສາລານີ້ຈະມີເຕົາໄຟທີ່ມີໄຟລຸກຢູ່ຕະຫຼອດເວລາ ເຊິ່ງຕາມຄວາມເຊື່ອທາງພຸດທະສາສະໜານິກາຍມະຫາຍານຂອງຍີ່ປຸ່ນ ລະບຸວ່າ ເປັນແປວໄຟທີ່ລຸກໄໝ້ຕໍ່ເນື່ອງກັນມາຢ່າງຍາວນານເກືອບ 1,200 ປີ ໂດຍບໍ່ເຄີຍມອດເລີຍ ນັບຕັ້ງແຕ່ “ພຣະຄູໄຄ” (Kukai) ຫຼື ໂຄໂບ ໄດຊິ ນັກບວດຊື່ດັງຂອງຍີ່ປຸ່ນ ໄດ້ຈຸດຂຶ້ນໃນລະຫວ່າງການປະກອບພິທີກຳທາງສາສະໜາໃນປີ ຄ.ສ. 806.
ແປວໄຟສັກສິດໃນສາລາແຫ່ງນີ້ ຍັງເປັນແປວໄຟດຽວກັນກັບທີ່ຖືກນຳໄປໃຊ້ຈຸດ “ຄົບເພີງສັນຕິພາບ” (Flame of Peace) ຢູ່ທີ່ສວນສາທາລະນະອະນຸສອນສະຖານສັນຕິພາບຮິໂຣຊິມະ (Hiroshima Peace Memorial Park) ອີກດ້ວຍ.
World Forum
ພາບ: TBS NEWS
Lao Youth Radio FM90MHz
