ວັນທີ 21 ກໍລະກົດ 2026 ນີ້, ໃນໂອກາດເຂົ້າຮ່ວມກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 59 ແລະ ບັນດາກອງປະຊຸມປີ່ນອ້ອມ ທີ່ ນະຄອນຫຼວງມະນິລາ, ທ່ານ ທອງສະຫວັນ ພົມວິຫານ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ພົບປະສອງຝ່າຍຢ່າງເປັນທາງການກັບ ທ່ານ ເຊຣເກ ລາວະຣົບ, ລັດຖະມົນຕີກະຊວງການຕ່າງປະເທດ ແຫ່ງ ສະຫະພັນ ຣັດເຊຍ .
ທັງສອງຝ່າຍໄດ້ສະແດງຄວາມປິຕິຍິນດີ ແລະ ຕີລາຄາສູງຕໍ່ການພົບປະກັນຢ່າງເປັນປະຈຳໃນເວທີພາກພື້ນ ແລະ ສາກົນ ເຊິ່ງຖືເປັນປະເພນີປະຕິບັດທີ່ສຳຄັນ ໃນການເພີ່ມທະວີຄວາມເຊື່ອອົກເຊື່ອໃຈ, ມິດຕະພາບອັນເປັນມູນເຊື້ອ ແລະ ເສີມຂະຫຍາຍຄວາມຮ່ວມມື ບົນພື້ນຖານຄູ່ຮ່ວມມືຍຸດທະສາດ ລະຫວ່າງ ລາວ ແລະ ຣັດເຊຍ.
ໃນການທົບທວນຄືນໝາກຜົນການຮ່ວມມືທີ່ຜ່ານມາ, ສອງຝ່າຍໄດ້ສະແດງຄວາມເພິ່ງພໍໃຈ ແລະ ເຫັນດີເປັນເອກະພາບ ທີ່ຈະສືບຕໍ່ຊຸກຍູ້ການຮ່ວມມືໃນຂົງເຂດທ່າແຮງໃຫ້ມີຜົນດຳເນີນງານທີ່ຊັດເຈນຍິ່ງຂຶ້ນ, ເປັນຕົ້ນແມ່ນ:
ເສດຖະກິດ, ການຄ້າ ແລະ ການລົງທຶນ.
ພະລັງງານ.
ການສຶກສາ, ວັດທະນະທຳ ແລະ ການທ່ອງທ່ຽວ.
ວຽກງານປ້ອງກັນຊາດ-ປ້ອງກັນຄວາມສະຫງົບ.
ນອກຈາກນີ້, ທັງສອງຝ່າຍຍັງໄດ້ແລກປ່ຽນທັດສະນະຢ່າງກົງໄປກົງມາ ກ່ຽວກັບສະພາບການພົ້ນເດັ່ນໃນພາກພື້ນ ແລະ ສາກົນ, ພ້ອມທັງຢືນຢັນທີ່ຈະສືບຕໍ່ຮ່ວມມືກັນຢ່າງໃກ້ຊິດ ເພື່ອສົ່ງເສີມສັນຕິພາບ, ສະຖຽນລະພາບ ແລະ ການພັດທະນາ, ພ້ອມທັງຕີລາຄາສູງຕໍ່ໝາກຜົນການຮ່ວມມືໃນຂອບ ອາຊຽນ-ຣັດເຊຍ ໃນໄລຍະຜ່ານມາ.
ທີ່ມາ: ກະຊວງການຕ່າງປະເທດ
Lao Youth Radio FM90MHz
