ໃນວັນທີ 24 ກຸມພາ 2026, ກະຊວງປ້ອງກັນປະເທດ ແຫ່ງ ສປປ ລາວ ໄດ້ເປັນເຈົ້າພາບຈັດກອງປະຊຸມວິຊາການທະຫານອາກາດສອງຝ່າຍ ລາວ-ໄທ ຄັ້ງທີ 10 ເພື່ອສະຫຼຸບຕີລາຄາໝາກຜົນການພົວພັນຮ່ວມມືໃນໄລຍະຜ່ານມາ ແລະ ວາງທິດທາງແຜນການຍຸດທະສາດໃນຕໍ່ໜ້າ ແນໃສ່ເສີມສ້າງຄວາມເຂັ້ມແຂງໃຫ້ແກ່ກໍາລັງປ້ອງກັນອາກາດຂອງທັງສອງປະເທດ.
ການພົບປະຂອງຄະນະຜູ້ແທນລະດັບສູງ
ກອງປະຊຸມໃນຄັ້ງນີ້ ເປັນການພົບປະຄັ້ງສຳຄັນລະຫວ່າງນາຍທະຫານລະດັບສູງຂອງສອງກອງທັບ ໂດຍຝ່າຍລາວນໍາໂດຍ ທ່ານ ພົນຈັດຕະວາ ຄຳສຸກ ຄຳເລືອງເທບ, ຮອງຜູ້ບັນຊາການທະຫານອາກາດ, ຫົວໜ້າຫ້ອງເສນາທິການ ກອງບັນຊາການທະຫານອາກາດ ກອງທັບປະຊາຊົນລາວ ແລະ ຝ່າຍໄທ ນໍາໂດຍ ທ່ານ ພົນອາກາດໂທ ນະລັດ ບຸນປະເສີດ, ຮອງເສນາທິການທະຫານອາກາດ ແຫ່ງຣາຊະອານາຈັກໄທ ພ້ອມດ້ວຍຄະນະວິຊາການທັງສອງຝ່າຍເຂົ້າຮ່ວມຢ່າງພ້ອມພຽງ.
ກ່ອນເລີ່ມວາລະກອງປະຊຸມ, ຄະນະຜູ້ແທນທັງສອງຝ່າຍໄດ້ຮັບຊົມວິດີໂອປະຫວັດສາດແຫ່ງການພົວພັນຮ່ວມມື ລະຫວ່າງ ກອງທັບປະຊາຊົນລາວ ແລະ ກອງທັບຣາຊະອານາຈັກໄທ ເຊິ່ງສະແດງໃຫ້ເຫັນເຖິງມິດຕະພາບທີ່ແໜ້ນແຟ້ນ ແລະ ການຊ່ວຍເຫຼືອເກື້ອກູນກັນໃນຂົງເຂດວຽກງານທະຫານອາກາດຕະຫຼອດໄລຍະເວລາທີ່ຜ່ານມາ.
ທົບທວນໝາກຜົນ ແລະ ວາງວິໄສທັດການຮ່ວມມື 4 ດ້ານ
ໃນໂອກາດກ່າວເປີດກອງປະຊຸມ, ທ່ານ ພົນຈັດຕະວາ ຄຳສຸກ ຄຳເລືອງເທບ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ຕີລາຄາສູງຕໍ່ໝາກຜົນຂອງການຮ່ວມມືທີ່ຜ່ານມາ. ທັງສອງຝ່າຍໄດ້ຜັດປ່ຽນກັນປະກອບຄຳເຫັນຢ່າງກົງໄປກົງມາ ແລະ ເຫັນດີເປັນເອກະພາບໃນການສືບຕໍ່ຍົກລະດັບການຮ່ວມມືໃນປີຕໍ່ໜ້າ ໂດຍເນັ້ນໃສ່ 4 ເສົາຄ້ຳຫຼັກ ຄື:
ການແລກປ່ຽນການຢ້ຽມຢາມ: ສືບຕໍ່ຮັກສາກົນໄກການພົບປະແລກປ່ຽນລະຫວ່າງຄະນະຜູ້ແທນໃນທຸກລະດັບ ເພື່ອເສີມສ້າງຄວາມໄວ້ເນື້ອເຊື່ອໃຈ.
ການຍົກລະດັບບຸກຄະລາກອນ: ສົ່ງເສີມການແລກປ່ຽນດ້ານການສຶກສາທິການທະຫານ ເພື່ອສ້າງນັກບິນ ແລະ ວິຊາການທະຫານອາກາດໃຫ້ມີທັກສະທີ່ທັນສະໄໝ.
ການເຝິກຊ້ອມ ແລະ ຍຸດທະວິທີ: ເປີດກວ້າງການແລກປ່ຽນບົດຮຽນດ້ານການເຝິກຊ້ອມທາງອາກາດ ທັງໃນດ້ານເຕັກນິກ ແລະ ຍຸດທະວິທີ.
ການແລກປ່ຽນປະສົບການພາກສະໜາມ: ສ້າງໂອກາດໃຫ້ພະລາກອນທັງສອງຝ່າຍໄດ້ຖອດຖອນບົດຮຽນຕົວຈິງ ເພື່ອພັດທະນາລະບົບການເຮັດວຽກໃຫ້ມີປະສິດທິພາບ.
ຄຳໝັ້ນສັນຍາເພື່ອ “ນ່ານຟ້າແຫ່ງສັນຕິພາບ”
ທ່ານ ພົນອາກາດໂທ ນະລັດ ບຸນປະເສີດ ໄດ້ກ່າວສະແດງຄວາມຂອບໃຈຕໍ່ການຕ້ອນຮັບທີ່ເຕັມໄປດ້ວຍໄມຕີຈິດມິດຕະພາບ ພ້ອມທັງເນັ້ນໜັກວ່າ ກອງປະຊຸມວິຊາການຄັ້ງທີ 10 ນີ້ ເປັນຂີດໝາຍທີ່ສຳຄັນໃນການຢັ້ງຢືນຄວາມສາມັກຄີຮັກແພງຖານບ້ານໃກ້ເຮືອນຄຽງທີ່ດີ. ຝ່າຍໄທພ້ອມແລ້ວທີ່ຈະໃຫ້ການສະໜັບສະໜູນ ແລະ ຍົກລະດັບການຮ່ວມມືໃນທຸກດ້ານ ເພື່ອຮ່ວມກັນສ້າງ “ນ່ານຟ້າແຫ່ງສັນຕິພາບ” ໃຫ້ເກີດຂຶ້ນຢ່າງເປັນຮູບປະທຳ ແລະ ຍືນຍົງ.
ທີ່ມາ: Lao people’s Army News
