1. ເຄັ່ງຕຶງເກີນຈິງ ແລະ ຄວບຄຸມຕົນເອງບໍ່ໄດ້
ມັກມີຄວາມຢ້ານກົວ ແລະ ກັງວົນໃນສິ່ງທີ່ຍັງບໍ່ທັນເກີດຂຶ້ນ, ຄິດໄປໄກໃນແງ່ລົບ, ສະໝອງບໍ່ຍອມຢຸດຄິດ ຈົນຮູ້ສຶກວ່າບໍ່ສາມາດຄວບຄຸມຄວາມຄິດ ຫຼື ອາລົມຂອງຕົນເອງໄດ້.
2. ໃຈສັ່ນ, ແໜ້ນໜ້າເອິກ ແລະ ຫາຍໃຈບໍ່ອີ່ມ
ອາການທາງຮ່າງກາຍຈະສະແດງອອກມາຢ່າງຊັດເຈນເຊັ່ນ: ຫົວໃຈເຕັ້ນໄວ, ຮູ້ສຶກແໜ້ນໜ້າເອິກຄືຊິຫາຍໃຈບໍ່ອອກ, ມືສັ່ນ ແລະ ມີເຫື່ອອອກຕາມຝາມື ຫຼື ຕາມຮ່າງກາຍໄດ້ງ່າຍກວ່າປົກກະຕິ.
3. ອ່ອນເພຍບໍ່ມີສາເຫດ, ນອນບໍ່ຫຼັບ ແລະ ກ້າມຊີ້ນຕຶງ
ຮ່າງກາຍຮູ້ສຶກອິດເມື່ອຍຢູ່ຕະຫຼອດເວລາ ເຖິງແມ່ນວ່າຈະບໍ່ໄດ້ເຮັດວຽກໜັກ, ມີບັນຫາເລື່ອງການນອນຫຼັບ (ຫຼັບຍາກ ຫຼື ສະດຸ້ງຕື່ນກາງດຶກ) ມີຄວາມຮູ້ສຶກກ້າມຊີ້ນຕຶງຄຽດຕາມບ່າໄຫຼ່ ຫຼື ຕົວກາຍ.
4. ສະໝອງຕຶ້ງ, ຂີ້ລືມງ່າຍ ແລະ ຫງຸດຫງິດງ່າຍ
ຮູ້ສຶກຄິດອັນໃດບໍ່ອອກ (ສະໝອງຕຶ້ງ), ຄວາມຈຳໄລຍະສັ້ນຫຼຸດລົງເຮັດໃຫ້ລືມງ່າຍ ແລະ ມີຄວາມອົດທົນຕໍ່າລົງ ສົ່ງຜົນໃຫ້ຫງຸດຫງິດງ່າຍກວ່າປົກກະຕິກັບເລື່ອງເລັກໆນ້ອຍໆ.
3 ວິທີຮັບມືເບື້ອງຕົ້ນ ດ້ວຍຕົນເອງ
ຫາກທ່ານເລີ່ມຮູ້ສຶກວ່າຕົນເອງ ຫຼື ຄົນອ້ອມຂ້າງມີອາການເຫຼົ່ານີ້, ຢ່າຟ້າວຕົກໃຈ! ເຮົາມີ 3 ວິທີງ່າຍໆ ທີ່ຈະຊ່ວຍຜ່ອນຄາຍອາການໄດ້:
ວິທີທີ 1: ຝຶກຫາຍໃຈເຂົ້າ-ອອກເລິກໆ
ເມື່ອຮູ້ສຶກກັງວົນ ໃຫ້ສູດຫາຍໃຈເຂົ້າເລິກໆ 4 ວິນາທີ ກັ້ນຫາຍໃຈໄວ້ 4 ວິນາທີ ຜ່ອນລົມຫາຍໃຈອອກ 4 ວິນາທີ. ການເຮັດແບບນີ້ຈະຊ່ວຍປັບອັດຕາການເຕັ້ນຂອງຫົວໃຈ ແລະ ເຮັດໃຫ້ລະບົບປະສາດສະຫງົບລົງ.
ວິທີທີ 2: ຫຼຸດຄາເຟອີນ ແລະ ປັບເວລານອນ
ຄວນຫຼຸດຜ່ອນການດື່ມກາເຟ ຫຼື ຊາ ເພາະຄາເຟອີນຈະໄປກະຕຸ້ນໃຫ້ຫົວໃຈເຕັ້ນໄວ ແລະ ເພີ່ມຄວາມວິຕົກກັງວົນ. ພ້ອມນັ້ນ, ຄວນເຂົ້ານອນໃຫ້ເປັນເວລາ ແລະ ຢືດຢຽດຮ່າງກາຍເພື່ອຫຼຸດຄວາມຕຶງຂອງກ້າມຊີ້ນ.
ວິທີທີ 3: ພົບຊ່ຽວຊານ ຫຼື ຈິດແພດ
ຫາກອາການເຫຼົ່ານີ້ເກີດຂຶ້ນຕໍ່ເນື່ອງ ແລະ ສົ່ງຜົນກະທົບຕໍ່ການດຳລົງຊີວິດ ເກີນ 2 ອາທິດ, ການໄປພົບຈິດຕະແພດ ຫຼື ນັກຈິດວິທະຍາແມ່ນທາງອອກທີ່ດີທີ່ສຸດ. ຈື່ໄວ້ວ່າ: ການດູແລສຸຂະພາບຈິດບໍ່ແມ່ນເລື່ອງໜ້າອາຍ ແຕ່ມັນຄືການຮັກສາຕົນເອງທີ່ກ້າຫານທີ່ສຸດ.
ທີ່ມາ: TNN Health
