ຕາມກົດໝາຍແຮງງານຂອງ ສປປ ລາວ ໄດ້ມີການກຳນົດໃຫ້ວັນກຳມະກອນສາກົນ ເຊິ່ງກົງກັບວັນທີ 1 ພຶດສະພາ ຂອງທຸກໆປີ ເປັນມື້ພັກທີ່ລູກຈ້າງ ຫຼື ຜູ້ອອກແຮງງານ ພ້ອມໄດ້ຮັບຄ່າແຮງງານ ເທົ່າກັບຄ່າແຮງງານ ຄືໃນມື້ເຮັດວຽກ ຖ້າຫາກຝ່າຝືນຖືວ່າມີຄວາມຜິດ.
ວັນທີ 1 ພຶດສະພາຂອງທຸກໆປີ ເປັນວັນກຳມະກອນສາກົນ ເຊິ່ງເປັນວັນເພື່ອທີ່ໃຫ້ສັງຄົມໄດ້ຄຳນຶງເຖິງຄວາມສຳຄັນຂອງຜູ້ອອກແຮງງານ ແລະໃຫ້ຜູ້ອອກແຮງງານໄດ້ຮ່ວມສະເຫຼີມສະຫຼອງໃນໂອກາດວັນກຳມະກອນສາກົນ. ທັງນີ້ ກົດໝາຍແຮງງານ ສະບັບປີ 2013 ໄດ້ກຳນົດໄວ້ໃນມາດຕາ 55 ກ່ຽວກັບມື້ພັກທາງລັດຖະການ ແລະ ມື້ພັກບຸນປະເພນີ ເຊິ່ງສຳລັບວັນກຳມະກອນສາກົນກຳນົດໃຫ້ພັກໜຶ່ງວັນໃນວັນທີ 1 ພຶດສະພາ 2026 ແລະ ໃຫ້ນາຍຈ້າງຈ່າຍຄ່າຈ້າງໃຫ້ກັບລູກຈ້າງໃນມື້ພັກນີ້ຄືກັບມື້ເຮັດວຽກປົກກະຕິ.
ແນວໃດກໍຕາມ ສຳລັບນາຍຈ້າງທີ່ບໍ່ອາດໃຫ້ລູກຈ້າງພັກວຽກໄດ້ ເນື່ອງຈາກລູກຈ້າງເຮັດວຽກໃນກິດຈະການໂຮງແຮມ, ສະຖານບັນເທີງ, ຮ້ານຂາຍອາຫານ, ຮ້ານຂາຍເຄື່ອງ, ສະຖານພະຍາບານ, ສະຖານບໍລິການທ່ອງທ່ຽວ, ວຽກງານຂົນສົ່ງ ແລະ ວຽກງານທີ່ມີລັກສະນະ ຫຼື ສະພາບຂອງວຽກຕ້ອງເຮັດຕິດຕໍ່ກັນໄປ ຖ້າຢຸດພັກຈະເສຍຫາຍກັບວຽກ, ໃຫ້ນາຍຈ້າງຕົກລົງກັບລູກຈ້າງວ່າ ຈະໃຫ້ຢຸດຊົດເຊີຍໃນມື້ອື່ນໆແທນ ຫຼື ຈະຈ່າຍຄ່າເຮັດວຽກເປັນໂມງ OT ຫຼື ລ່ວງເວລາ ໃນມື້ພັກໃຫ້ກັບລູກຈ້າງ.
ສຳລັບກໍລະນີທີ່ຕົກລົງກັນວ່າຈະຈ່າຍຄ່າເຮັດວຽກໃນມື້ພັກນັ້ນ, ນາຍຈ້າງຈະຕ້ອງຈ່າຍຄ່າຈ້າງໃຫ້ກັບລູກຈ້າງ 250% ຂອງຄ່າແຮງປົກກະຕິ ສຳລັບຊົ່ວໂມງເຮັດວຽກປົກກະຕິ, 300% ຂອງຄ່າແຮງປົກກະຕິສຳລັບຊົ່ວໂມງລະຫວ່າງ 16:00 – 22:00 ໂມງ ແລະ 350% ສຳລັບຊົ່ວໂມງລະຫວ່າງ 22:00 – 6:00 ໂມງເຊົ້າ.
ພ້ອມກັນນັ້ນ ກົດໝາຍແຮງງານຍັງກຳນົດມາດຕະການຕໍ່ກັບຜູ້ທີ່ລະເມີດໄວ້ ໂດຍມີທັງມາດຕະການສຶກສາອົບຮົມ, ກ່າວເຕືອນ, ລົງວິໄນ, ປັບໃໝ, ໂຈະກິດຈະການຊົ່ວຄາວ, ຖອນໃບອະນຸຍາດການດຳເນີນທຸລະກິດ ຫຼື ດຳເນີນຄະດີ ແລ້ວແຕ່ກໍລະນີໜັກເບົາ. ທັງນີຜູ້ອອກແຮງງານສາມາດສະເໜີຕໍ່ອົງການຄຸ້ມຄອງແຮງງານ ກໍລະນີພົບເຫັນການລະເມີດຕໍ່ຂໍ້ກຳນົດຂອງກົດໝາຍແຮງງານຕາມທີ່ເຮົາກ່າວມາຂ້າງເທິງ.
