ເພື່ອຮັບປະກັນຄວາມສະຫງົບຮຽບຮ້ອຍທາງດ້ານລາຄາສິນຄ້າ ແລະ ຄ່າບໍລິການ ໃນໄລຍະສະເຫຼີມສະຫຼອງບຸນປີໃໝ່ລາວ ພສ 2569 ທີ່ຈະມາເຖິງນີ້, ພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ (ພອຄ.ນວ) ໄດ້ອອກແຈ້ງການສະບັບເລກທີ 0836/ພອຄ.ນວ.ຄພນ, ລົງວັນທີ 12 ມີນາ 2026 ເຖິງບັນດາຜູ້ປະກອບການ, ຊາວຄ້າຂາຍ ແລະ ເຈົ້າຂອງທຸລະກິດບໍລິການທົ່ວເຂດນະຄອນຫຼວງວຽງຈັນ.
ເນື້ອໃນສຳຄັນຂອງແຈ້ງການມີດັ່ງນີ້:
ການຄວບຄຸມລາຄາສິນຄ້າ ແລະ ບໍລິການ: ຫ້າມຜູ້ປະກອບການສວຍໂອກາດກັກຕຸນສິນຄ້າ ຫຼື ຂຶ້ນລາຄາສິນຄ້າ ແລະ ຄ່າບໍລິການຕາມໃຈຊອບ. ຕ້ອງຂາຍໃນລາຄາປົກກະຕິທີ່ເຄີຍປະຕິບັດມາ ເພື່ອບໍ່ໃຫ້ສົ່ງຜົນກະທົບຕໍ່ຊີວິດການເປັນຢູ່ຂອງປະຊາຊົນ.
ສິນຄ້າທີ່ວາງຈຳໜ່າຍ ຕ້ອງຮັບປະກັນຄຸນນະພາບ, ບໍ່ເສື່ອມຄຸນ, ບໍ່ໝົດອາຍຸ ແລະ ຕ້ອງຕິດປ້າຍລາຄາເປັນ ສະກຸນເງິນກີບ ຢ່າງຈະແຈ້ງ. ສໍາລັບກະຕ່າຂອງຂວັນປີໃໝ່ ຕ້ອງມີລາຍການສິນຄ້າ, ລາຄາ ແລະ ເບີໂທລະສັບຕິດຕໍ່ໃຫ້ຄົບຖ້ວນ.
ການບໍລິການໂຮງແຮມ ແລະ ຮ້ານອາຫານ: ຕ້ອງຕິດປ້າຍລາຄາອາຫານ ແລະ ຄ່າບໍລິການໄວ້ໃນຈຸດທີ່ລູກຄ້າສາມາດເຫັນໄດ້ງ່າຍ. ລວມໄປເຖິງຄ່າບໍລິການຝາກລົດ-ລາງ ກໍຕ້ອງປະຕິບັດຕາມລາຄາປົກກະຕິ.
ຂໍ້ຫ້າມເດັດຂາດ: ຫ້າມນຳເຂົ້າ ແລະ ຈຳໜ່າຍໝາກກະໂພກ ຫຼື ວັດຖຸທີ່ມີສຽງແຕກທຸກຊະນິດຢ່າງເດັດຂາດ.
ມາດຕະການຕິດຕາມ ແລະ ກວດກາ: ເຈົ້າໜ້າທີ່ການຄ້າຈະເພີ່ມທະວີການລົງກວດກາຕາມທ້ອງຕະຫຼາດ ແລະ ຫົວໜ່ວຍທຸລະກິດຢ່າງໃກ້ຊິດ. ຫາກພົບເຫັນຜູ້ລະເມີດ ຈະຖືກປະຕິບັດມາດຕະການຢ່າງເຂັ້ມງວດ ເຊັ່ນ: ສຶກສາອົບຮົມ, ປັບໃໝ ຫຼື ອາຍັດສິນຄ້າ ຕາມແຕ່ລະກໍລະນີ.
ທັງນີ້, ກໍເພື່ອເຮັດໃຫ້ການສະໜອງສິນຄ້າ ແລະ ການບໍລິການພາຍໃນນະຄອນຫຼວງວຽງຈັນ ມີຄວາມພຽງພໍກັບຄວາມຕ້ອງການ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ ເພື່ອໃຫ້ປວງຊົນລາວໄດ້ສະຫຼອງບຸນປີໃໝ່ຢ່າງມີຄວາມສຸກ.
Lao Youth Radio FM90MHz
