ພິທີວາງສີລາລຶກໂຄງການກໍ່ສ້າງສະຖາບັນການເມືອງ ແລະ ການປົກຄອງແຫ່ງຊາດລາວ ເຂດພາກໃຕ້ ໄດ້ຈັດຂຶ້ນໃນວັນທີ 3 ທັນວານີ້ ຢູ່ທີ່ບ້ານຄອນໄຫຼ ນະຄອນປາກເຊ ແຂວງຈຳປາສັກ ຊຶ່ງເປັນຂອງຂວັນຈາກລັດຖະບານ ແລະ ປະຊາຊົນ ສສ ຫວຽດນາມ ໃຫ້ແກ່ ສປປ ລາວ ໃນໂອກາດສະເຫຼີມສະຫຼອງວັນຊາດ ສປປ ລາວ ຄົບຮອບ 50 ປີ (2 ທັນວາ 1975-2 ທັນວາ 1975) ແລະວັນເກີດ ປະທານ ໄກສອນ ພົມວິຫານ ຄົບຮອບ 105 ປີ (13 ທັນວາ 1920 – 13 ທັນວາ 2025).
ຕາງໜ້າພັກ, ລັດຖະບານແຫ່ງ ສປປ ລາວ ເຂົ້າຮ່ວມໂດຍ ສະຫາຍ ກິແກ້ວ ໄຂຄຳພິທູນ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ແຫ່ງ ສປປ ລາວ ແລະ ຕາງໜ້າລັດຖະບານ ແຫ່ງ ສສ ຫວຽດນາມ ໂດຍສະຫາຍ ຫງວຽນ ຊວນ ຖັງ ກຳມະການກົມການເມືອງສູນກາງພັກ ຫົວໜ້າສະຖາບັນການເມືອງແຫ່ງຊາດ ໂຮ່ຈີມິນ ປະທານສະພາທິດສະດີສູນກາງພັກກອມມູນິດ ຫວຽດນາມ.
ໂຄງການນີ້, ມີມູນຄ່າການລົງທຶນທັງໝົດ 750 ກວ່າຕື້ດົງ, ແຫຼ່ງທຶນຕົ້ນຕໍ ແມ່ນ ທຶນຊ່ວຍເຫຼືອລ້າຈາກລັດຖະບານຫວຽດນາມ ໃຫ້ແກ່ລັດຖະບານລາວ ແລະ ມີທຶນສົມທົບ ຈາກລັດຖະບານລາວ ອີກຈໍານວນໜຶ່ງ, ໂຄງການມີໄລຍະເວລາປະຕິບັດງານທັງໝົດແຕ່ປີ 2026 ເຖິງ 2035, ໂດຍແບ່ງອອກເປັນ 2 ໄລຍະການກໍ່ສ້າງຫຼັກ ຄື: ໄລຍະທີ 1 (2026-2030): ເນັ້ນໃສ່ການກໍ່ສ້າງອາຄານຫຼັກ ເພື່ອຮອງຮັບການຮຽນ-ການສອນ ປະກອບມີ: ອາຄານຫ້ອງການ 5 ຊັ້ນ, ອາຄານຫ້ອງຮຽນ 5 ຊັ້ນ, ຫໍພັກນັກສຶກສາ (ຫຼັງທີ 1 ແລະ 2), ຫໍພັກພະນັກງານ ແລະ ລະບົບພື້ນຖານໂຄງລ່າງເຕັກນິກ. ງົບປະມານສໍາລັບໄລຍະນີ້ແມ່ນ 487 ຕື້ກວ່າດົງ.
ໄລຍະທີ 2 (2031-2035): ຈະສືບຕໍ່ກໍ່ສ້າງສະໂມສອນໃຫຍ່, ສູນຂໍ້ມູນຂ່າວສານ, ຫ້ອງອາຫານ ແລະ ຫໍພັກນັກສຶກສາຫຼັງທີ 3.
ການກໍ່ສ້າງສະຖາບັນການເມືອງ ແລະ ການປົກຄອງ ແຫ່ງຊາດເຂດພາກໃຕ້ ມີຄວາມໝາຍຍຸດທະສາດໄລຍະຍາວ, ເປັນການສ້າງຄວາມເຂັ້ມແຂງ, ເປັນເຈົ້າຕົນເອງໃນວຽກງານກໍ່ສ້າງ, ບຳລຸງພະນັກງານນໍາພາ-ຄຸ້ມຄອງ ໃຫ້ແກ່ພັກ-ລັດ. ເມື່ອກໍ່ສ້າງສໍາເລັດ ຈະເປັນ ບ່ອນສຶກສາອົບຮົມ, ບຳລຸງຍົກລະດັບທິດສະດີມາກ-ເລນິນ, ແນວຄິດໂຮ່ຈີມິນ, ແນວຄິດ ໄກສອນ ພົມວິຫານ, ເຜີຍແຜ່ມູນເຊື້ອຄວາມສາມັກຄີ ລະຫວ່າງ ລາວ-ຫວຽດນາມ ໃຫ້ຊຶມເລິກເຂົ້າໃນຖັນແຖວ ພະນັກງານ-ສະມາຊິກພັກ, ພ້ອມທັງເສີມສ້າງຄວາມຮູ້ດ້ານທິດສະດີການເມືອງ-ການປົກຄອງທີ່ທັນສະໄໝ ໃຫ້ແກ່ພະນັກງານຫຼັກແຫຼ່ງ ເພື່ອສ້າງຄວາມເຂັ້ມແຂງໃຫ້ແກ່ພັກເຮົາ ແລະສາມາດນໍາພາປະເທດຊາດ ໄປສູ່ຄວາມຈະເລີນຮຸ່ງເຮືອງ ໂດ້ຢ່າງໝັ້ນຄົງ ແລະ ສະຫາຍໄດ້ເນັ້ນວ່າ: ສອງສະຖາບັນ ໂດຍສະເພາະສອງຄະນະຄຸ້ມຄອງໂຄງການ ຄວນປະສານສົມທົບກັນຢ່າງແໜ້ນແຟ້ນ ເພື່ອຊີ້ນໍາ, ຕິດຕາມ ການຈັດຕັ້ງປະຕິບັດໂຄງການ ໃຫ້ໄປຕາມແຜນຜັງທີ່ກຳນົດໄວ້. ພ້ອມກັນນີ້ ກໍປະສານສົມທົບກັບບັນດາກະຊວງ, ອົງການ, ອຳນາດການປົກຄອງແຂວງ ແລະ ບັນດາພາກສ່ວນທີ່ກ່ຽວຂ້ອງ ທັງສອງປະເທດ ເພື່ອສ້າງເງື່ອນໄຂເຮັດໃຫ້ໂຄງການນີ້ ດໍາເນີນໄປຕາມແຜນການທີ່ກຳນົດໄວ້.
ສະຖາບັນແຫ່ງນີ້ ຈະຢືນຕົ້ນສະຫງ່າງາມຢູ່ດິນແດນຈໍາປາສັກ ເປັນດັ່ງດອກໄມ້ທີ່ຫອມຫວນ ແລະ ເປັນສັນຍາລັກແຫ່ງມິດຕະພາບທີ່ບໍ່ມີວັນຈືດຈາງ ລະຫວ່າງ ລາວ ແລະ ຫວຽດນາມ.
ທີ່ມາ: ໜສພ ປະຊາຊົນ
