ວັນທີ 17 ກັນຍາ ຂອງທຸກໆປີ, ອົງການອະນາໄມໂລກ (WHO) ແລະ ສະມາຊິກທົ່ວໂລກໄດ້ຮ່ວມກັນສະເຫຼີມສະຫຼອງ “ວັນຄວາມປອດໄພຂອງຄົນເຈັບສາກົນ” (World Patient Safety Day) ເພື່ອແນໃສ່ສ້າງຄວາມຕື່ນໂຕ, ເພີ່ມພູນຄວາມຮູ້ ແລະ ຮຽກຮ້ອງໃຫ້ທຸກພາກສ່ວນໃນການບໍລິການດ້ານສາທາລະນະສຸກ ຮ່ວມມືກັນຫຼຸດຜ່ອນຄວາມສ່ຽງ ແລະ ຄວາມຜິດພາດທີ່ອາດເກີດຂຶ້ນໃນລະຫວ່າງການປິ່ນປົວ.
ອົງການອະນາໄມໂລກໄດ້ຈັດຕັ້ງວັນນີ້ຂຶ້ນຢ່າງເປັນທາງການ ໃນປີ 2019 ຫລັງຈາກມີລາຍງານວ່າ ທົ່ວໂລກມີຜູ້ເສຍຊີວິດກວ່າ 2.6 ລ້ານຄົນຕໍ່ປີ ຈາກຄວາມຜິດພາດທີ່ສາມາດປ້ອງກັນໄດ້ໃນການເບິ່ງແຍງຄົນເຈັບ.
ການສ້າງມາດຕະຖານຄວາມປອດໄພທີ່ເຂັ້ມງວດ ຈຶ່ງເປັນຫົວໃຈສໍາຄັນຂອງການບໍລິການດ້ານສາທາລະນະສຸກ.
ເປົ້າໝາຍ ແລະ ການເຄື່ອນໄຫວຫຼັກ:
ເພີ່ມຄວາມຕື່ນໂຕຂອງສັງຄົມ: ໃຫ້ປະຊາຊົນ ແລະ ຄອບຄົວຂອງຄົນເຈັບ ມີສ່ວນຮ່ວມໃນການຕັດສິນໃຈ ແລະ ສອບຖາມຂໍ້ມູນການປິ່ນປົວຢ່າງເປີດກວ້າງ.
ຍົກລະດັບມາດຕະຖານການແພດ: ສົ່ງເສີມໃຫ້ບຸກຄະລາກອນທາງການແພດແລະ ພະຍາບານ ປະຕິບັດຕາມຂັ້ນຕອນຄວາມປອດໄພຢ່າງເຄັ່ງຄັດ ເຊັ່ນ: ການກວດເຊັກຢາ, ການຜ່າຕັດ, ແລະ ການຄວບຄຸມການຕິດເຊື້ອ.
ສ້າງນະໂຍບາຍທີ່ເຂັ້ມແຂງ: ຮຽກຮ້ອງໃຫ້ພາກລັດ ແລະ ສະຖາບັນສຸຂະພາບ ລົງທຶນໃສ່ລະບົບຄວາມປອດໄພ ແລະ ສ້າງສະພາບແວດລ້ອມການເຮັດວຽກທີ່ເອື້ອອຳນວຍຕໍ່ບຸກຄະລາກອນ.
ສຽງຂອງຄົນເຈັບ ແລະ ຄວາມເອົາໃຈໃສ່ຂອງບຸກຄະລາກອນທາງການແພດ ຄືກຸນແຈສຳຄັນໃນການສ້າງ “ການປິ່ນປົວທີ່ປອດໄພ” ໃຫ້ກັບທຸກຄົນ!
