ອີງຕາມບົດລາຍງານການວັດແທກຄຸນນະພາບອາກາດ ຈາກສະຖາບັນນິເວດວິທະຍາ ແລະ ເຕັກໂນໂລຊີຊີວະພາບ, ກະຊວງກຳສິກຳ ແລະ ປ່າໄມ້ ປະຈຳວັນທີ 02 ເມສາ 2026 ພົບວ່າຄ່າຝຸ່ນລະອອງຂະໜາດນ້ອຍ PM 2.5 ໃນຫຼາຍແຂວງທົ່ວປະເທດ ຢູ່ໃນລະດັບທີ່ “ເລີ່ມມີຜົນກະທົບຕໍ່ສຸຂະພາບ” (ສີສົ້ມ).
ຈຸດທີ່ຄວນເຝົ້າລະວັງເປັນພິເສດ:
ບາງພື້ນທີ່ດັດຊະນີຄຸນນະພາບອາກາດ (AQI) ພຸ່ງສູງເກືອບແຕະເຂດອັນຕະລາຍ (ສີແດງ), ເຊິ່ງມີ 3 ຈຸດທີ່ມີຄ່າ ດັດຊະນີຄຸນນະພາບອາກາດ ສູງສຸດຮອດ 150 ໄມໂຄຣກຣາມ ຕໍ່ແມັດກ້ອນ ຄື:
ແຂວງອຸດົມໄຊ: ເມືອງໄຊ, ບ້ານດອນໄຊ 150 ໄມໂຄຣກຣາມ ຕໍ່ແມັດກ້ອນ.
ແຂວງອັດຕະປື: ເມືອງສາມັກຄີໄຊ, ບ້ານຫຼັກສາມ 150 ໄມໂຄຣກຣາມ ຕໍ່ແມັດກ້ອນ.
ແຂວງຈຳປາສັກ: ບ້ານສະພານໄຊ 149 ໄມໂຄຣກຣາມ ຕໍ່ແມັດກ້ອນ.
ສ່ວນເຂດ ນະຄອນຫຼວງວຽງຈັນ ໂດຍສະເພາະເມືອງຈັນທະບູລີ ແລະ ໄຊເສດຖາ ຄ່າຝຸ່ນຍັງສູງຢູ່ລະຫວ່າງ 106.5 – 148 ໄມໂຄຣກຣາມ ຕໍ່ແມັດກ້ອນ, ເຊິ່ງຖືວ່າອັນຕະລາຍຕໍ່ສຸຂະພາບໃນໄລຍະຍາວ.
ເລື່ອງໜ້າຮູ້ກ່ຽວກັບ PM 2.5 ແລະ ວິທີປ້ອງກັນ:
1 . PM 2.5 ແມ່ນຫຍັງ ແລະ ເກີດຈາກໃສ?
ມັນຄືຝຸ່ນລະອອງທີ່ມີຂະໜາດນ້ອຍກວ່າ 2.5 ໄມຄຣອນ (ນ້ອຍກວ່າເສັ້ນຜົມຄົນເຮົາເຖິງ 20 ເທົ່າ). ສາເຫດຕົ້ນຕໍໃນໄລຍະນີ້ແມ່ນເກີດຈາກ:
ການຈູດປ່າ ແລະ ຈູດຂີ້ເຫຍື້ອໃນທີໂລ່ງແຈ້ງ.
ຄວັນໄຟ ຈາກການເຮັດກະສິກຳຕາມລະດູການ.
ການປ່ອຍຄວັນ ຈາກຍານພາຫະນະ ແລະ ໂຮງງານອຸດສາຫະກຳ.
ສະພາບອາກາດ ທີ່ປິດ (ບໍ່ມີລົດ) ເຮັດໃຫ້ຝຸ່ນບໍ່ສາມາດລະບາຍອອກໄປໄດ້.
2 . ຜົນຮ້າຍຕໍ່ສຸຂະພາບ
ເນື່ອງຈາກມີຂະໜາດນ້ອຍຫຼາຍ, ມັນສາມາດຜ່ານຂົນດັງເຂົ້າສູ່ ກະແສເລືອດ ແລະ ປອດ ໄດ້ໂດຍກົງ ເຮັດໃຫ້ເກີດ:
ອາການຄັນຕາ, ຄັນດັງ, ຄໍແຫ້ງ ແລະ ໄອ.
ພະຍາດກ່ຽວກັບລະບົບທາງເດີນຫາຍໃຈຊ້ຳເຮື້ອ.
ເພີ່ມຄວາມສ່ຽງເປັນມະເຮັງປອດ ແລະ ພະຍາດຫົວໃຈ.
3 . ກຸ່ມສ່ຽງທີ່ຕ້ອງລະວັງເປັນພິເສດ
ເດັກນ້ອຍ ແລະ ຜູ້ສູງອາຍຸ.
ແມ່ຍິງຖືພາ.
ຜູ້ທີ່ມີພະຍາດປະຈຳຕົວ ເຊັ່ນ: ຫອບຫືດ, ພະຍາດຫົວໃຈ ຫຼື ພະຍາດປອດ.
ວິທີປ້ອງກັນ ແລະ ຫຼຸດຜ່ອນມົນລະພິດ
ໃສ່ຜ້າອັດປາກ-ດັງ: ຄວນໃສ່ຜ້າອັດປາກ-ດັງ ຊະນິດ N95 ທຸກຄັ້ງ ເມື່ອຕ້ອງອອກໄປນອກອາຄານ.
ຫຼີກເວັ້ນກິດຈະກຳກາງແຈ້ງ: ຫຼຸດຜ່ອນການອອກກຳລັງກາຍ ຫຼື ເຮັດວຽກໜັກຢູ່ກາງແຈ້ງໃນໄລຍະທີ່ຄ່າຝຸ່ນສູງ.
ປິດປະຕູປ່ອງຢ້ຽມ: ເພື່ອປ້ອງກັນບໍ່ໃຫ້ຝຸ່ນລະອອງເຂົ້າມາໃນເຮືອນ.
ຢຸດການຈູດ: ງົດການຈູດຂີ້ເຫຍື້ອຊະຊາຍ ແລະ ຈູດປ່າ ເພື່ອບໍ່ໃຫ້ເປັນການເພີ່ມປະລິມານຝຸ່ນໃນອາກາດ.
ຕິດຕາມຂ່າວສານ: ກວດເຊັກຄ່າດັດຊະນີຄຸນນະພາບອາກາດ ຢ່າງສະໝໍ່າສະເໝີ ກ່ອນອອກຈາກເຮືອນ.
ດ້ວຍຄວາມເປັນຫ່ວງເປັນໄຍໃນສຸຂະພາບຂອງທຸກທ່ານ!
Lao Youth Radio FM90MHz
