ສື່ຕ່າງປະເທດລາຍງານວ່າ ປະເທດຈີນກຳລັງເລັ່ງຜັກດັນໂຄງການ “ໂຮງຮຽນອັດສະລິຍະ” (Smart Campus) ໂດຍນຳເທັກໂນໂລຢີ AI ແລະ Big Data ມານຳໃຊ້ໃນການຄວບຄຸມ ແລະ ວິເຄາະພຶດຕິກຳຂອງນັກຮຽນໃນຫ້ອງຮຽນ ຢ່າງລະອຽດແບບເວລາຈິງ.
ລະບົບດັ່ງກ່າວ ບໍ່ພຽງແຕ່ກວດສອບການເຂົ້າ-ຂາດຮຽນ ແຕ່ຍັງສາມາດກວດຈັບພຶດຕິກຳຕ່າງໆ ເຊັ່ນ ການກົ້ມໜ້າ, ການເງີຍໜ້າຟັງບົດຮຽນ, ສີໜ້າ ແລະ ລະດັບຄວາມຈົດຈໍ່ຂອງນັກຮຽນໄດ້ຢ່າງແມ່ນຍຳ.
ຂໍ້ມູນລ່າສຸດລະບຸວ່າ ປັດຈຸບັນມີໂຮງຮຽນມັດທະຍົມໃນຈີນປະມານ 68% ໄດ້ນຳໃຊ້ລະບົບນີ້ແລ້ວ ແລະ ທາງການຈີນວາງແຜນຂະຫຍາຍໃຫ້ຄອບຄຸມທົ່ວປະເທດພາຍໃນປີ 2030.
ອີງຕາມ “ປື້ມຂາວການສຶກສາອັດສະລິຍະ” ຂອງກະຊວງສຶກສາທິການຈີນ ລະບຸວ່າ ນະໂຍບາຍນີ້ເລີ່ມມາຕັ້ງແຕ່ປີ 2018 ພາຍໃຕ້ “ແຜນພັດທະນາຂໍ້ມູນຂ່າວສານການສຶກສາ 2.0” ໂດຍໃນໄລຍະແລກ ໄດ້ນຳໃຊ້ເທັກໂນໂລຢີຈົດຈຳໃບໜ້າເພື່ອຄວບຄຸມການເຂົ້າ-ອອກໂຮງຮຽນ ແລະ ຫໍພັກນັກຮຽນ.
ຕໍ່ມາ ລະບົບໄດ້ຖືກພັດທະນາໃຫ້ກາຍເປັນ AI ອັດສະລິຍະແບບຄົບວົງຈອນ ໂດຍຮອດເດືອນຕຸລາ 2025 ຈີນໄດ້ສ້າງ “ຫ້ອງຮຽນອັດສະລິຍະ” ແລ້ວ 469 ຫ້ອງ
ຝ່າຍບໍລິຫານໂຮງຮຽນ ສາມາດຕິດຕາມຂໍ້ມູນຜ່ານລະບົບ “ບັນທຶກການສອນແບບປົກກະຕິ” ເພື່ອກວດສອບ “4 ອັດຕາໃນຫ້ອງຮຽນ” ປະກອບມີ:
ອັດຕາການເຂົ້າຮຽນ
ອັດຕາການເງີຍໜ້າຟັງບົດຮຽນ
ອັດຕາການນັ່ງແຖວໜ້າ
ອັດຕາການມີສ່ວນຮ່ວມໃນຫ້ອງຮຽນ
ປັດຈຸບັນ ໂຮງຮຽນໃນຈີນມີການຕິດຕັ້ງກ້ອງວົງຈອນປິດຢ່າງໜ້ອຍ 2 ຈຸດໃນແຕ່ລະຫ້ອງຮຽນ ເພື່ອກວດຈັບພຶດຕິກຳ ແລະ ໃຫ້ຄະແນນຄວາມຕັ້ງໃຈຂອງນັກຮຽນ ຖ້າຂາດຄວາມຈົດຈໍ່ ອາດຖືກຫັກຄະແນນ.
ນອກຈາກນັ້ນ AI ຍັງຖືກນຳໃຊ້ໃນການສອບເສັງລະດັບຊາດ “Gaokao” ຫຼື ການສອບເສັງເຂົ້າມະຫາວິທະຍາໄລຂອງຈີນ ໂດຍມີລະບົບ AI ກວດກາອັດສະລິຍະ ຮ່ວມກັບປະຕູກວດຄວາມປອດໄພ ແລະ ລະບົບຢືນຢັນຕົວຕົນດ້ວຍຂໍ້ມູນຊີວະພາບ ເພື່ອກວດຈັບພຶດຕິກຳຜິດປົກກະຕິໃນຫ້ອງສອບເສັງ.
ຂໍ້ມູນຈາກ: hkepc
ຮຽບຮຽງ: Lao Youth Radio
