ສະຖາບັນນິເວດວິທະຍາ ແລະ ເຕັກໂນໂລຊີຊີວະພາບ, ກະຊວງກະສິກຳ ແລະ ປ່າໄມ້ ໄດ້ເປີດເຜີຍລາຍງານການວັດແທກຄຸນນະພາບອາກາດ (PM 2.5) ປະຈຳວັນທີ 27 ມີນາ 2026 ເຫັນວ່າຫຼາຍຈຸດໃນທົ່ວປະເທດກຳລັງປະເຊີນກັບບັນຫາຝຸ່ນລະອອງເກີນມາດຕະຖານ.
ສ່ອງຕົວເລກຈຸດທີ່ໜ້າເປັນຫ່ວງ:
ອີງຕາມຕາຕະລາງດັດຊະນີຄຸນນະພາບອາກາດ (AQI), ພົບວ່າຫຼາຍແຂວງມີຄ່າຝຸ່ນສູງໃນລະດັບ “ເລີ່ມມີຜົນກະທົບຕໍ່ສຸຂະພາບ” (ສີສົ້ມ) ໂດຍສະເພາະ:
ຈຳປາສັກ (ບ້ານສະພານໄຊ): ຄ່າ ດັດຊະນີຄຸນນະພາບອາກາດ ພຸ່ງສູງເຖິງ 190 ໄມໂຄຣກຣາມ ຕໍ່ແມັດກ້ອນ (ສູງທີ່ສຸດໃນລາຍງານ).
ສາລະວັນ (ບ້ານນາເຫຼັກ): ຄ່າ ດັດຊະນີຄຸນນະພາບອາກາດ ຢູ່ທີ່ 183 ໄມໂຄຣກຣາມ ຕໍ່ແມັດກ້ອນ.
ອັດຕະປື (ບ້ານຫຼັກສາມ): ຄ່າ ດັດຊະນີຄຸນນະພາບອາກາດ ຢູ່ທີ່ 179 ໄມໂຄຣກຣາມ ຕໍ່ແມັດກ້ອນ.
ບໍ່ແກ້ວ (ບ້ານອຸດົມ): ຄ່າ ດັດຊະນີຄຸນນະພາບອາກາດ ຢູ່ທີ່ 165 ໄມໂຄຣກຣາມ ຕໍ່ແມັດກ້ອນ.
ຫຼວງພະບາງ (ບ້ານຫາດຫຼວງ): ຄ່າ ດັດຊະນີຄຸນນະພາບອາກາດ ຢູ່ທີ່ 157 ໄມໂຄຣກຣາມ ຕໍ່ແມັດກ້ອນ.
ໄຊສົມບູນ (ບ້ານພູຫົວຊ້າງ): ຄ່າ ດັດຊະນີຄຸນນະພາບອາກາດ ຢູ່ທີ່ 156 ໄມໂຄຣກຣາມ ຕໍ່ແມັດກ້ອນ.
ສຳລັບ ນະຄອນຫຼວງວຽງຈັນ ກໍ່ມີສະພາບອາກາດທີ່ “ມີຜົນກະທົບເລັກນ້ອຍ” (ສີເຫຼືອງເຂັ້ມ) ເຊິ່ງຄ່າ ດັດຊະນີຄຸນນະພາບອາກາດ ສະເລ່ຍຢູ່ລະຫວ່າງ 115 – 124 ໄມໂຄຣກຣາມ ຕໍ່ແມັດກ້ອນ.
ຝຸ່ນ PM 2.5 ມາຈາກໃສ?
ສາເຫດຫຼັກທີ່ເຮັດໃຫ້ຄ່າຝຸ່ນສູງຂຶ້ນໃນໄລຍະນີ້ແມ່ນມາຈາກ:
ການຈູດປ່າ ແລະ ຈູດເນື້ອທີ່ທຳການກະເສດ: ເພື່ອເລີ່ມຕົ້ນລະດູການຜະລິດໃໝ່.
ການຈູດຂີ້ເຫຍື້ອໃນທີໂລ່ງແຈ້ງ: ຕາມຊຸມຊົນຕ່າງໆ.
ຄວັນຈາກຍານພາຫະນະ ແລະ ໂຮງງານອຸດສາຫະກຳ.
ສະພາບອາກາດປິດ: ເຮັດໃຫ້ຝຸ່ນລະອອງບໍ່ສາມາດລະບາຍອອກສູ່ຊັ້ນບັນຍາກາດເບື້ອງເທິງໄດ້.
ອັນຕະລາຍທີ່ບໍ່ຄວນເບິ່ງຂ້າມ:
ຝຸ່ນ PM 2.5 ມີຂະໜາດນ້ອຍກວ່າ 2.5 ໄມຄຣອນ (ນ້ອຍກວ່າເສັ້ນຜົມ 20-30 ເທົ່າ), ສາມາດຊຶມເຂົ້າສູ່ກະແສເລືອດ ແລະ ປອດໄດ້ໂດຍກົງ ເຮັດໃຫ້:
ເກີດການລະຄາຍເຄືອງຕາ, ດັງ ແລະ ຄໍ.
ກະຕຸ້ນອາການພູມແພ້, ຫືດຫອບ.
ໃນໄລຍະຍາວອາດກໍ່ໃຫ້ເກີດພະຍາດທາງເດີນຫາຍໃຈຊ້ຳເຮື້ອ ແລະ ພະຍາດຫົວໃຈ.
ວິທີປ້ອງກັນຕົນເອງ:
ຫຼີກລ່ຽງເຮັດກິດຈະກຳກາງແຈ້ງ: ໂດຍສະເພາະກຸ່ມສ່ຽງ (ເດັກນ້ອຍ, ຜູ້ສູງອາຍຸ ແລະ ແມ່ຍິງຖືພາ ຫຶຼຜູ້ມີພະຍາດປະຈຳຕົວ).
ໃສ່ຜ້າອັດປາກ-ດັງ: ຄວນເປັນຊະນິດ N95 ທີ່ສາມາດຕອງຝຸ່ນລະອອງຂະໜາດນ້ອຍໄດ້.
ປິດປະຕູປ່ອງຢ້ຽມ: ເພື່ອປ້ອງກັນຝຸ່ນເຂົ້າເຮືອນ ແລະ ໃຊ້ເຄື່ອງຟອກອາກາດ (ຖ້າມີ).
ດື່ມນ້ຳສະອາດໃຫ້ພຽງພໍ: ເພື່ອຊ່ວຍຂັບຖ່າຍສານພິດອອກຈາກຮ່າງກາຍ.
ຂໍຄວາມຮ່ວມມື: ຊ່ວຍກັນງົດການເຜົາໄໝ້ທຸກຊະນິດໃນທີ່ໂລ່ງແຈ້ງ ເພື່ອຫຼຸດຜ່ອນມົນລະພິດທາງອາກາດ ແລະ ສ້າງສິ່ງແວດລ້ອມທີ່ດີໃຫ້ກັບລູກຫຼານພວກເຮົາ.
Lao Youth Radio FM 90.0 MHz
