ກົມສາມັນສຶກສາ ກະຊວງສຶກສາທິການ ແລະ ກິລາ (ສສກ) ຮ່ວມກັບ ສະຖາບັນສອນພາສາອັງກິດ/ຈີນ (ELIC) ຈາກສະຫະລັດອາເມຣິກາ ໄດ້ບັນລຸຂໍ້ຕົກລົງຮ່ວມກັນ ເພື່ອສືບຕໍ່ໂຄງການພັດທະນາຄູສອນພາສາອັງກິດ ໄລຍະທີ III (2026-2031) ເນັ້ນຂະຫຍາຍການຊ່ວຍເຫຼືອສູ່ຊັ້ນປະຖົມສຶກສາຢ່າງເປັນທາງການ.
ພິທີເຊັນບົດບັນທຶກຄວາມເຂົ້າໃຈ (MOU) ໄດ້ຈັດຂຶ້ນຢ່າງເປັນທາງການໃນວັນທີ 8 ພຶດສະພາ 2026 ທີ່ໂຮງແຮມ ນິວໂລດ, ນະຄອນຫຼວງວຽງຈັນ. ໂດຍການລົງນາມຂອງ:
ທ່ານ ນາງ ນວມຄໍາ ຈັນທະບູລີ, ຫົວໜ້າກົມສາມັນສຶກສາ.
ທ່ານ ເຊນ ໂດນຣອນ (Shane Donrone), ຜູ້ອໍານວຍການອົງການ ELIC ປະຈໍາ ສປປ ລາວ.
ໂຄງການໄລຍະທີ III ນີ້ ມີມູນຄ່າການຊ່ວຍເຫຼືອລວມທັງໝົດ 261,346 ໂດລາສະຫະລັດ, ເຊິ່ງຈະສຸມໃສ່ການພັດທະນາບຸກຄະລາກອນຄູໃນ 4 ແຂວງເປົ້າໝາຍ ຄື: ຫຼວງນໍ້າທາ, ອຸດົມໄຊ, ຫຼວງພະບາງ ແລະ ບໍລິຄໍາໄຊ.
ຜົນສຳເລັດ 10 ປີຜ່ານມາ (2015-2025): ສາມາດກໍ່ສ້າງ ແລະ ພັດທະນາຄູສອນພາສາອັງກິດຊັ້ນມັດທະຍົມໄດ້ 811 ຄົນ ຈາກ 313 ໂຮງຮຽນ ໃນ 25 ເມືອງ.
ແຜນການໄລຍະໃໝ່ (2026-2031): ຕັ້ງເປົ້າພັດທະນາຄູສອນໃຫ້ໄດ້ຫຼາຍກວ່າ 700 ຄົນ. ຈຸດເດັ່ນຂອງໄລຍະນີ້ແມ່ນ ການຂະຫຍາຍໂຄງການໄປສູ່ຊັ້ນປະຖົມສຶກສາເປັນຄັ້ງທຳອິດ ໃນບາງເຂດເປົ້າໝາຍ ເພື່ອສ້າງພື້ນຖານພາສາອັງກິດໃຫ້ແໜ້ນແຟ້ນແຕ່ເຍົາໄວ.
ໃນໂອກາດນີ້, ທ່ານ ນາງ ນວມຄໍາ ຈັນທະບູລີ ໄດ້ຊີ້ທິດເຍືອງທາງໃຫ້ພະແນກສຶກສາທິການ ແລະ ກີລາແຂວງ ປະສານງານກັບທ້ອງຖິ່ນຢ່າງໃກ້ຊິດ ເພື່ອຮັບປະກັນໃຫ້ຄູສອນໄດ້ເຂົ້າຮ່ວມກິດຈະກໍາຢ່າງເຕັມເມັດເຕັມໜ່ວຍ.
ການຮ່ວມມືຄັ້ງນີ້ ຖືເປັນຍຸດທະສາດສຳຄັນໃນການຍົກລະດັບຄຸນນະພາບການຮຽນ-ການສອນພາສາອັງກິດໃນລາວ ໃຫ້ກ້າວສູ່ມາດຕະຖານສາກົນ ແລະ ສ້າງຂີດຄວາມສາມາດໃຫ້ແກ່ນັກຮຽນລາວ ໃນການເຊື່ອມໂຍງກັບພາກພື້ນ ແລະ ໂລກ.
ຂໍ້ມູນຈາກ: ວຽງຈັນໃໝ່
ຮຽບຮຽງໂດຍ: Lao Youth Radio FM 90MHz
