ສູນກາງອົງການພຸດທະສາສະໜາສຳພັນ ແຫ່ງ ສປປ ລາວ ຂໍຖືເປັນກຽດຈະເລີນພອນ ຂໍເຊີນພຸດທະສາສະນິກະຊົນ ພ້ອມດ້ວຍພີ່ນ້ອງປະຊາຊົນ ທຸກທ່ານ ເຂົ້າຮ່ວມງານສະເຫຼີມສະຫຼອງ “ວັນວິສາຂະບູຊາ” ປະຈຳປີ ພ.ສ 2568 ຢ່າງພ້ອມພຽງ ໃນວັນທີ 29 ເມສາ 2026 ທີ່ເດີ່ນກົມມະລຽນ ພຣະທາດຫຼວງ ເມືອງໄຊເສດຖາ ນະຄອນຫຼວງວຽງຈັນ.
ວັນວິສາຂະບູຊາ ເປັນວັນສຳຄັນຍິ່ງໃຫຍ່ທາງພຣະພຸດທະສາສະໜາ ເພາະເປັນວັນທີ່ກົງກັນທັງ 3 ເຫດການສຳຄັນຄື: ວັນປະສູດ, ວັນຕັດສະຮູ້ ແລະ ວັນປະຣິນິພານ ຂອງອົງສົມເດັດສັມມາສັມພຸດທະເຈົ້າ. ນອກນັ້ນ ຍັງເປັນວັນສຳຄັນສາກົນ ທີ່ອົງການສະຫະປະຊາຊາດ ໄດ້ຮັບຮອງໃຫ້ເປັນ “ວັນສຳຄັນຂອງໂລກ” ອີກດ້ວຍ.
ເພື່ອຮ່ວມສະເຫຼີມສະຫຼອງວັນອັນປະເສີດນີ້ ກັບຊາວພຸດທົ່ວໂລກ ແລະ ເພື່ອສົ່ງເສີມຫຼັກທັມຄຳສອນໃຫ້ແຜ່ຂະຫຍາຍໃນສັງຄົມ, ສູນກາງອົງການພຸດທະສາສະໜາສຳພັນ ຈຶ່ງໄດ້ຈັດງານຂຶ້ນຢ່າງສົມພະກຽດ ໂດຍມີພິທີທາງສາສະໜາອັນສຳຄັນ ເຊັ່ນ: ພິທີໄຕທຽນບູຊາ, ຟັງພຣະທັມເທດສະໜາ, ສູດສາທະຍາຍໄຊຍະມຸງຄຸນ, ຖວາຍຜ້າປ່າສາມັກຄີ ແລະ ວຽນທຽນສາມັກຄີ ຮອບອົງພຣະທາດຫຼວງ.
ພິເສດໃນປີນີ້ ຍັງຈະມີພິທີຖວາຍຜ້າປ່າສາມັກຄີ ເພື່ອສົມທົບທຶນເຂົ້າ “ມູນນິທິພຸດທະບັນດິດ” ເພື່ອນຳໄປສົ່ງເສີມກິດຈະການພຸດທະສາສະໜາ ແລະ ພັດທະນາວຽກງານພຸດທະສາສະໜາໃນ ສປປ ລາວ ໃຫ້ຍືນຍົງສືບໄປ.
ກຳນົດການສຳຄັນ:
16:00 ໂມງ: ເຕົ້າໂຮມພຣະສົງ, ສາມະເນນ ແລະ ພຸດທະສາສະນິກະຊົນ
17:00 ໂມງ: ເລີ່ມພິທີໄຕທຽນບູຊາພຣະຣັດຕະນະໄຕ
18:45 ໂມງ: ຟັງປາຖະຄາຖາທັມ ກ່ຽວກັບວັນວິສາຂະບູຊາ
19:15 ໂມງ: ຖວາຍຕົ້ນຜ້າປ່າສາມັກຄີ
19:30 ໂມງ: ແຫ່ຕົ້ນກາລະພຶກ ແລະ ວຽນທຽນສາມັກຄີ ຮອບພຣະທາດຫຼວງ
ຈຶ່ງຂໍເຊີນຊວນພຸດທະສາສະນິກະຊົນ ພ້ອມທັງພີ່ນ້ອງປະຊາຊົນ ທັງພາຍໃນ ແລະ ຕ່າງປະເທດ ຮ່ວມກັນນຸ່ງຂາວ, ຖືດອກໄມ້ທູບທຽນ ເຂົ້າຮ່ວມງານບຸນອັນສັກສິດໃນຄັ້ງນີ້ ເພື່ອຮ່ວມສືບສານພຣະພຸດທະສາສະໜາ ໃຫ້ຮຸ່ງເຮືອງສືບໄປ.
