ລັດຖະບານທ້ອງຖິ່ນແຂວງອິບາຣາກິ (Ibaraki) ປະເທດຍີ່ປຸ່ນ ໄດ້ເລີ່ມມາດຕະການເຂັ້ມງວດ ເພື່ອແກ້ໄຂບັນຫາການຈ້າງງານຜິດກົດໝາຍ ດ້ວຍການປະກາດມອບເງິນລາງວັນໃຫ້ແກ່ພົນລະເມືອງດີ ທີ່ ຊ່ວຍແຈ້ງຂໍ້ມູນກ່ຽວກັບທຸລະກິດ ຫຼື ສະຖານປະກອບການທີ່ຮັບແຮງງານຕ່າງດ້າວທີ່ບໍ່ມີເອກະສານຖືກຕ້ອງເຂົ້າມາເຮັດວຽກໃນຍີ່ປຸ່ນ.
ເງິນລາງວັນທີ່ຈະໄດ້ຮັບ: 10,000 ເຢນ (ປະມານ 64 ໂດລາສະຫະລັດ) ຕໍ່ການແຈ້ງເບາະແສທີ່ນໍາໄປສູ່ການຈັບກຸມ ຫຼື ດໍາເນີນຄະດີໄດ້ຕົວຈິງ.
ເຫດຜົນ: ແຂວງອິບາຣາກິ ຖືກຈັດອັນດັບໃຫ້ເປັນແຂວງທີ່ມີຈໍານວນແຮງງານຜິດກົດໝາຍສູງທີ່ສຸດໃນຍີ່ປຸ່ນ ຕິດຕໍ່ກັນເປັນເວລາ 4 ປີຊ້ອນ.
ຈຸດປະສົງ: ເພື່ອປົກປ້ອງສິດທິຂອງແຮງງານ ແລະ ຮັກສາຄວາມສະຫງົບຮຽບຮ້ອຍໃນສັງຄົມ.
ເຈົ້າໜ້າທີ່ເນັ້ນຢ້ຳວ່າ ຈະຮັບພິຈາລະນາສະເພາະຂໍ້ມູນທີ່ມີຫຼັກຖານຈະແຈ້ງເທົ່ານັ້ນ. ຈະບໍ່ຮັບຂໍ້ມູນທີ່ເກີດຈາກຄວາມກຽດຊັງສ່ວນຕົວ, ການກັ່ນແກ້ງ ຫຼື ການຕັດສິນຄົນຈາກຮູບລັກສະນະພາຍນອກ ແລະ ເຊື້ອຊາດ. ຜູ້ແຈ້ງຕ້ອງລະບຸຕົວຕົນ ແລະ ເອກະສານຢັ້ງຢືນທີ່ຊັດເຈນຜ່ານເວັບໄຊທາງການຂອງແຂວງ.
ໃນປີ 2025 ທີ່ຜ່ານມາ, ມີການກວດພົບແຮງງານຜິດກົດໝາຍໃນທົ່ວປະເທດຍີ່ປຸ່ນ ກວ່າ 13,435 ຄົນ, ໃນນັ້ນສະເພາະແຂວງອິບາຣາກິ ມີເຖິງ 3,518 ຄົນ.
ປັດຈຸບັນ, ຍີ່ປຸ່ນມີແຮງງານຕ່າງປະເທດທັງໝົດປະມານ 2.6 ລ້ານຄົນ, ໂດຍ “ແຮງງານຫວຽດນາມ” ເປັນກຸ່ມທີ່ມີຈໍານວນຫຼາຍທີ່ສຸດ (ປະມານ 610,000 ຄົນ).
ແນວໃດກໍຕາມ, ມາດຕະການນີ້ໄດ້ຮັບການວິພາກວິຈານຈາກກຸ່ມນັກກົດໝາຍ ແລະ ອົງການພາກປະຊາສັງຄົມບາງກຸ່ມ ທີ່ກັງວົນວ່າອາດຈະນໍາໄປສູ່ການຈໍາແນກເຊື້ອຊາດ ແລະ ສ້າງຄວາມແຕກແຍກໃນສັງຄົມຫຼາຍຂຶ້ນ.
ທີ່ມາ: Vn Express
Lao Youth Radio FM90MHz
