ໃນຕອນແລງຂອງວັນທີ 29 ເມສາ 2026, ຄະນະນຳນະຄອນປາກເຊ ນຳໂດຍ ທ່ານ ຄອນສະຫວັນ ວັນນິວົງຄຳ, ຮັກສາການເລຂາພັກນະຄອນປາກເຊ, ພ້ອມດ້ວຍ ທ່ານ ເກດສະໜາ ຄຳມິ່ງສະຫວັດ, ຮອງປະທານຄະນະກຳມະການປົກຄອງນະຄອນປາກເຊ, ທ່ານ ວິລັດ ນຽມທະຈິດ, ຫົວໜ້າຄະນະໂຄສະນາອົບຮົມນະຄອນປາກເຊ ແລະ ພາກສ່ວນກ່ຽວຂ້ອງທີ່ກ່ຽວຂ້ອງ ໄດ້ລົງເຄື່ອນໄຫວຕິດຕາມຊຸກຍູ້ການແກ້ໄຂບັນຫາຂີ້ເຫຍື້ອຕົກຄ້າງໃນເຂດເທສະບານນະຄອນ.
ການລົງພື້ນທີ່ໃນຄັ້ງນີ້ ມີຈຸດປະສົງຫຼັກເພື່ອປະເມີນສະພາບຄວາມເປັນຈິງ ແລະ ຊອກຫາວິທີການແກ້ໄຂບັນຫາໃຫ້ທັນກັບສະພາບການ, ແນໃສ່ຟື້ນຟູນະຄອນປາກເຊ ໃຫ້ກັບມາມີຄວາມສະອາດ, ເປັນລະບຽບຮຽບຮ້ອຍ ແລະ ສວຍງາມຄືດັ່ງເດີມ.
ເລັ່ງການເກັບມ້ຽນ: ຕ້ອງດຳເນີນການສະສາງ ແລະ ເກັບມ້ຽນຂີ້ເຫຍື້ອທີ່ຕົກຄ້າງທັງໝົດໃຫ້ສຳເລັດໂດຍໄວທີ່ສຸດ ແລະ ຕ້ອງປະຕິບັດການຂົນສົ່ງເປັນປະຈຳທຸກວັນ ບໍ່ໃຫ້ມີການສະສົມ.
ການຈັດສັນວຽກງານ: ໃຫ້ມີການແບ່ງຄວາມຮັບຜິດຊອບລະຫວ່າງພາກສ່ວນຕ່າງໆ ໃຫ້ລະອຽດຈະແຈ້ງ ແລະ ຕ້ອງປະຕິບັດຕາມຕາຕະລາງການລົງເກັບມ້ຽນໃນແຕ່ລະຈຸດຢ່າງເຂັ້ມງວດ.
ເປົ້າໝາຍສູງສຸດແມ່ນການເຮັດໃຫ້ນະຄອນປາກເຊປາສະຈາກສິ່ງເສດເຫຼືອສະສົມໃນໄລຍະຍາວ ເພື່ອຮັກສາພາບລັກຄວາມສະອາດສວຍງາມຂອງຕົວເມືອງທ່ອງທ່ຽວ.
ນອກຈາກມາດຕະການທາງພາກລັດແລ້ວ, ທ່ານຮັກສາການເລຂາພັກນະຄອນ ຍັງໄດ້ຮຽກຮ້ອງມາຍັງອົງການປົກຄອງບ້ານ ແລະ ພໍ່ແມ່ປະຊາຊົນທຸກຊັ້ນຄົນ ໃຫ້ຮ່ວມແຮງຮ່ວມໃຈກັນ:
ຮ່ວມເປັນເຈົ້າການ: ເອົາໃຈໃສ່ຮັກສາຄວາມສະອາດຢູ່ບໍລິເວນເຮືອນຊານ, ຫ້າງຮ້ານ ແລະ ສະຖານທີ່ສາທາລະນະຕ່າງໆ.
ຖິ້ມຂີ້ເຫຍື້ອໃຫ້ຖືກຈຸດ: ຂໍຄວາມຮ່ວມມືໃຫ້ຢຸດຕິການຖິ້ມຂີ້ເຫຍື້ອຊະຊາຍຕາມແຄມທາງ ຫຼື ສະຖານທີ່ບໍ່ໄດ້ຮັບອະນຸຍາດ ແລະ ໃຫ້ນຳມາໄວ້ຕາມຈຸດທີ່ກຳນົດໄວ້ ເພື່ອຄວາມສະດວກໃນການເກັບຂົນ ແລະ ຄວາມເປັນລະບຽບຮຽບຮ້ອຍຂອງບ້ານເມືອງ.
ຂ່າວໂດຍ: ໜັງສືພິມຈຳປາໃໝ່
Laos Youth Radio
