ທ່ານເຄີຍຈິນຕະນາການບໍ່ວ່າ ຫາກທ່ານເດີນທາງໄປປະເທດໜຶ່ງ ແລ້ວຄືໄດ້ “ຍ້ອນເວລາກັບໄປອະດີດເຖິງ 7 ປີ” ມັນຈະເປັນແນວໃດ? ບອກເລີຍວ່າເລື່ອງນີ້ບໍ່ແມ່ນເລື່ອງໃນໜັງວິທະຍາສາດ ແຕ່ມັນຄືເລື່ອງຈິງທີ່ກຳລັງເກີດຂຶ້ນຢູ່ ປະເທດເອທິໂອປີ ດິນແດນແຫ່ງອາຟຣິກາຕາເວັນອອກ ທີ່ເຮັດໃຫ້ຄົນທົ່ວໂລກຕ້ອງງຶດງໍ້.
ຂະນະທີ່ຄົນທົ່ວໂລກກຳລັງໃຊ້ຊີວິດຢູ່ໃນປີ 2026 ແຕ່ປະຕິທິນທ້ອງຖິ່ນຂອງເອທິໂອປີ ແມ່ນພວມຢູ່ໃນປີ 2019 ເທົ່ານັ້ນ! ແລ້ວເປັນຫຍັງພວກເຂົາຄືມີເວລາທີ່ແຕກຕ່າງຈາກຊາວໂລກ? ນັກປະຫວັດສາດ ແລະ ນັກວິທະຍາສາດມີຄຳຕອບແນວໃດ? ມາຫາຄຳຕອບນຳກັນເລີຍ
ເປັນຫຍັງຈຶ່ງຊ້າກວ່າຊາວໂລກ 7-8 ປີ?
ຈຸດເລີ່ມຕົ້ນຂອງຄວາມມະຫັດສະຈັນນີ້ ມາຈາກ “ວິທີການຄຳນວນວັນປະສູດຂອງພຣະເຢຊູ” ທີ່ແຕກຕ່າງກັນ:
• ປະຕິທິນສາກົນ: ທີ່ພວກເຮົາໃຊ້ກັນໃນປັດຈຸບັນ ຖືກຕັ້ງຂຶ້ນໂດຍ ສັນຕະປາປາ ເກຣກໍຣີ ທີ 13 (Pope Gregory XIII) ໃນປີ ຄ.ສ 1582 ໂດຍມີການປ່ຽນແປງວິທີການຄຳນວນວັນປະສູດຂອງພຣະເຢຊູໃໝ່.
• ປະຕິທິນເອທິໂອປີ (Ge’ez Calendar): ພວກເຂົາບໍ່ຍອມຮັບການປ່ຽນແປງນັ້ນ ແລະ ຍັງຄົງຍຶດໝັ້ນໃນການຄຳນວນຕາມ “ປະຕິທິນອານານິຢັດ” ຂອງສາສະໜາຄຣິດຕົນອໍໂທດອກ (Orthodox Church) ແບບດັ້ງເດີມ ເຊິ່ງຄຳນວນວ່າ ພຣະເຢຊູປະສູດຊ້າກວ່າການຄຳນວນຂອງຝັ່ງໂລກຕາເວັນຕົກ ປະມານ 7 ຫາ 8 ປີ.
ດ້ວຍເຫດນີ້, ເມື່ອໂລກຕາເວັນຕົກປ່ຽນໄປໃຊ້ປະຕິທິນໃໝ່, ເອທິໂອປີ ຈຶ່ງເລືອກທີ່ຈະຮັກສາຮາກເຫງົ້າທາງປະຫວັດສາດຂອງຕົນເອງໄວ້ ຈົນກາຍເປັນເອກະລັກມາເຖິງປັດຈຸບັນ.
