ທ່ານຮູ້ບໍ່ວ່າ… ຕໍ່ໄປນີ້ ອຸດສາຫະກຳການລ້ຽງງົວ ແລະ ແບ້ຊີ້ນ ຢູ່ ສປປ ລາວ ເຮົາ ກຳລັງຈະກ້າວເຂົ້າສູ່ຍຸກໃໝ່ຢ່າງເປັນຮູບປະທຳ! ເພາະລ່າສຸດ ເມື່ອວັນທີ 6 ສິງຫາ 2026 ທີ່ຜ່ານມານີ້ ຢູ່ທີ່ນະຄອນຫຼວງວຽງຈັນ ໄດ້ມີພິທີລົງນາມບົດບັນທຶກຄວາມເຂົ້າໃຈ ຫຼື MOU ຄັ້ງປະຫວັດສາດ ລະຫວ່າງ ສປປ ລາວ ແລະ ຈີນ
ການຮ່ວມມືຄັ້ງນີ້ ເປັນການຈັບມືກັນລະຫວ່າງ ສະຖາບັນຄົ້ນຄວ້າກະສິກໍາ, ປ່າໄມ້ ແລະ ພັດທະນາຊົນນະບົດ (ຕາງໜ້າໂດຍ ທ່ານ ສິຣິພົນ ພິທັກສູນ ຮອງຫົວໜ້າສະຖາບັນ, ພ້ອມດ້ວຍ ທ່ານ ປອ. ພົມມີ ອິນທິຈັກ ຮອງຫົວໜ້າກົມແຜນການ ແລະ ການຮ່ວມມື, ກະຊວງກະສິກໍາ ແລະ ສິ່ງແວດລ້ອມ) ຮ່ວມກັບ ບໍລິສັດ ເຕັກໂນໂລຊີການລ້ຽງສັດ ຟານຊິງ ຈໍາກັດ (ຕາງໜ້າໂດຍ ທ່ານ Fan Junjie ປະທານບໍລິສັດ) ໂດຍມີບັນດາແຂກຖືກເຊີນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພິຍານຢ່າງຄຶກຄື້ນ
ຫຼາຍຄົນອາດຈະສົງໄສວ່າ “MOU ສະບັບນີ້ ເຂົາເຈົ້າຈະເຮັດຫຍັງກັນແທ້?” …
ຄຳຕອບກໍຄື ເຂົາເຈົ້າຈະຮ່ວມກັນ “ສຶກສາຄວາມເປັນໄປໄດ້ ໃນການສ້າງສູນຄົ້ນຄວ້າ ແລະ ສາທິດ ການປັບປຸງພັນງົວ ແລະ ແບ້ຊີ້ນ” ນັ້ນເອງ! ເຊິ່ງຈຸດໄຮໄລ້ທີ່ນ່າຕື່ນເຕັ້ນທີ່ສຸດກໍຄື ການກຽມນໍາເອົາ “ສາຍພັນງົວຮົວຊີ (Huaxi)” ເຊິ່ງເປັນສາຍພັນງົວຊີ້ນຊັ້ນເລີດ ແລະ ສາຍພັນແບ້ຊີ້ນຄຸນນະພາບດີຈາກປະເທດຈີນ ມາທົດລອງ, ປັບປຸງ ແລະ ພັດທະນາຢູ່ດິນລາວເຮົາ ໂດຍຈະມີການປະເມີນຄົບວົງຈອນ ທັງດ້ານເຕັກນິກ, ເສດຖະກິດ ແລະ ການດໍາເນີນງານຕົວຈິງ
ແຕ່ຄວາມພິເສດບໍ່ໄດ້ມີພຽງແຕ່ເລື່ອງສາຍພັນເທົ່ານັ້ນ! ເພາະໂຄງການນີ້ ເຂົາເຈົ້າເບິ່ງກວ້າງໄປເຖິງ “ຕ່ອງໂສ້ອຸດສາຫະກໍາ” ເລີຍ ບໍ່ວ່າຈະເປັນການພັດທະນາລະບົບການຜະລິດສາຍພັນ, ການຜະລິດອາຫານສັດທີ່ອຸດົມສົມບູນ, ການຄົ້ນຄວ້າວັກຊີນ, ການປ້ອງກັນພະຍາດ, ການບໍລິການດ້ານການລ້ຽງສັດ, ໄປຈົນເຖິງການສ້າງ ຟາມອັດສະລິຍະ (Smart Farm) ແລະ ການນຳໃຊ້ເທັກໂນໂລຊີຊີວະພາບ ເພື່ອບົ່ມເພາະໂຄງການນີ້ໃຫ້ເຕີບໂຕຢ່າງແຂງແຮງ
ການເຊັນ MOU ຄັ້ງນີ້ ຈຶ່ງບໍ່ແມ່ນພຽງແຕ່ການເຊັນເຈ້ຍແຜ່ນດຽວແລ້ວກໍແລ້ວໄປ, ແຕ່ເປັນການຢັ້ງຢືນເຖິງວິໄສທັດທີ່ວ່າ “ວິທະຍາສາດ ແລະ ເທັກໂນໂລຊີ ແມ່ນພະລັງຂັບເຄື່ອນຫຼັກຂອງການພັດທະນາ” ນີ້ຖືເປັນກ້າວສໍາຄັນ ແລະ ເປັນຫຼັກໝຸດໃໝ່ ທີ່ຈະມາຜັກດັນໃຫ້ການລ້ຽງສັດຂອງພໍ່ແມ່ປະຊາຊົນ ແລະ ຜູ້ປະກອບການລາວ ເຊື່ອມໂຍງເປັນຕ່ອງໂສ້ມູນຄ່າ, ມີລະບົບ, ທັນສະໄໝ ແລະ ສາມາດແຂ່ງຂັນໄດ້ໃນລະດັບສາກົນຢ່າງແທ້ຈິງ!
ທີ່ມາ: ຂ່າວສານກະສິກຳ ແລະ ສິ່ງແວດລ້ອມ
