ໃນວັນທີ 21 ພຶດສະພາ 2026 ນີ້, ທ່ານ ທອງສະຫວັນ ພົມວິຫານ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ພ້ອມດ້ວຍພັນລະຍາ ໄດ້ເຂົ້າຢ້ຽມຂໍ່ານັບ ສົມເດັດ ອົງມົງກຸດລາຊະກຸມມານ ອາກິຊິໂນະ ແຫ່ງ ຍີ່ປຸ່ນ ແລະ ພະຊາຍາ ຄິໂກະ ໃນໂອກາດເດີນທາງຢ້ຽມຢາມປະເທດຍີ່ປຸ່ນ ເພື່ອເຂົ້າຮ່ວມພິທີເປີດງານບຸນລາວ (Lao Festival) ປະຈໍາປີ 2026 ທີ່ ນະຄອນຫຼວງໂຕກຽວ.
ໃນການເຂົ້າຢ້ຽມຂໍ່ານັບຄັ້ງນີ້, ທ່ານ ທອງສະຫວັນ ພົມວິຫານ ໄດ້ນໍາເອົາຄວາມຢື້ຢາມຖາມຂ່າວອັນອົບອຸ່ນ ແລະ ພອນໄຊອັນປະເສີດ ຈາກ ພະນະທ່ານ ທອງລຸນ ສີສຸລິດ, ປະທານປະເທດ ແຫ່ງ ສປປ ລາວ ແລະ ພັນລະຍາ ປ່ຽນຜ່ານໄປຍັງ ສົມເດັດ ເຈົ້າຈັກກະພັດ ນາຣຸຮິໂຕະ ແຫ່ງ ຍີ່ປຸ່ນ ແລະ ພະມະເຫສີ.
ພ້ອມກັນນີ້, ທ່ານຮອງນາຍົກລັດຖະມົນຕີ ໄດ້ຕາງໜ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຂອບໃຈຢ່າງຈິງໃຈ ມາຍັງລັດຖະບານ ແລະ ປະຊາຊົນຍີ່ປຸ່ນ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອທີ່ມີປະສິດຕິຜົນສູງ ແກ່ ສປປ ລາວ ຢ່າງສະເໝີຕົ້ນສະເໝີປາຍ. ການຊ່ວຍເຫຼືອດັ່ງກ່າວ ໄດ້ປະກອບສ່ວນເຂົ້າໃນການພັດທະນາເສດຖະກິດ-ສັງຄົມແຫ່ງຊາດ ຂອງ ສປປ ລາວ ຢ່າງຫຼວງຫຼາຍ ເປັນຕົ້ນແມ່ນ:
ດ້ານການພັດທະນາຊັບພະຍາກອນມະນຸດ ແລະ ສາທາລະນະສຸກ.
ດ້ານການພັດທະນາໂຄງລ່າງພື້ນຖານ ແລະ ກະສິກໍາ-ປ່າໄມ້.
ການຈັດສົ່ງຊ່ຽວຊານ ແລະ ອາສາສະໝັກຍີ່ປຸ່ນ ມາປະຕິບັດໜ້າທີ່ຢູ່ລາວ.
ພິເສດ: ການຊ່ວຍເຫຼືອທາງດ້ານມະນຸດສະທໍາ ໃນການເກັບກູ້ລະເບີດບໍ່ທັນແຕກທີ່ຕົກຄ້າງ (UXO) ຢູ່ ສປປ ລາວ.
ໃນໂອກາດດຽວກັນ, ສົມເດັດ ອົງມົງກຸດລາຊະກຸມມານ ອາກິຊິໂນະ ກໍໄດ້ສະແດງຄວາມຕ້ອນຮັບອັນອົບອຸ່ນ ຕໍ່ການເດີນທາງຢ້ຽມຢາມ ແລະ ເຂົ້າຮ່ວມງານບຸນລາວ ຂອງ ທ່ານ ທອງສະຫວັນ ພົມວິຫານ ພ້ອມດ້ວຍພັນລະຍາ ແລະ ຄະນະ, ທັງໄດ້ອວຍພອນໃຫ້ການຢ້ຽມຢາມຄັ້ງນີ້ ປະສົບຜົນສໍາເລັດຢ່າງຈົບງາມ ແລະ ອວຍພອນໃຫ້ສາຍພົວພັນມິດຕະພາບອັນເປັນມູນເຊື້ອ ກໍຄືການຮ່ວມມືອັນດີງາມ ລະຫວ່າງ ຍີ່ປຸ່ນ ແລະ ລາວ ຈະເລີນງອກງາມຍິ່ງໆຂຶ້ນ ໄປຢ່າງບໍ່ຢຸດຢັ້ງ.
ສປປ ລາວ ແລະ ຍີ່ປຸ່ນ ໄດ້ສ້າງຕັ້ງສາຍພົວພັນການທູດຮ່ວມກັນມາຕັ້ງແຕ່ປີ 1955. ຕະຫຼອດໄລຍະ 7 ທົດສະວັດ ທີ່ຜ່ານມາ, ສາຍພົວພັນນີ້ໄດ້ຮັບການຮັດແໜ້ນຢ່າງແໜ້ນແຟ້ນ. ໂດຍສະເພາະໃນປີ 2025 ທີ່ຜ່ານມາ, ທັງສອງປະເທດໄດ້ສະເຫຼີມສະຫຼອງວັນສ້າງຕັ້ງສາຍພົວພັນທາງການທູດ ຄົບຮອບ 70 ປີ ແລະ ໄດ້ຍົກລະດັບສາຍພົວພັນ ຈາກ “ຄູ່ຮ່ວມຍຸດທະສາດ” ຂຶ້ນເປັນ “ຄູ່ຮ່ວມຍຸດທະສາດຮອບດ້ານ” (Comprehensive Strategic Partnership), ເຊິ່ງເປັນຂີດໝາຍປະຫວັດສາດໃນການຊຸກຍູ້ການພົວພັນຮ່ວມມືໃຫ້ກ້າວຂຶ້ນສູ່ລະດັບໃໝ່.
ນອກຈາກນີ້, ປີ 2025 ຍັງເປັນປີຄົບຮອບ 60 ປີ ຂອງການຈັດສົ່ງອາສາສະໝັກຍີ່ປຸ່ນ ມາປະຕິບັດໜ້າທີ່ ຢູ່ ສປປ ລາວ ເຊິ່ງມີຈໍານວນສະສົມຫຼາຍກວ່າ 1.100 ເທື່ອຄົນ ແລະ ປັດຈຸບັນ ມີອາສາສະໝັກກວ່າ 50 ຄົນ ທີ່ກໍາລັງເຄື່ອນໄຫວຊ່ວຍເຫຼືອສັງຄົມລາວ, ສະແດງໃຫ້ເຫັນເຖິງຄວາມສາມັກຄີ ແລະ ການໄປມາຫາສູ່ກັນຢ່າງສະໜິດແໜ້ນ ລະຫວ່າງ ປະຊາຊົນສອງຊາດ ລາວ-ຍີ່ປຸ່ນ ຢ່າງແທ້ຈິງ.
ທີ່ມາ: ກະຊວງການຕ່າງປະເທດ
Lao Youth Radio FM90MHz