ມະຫັດສະຈັນ 1 ປີ ມີ 13 ເດືອນ
ບໍ່ພຽງແຕ່ປີຄຣິດສະກະລາດຈະບໍ່ຄືໝູ່ແລ້ວ, ລະບົບເດືອນຂອງເອທິໂອປີ ກໍຍັງສ້າງຄວາມປະຫຼາດໃຈໃຫ້ກັບນັກວິທະຍາສາດ ເພາະພວກເຂົາມີເຖິງ 13 ເດືອນ ໃນໜຶ່ງປີໂດຍມີການແບ່ງດັ່ງນີ້:
• ເດືອນທີ 1 ຫາ ເດືອນທີ 12: ຈະມີ 30 ວັນເທົ່າກັນເປະ ໃນທຸກໆເດືອນ (ບໍ່ມີ 28, 29 ຫຼື 31 ວັນ ຄືປະຕິທິນສາກົນ).
• ເດືອນທີ 13 (ມີຊື່ວ່າ: ປາກູເມ – Pagume): ຈະເປັນເດືອນພິເສດທີ່ຢູ່ທ້າຍປີ ໂດຍຈະມີພຽງແຕ່ 5 ວັນ (ຫຼື ມີ 6 ວັນ ໃນປີອະທິກະສຸຣະທິນ ທີ່ເປັນປີໂດດ).
ການຄຳນວນແບບນີ້ ເຮັດໃຫ້ຈຳນວນວັນລວມກັນໃນ 1 ປີ ຂອງພວກເຂົາມີ 365 ຫຼື 366 ວັນ ເທົ່າກັບປະຕິທິນສາກົນ ພຽງແຕ່ມີການຈັດສັນລະບົບວັນ ແລະ ເດືອນ ທີ່ແຕກຕ່າງອອກໄປນັ້ນເອງ.
ແຖມທ້າຍ: ເວລາ 24 ຊົ່ວໂມງ ກໍບໍ່ຄືຊາວໂລກ!
ຄວາມມະຫັດສະຈັນຍັງບໍ່ໝົດພຽງເທົ່ານັ້ນ! ເພາະເອທິໂອປີ ຍັງມີການນັບເວລາ 1 ວັນ (24 ຊົ່ວໂມງ) ທີ່ບໍ່ຄືໃຜ ໂດຍພວກເຂົາຈະເລີ່ມນັບ ຊົ່ວໂມງທີ 1 ຂອງວັນ (01:00) ຕອນທີ່ “ຕາເວັນຂຶ້ນ” (ປະມານ 06:00 ໂມງເຊົ້າ ຂອງປະຕິທິນສາກົນ) ແລະ ນັບຊົ່ວໂມງທີ 1 ຂອງຕອນກາງຄືນ ຕອນທີ່ຕາເວັນຕົກດິນ .
ດັ່ງນັ້ນ, ຫາກທ່ານຈະນັດຄົນເອທິໂອປີ ຕອນ 10 ໂມງເຊົ້າ, ທ່ານຕ້ອງບອກພວກເຂົາວ່າ “ມາເຈິ ກັນຕອນ 4 ໂມງເຊົ້າ” (ເພາະມັນຄືຊົ່ວໂມງທີ 4 ຫຼັງຈາກຕາເວັນຂຶ້ນ) .
ສະຫຼຸບ
ປະເທດເອທິໂອປີ ຖືເປັນໜຶ່ງໃນບໍ່ເທົ່າໃດປະເທດໃນໂລກ ທີ່ຍັງຄົງຮັກສາລະບົບເວລາ ແລະ ປະຕິທິນບູຮານຂອງຕົນເອງໄວ້ໄດ້ຢ່າງໜ້າອັດສະຈັນ ເຊິ່ງມັນບໍ່ໄດ້ເກີດຈາກຄວາມຫຼ້າຫຼັງ ແຕ່ເກີດຈາກຄວາມພາກພູມໃຈໃນປະຫວັດສາດ, ວັດທະນະທຳ ແລະ ວິທະຍາສາດການຄຳນວນອັນເກົ່າແກ່ ທີ່ສືບທອດກັນມາຫຼາຍພັນປີ.
ແຫຼ່ງຂໍ້ມູນອ້າງອີງ:
• BBC Travel
• National Geographic
