ໃນວັນທີ 28 ມັງກອນ 2026 ທີ່ຜ່ານມາ, ແຂວງຈໍາປາສັກໄດ້ຈັດພິທີປະກາດລົບລ້າງຄູອາສາ ໃຫ້ກາຍເປັນພະນັກງານຄູ 100% ແລະ ເປັນບາດກ້າວໃໝ່ຂອງການພັດທະນາຂະແໜງງການສຶກສາ ທີ່ສະທ້ອນໃຫ້ເຫັນວ່າ ພັກ-ລັດ ໄດ້ເລັງເຫັນເຖິງຄວາມສຳຄັນ ແລະ ຍົກສູງບົດບາດຂອງບຸກຄະລາກອນທາງດ້ານການສຶກສາ, ໂດຍສະເພາະກໍແມ່ນຄູອາສາສະໝັກຜູ້ມີນ້ຳໃຈເສຍສະຫຼະໃນການປະຕິບັດໜ້າທີ່ວຽກງານເປັນແມ່ພິມຂອງຊາດ, ໜຶ່ງໃນນັ້ນກໍແມ່ນ ຄູ ສຸກສາຄອນ ທົງໄຊໂຍ ຄູອາສາຜູ້ໃຊ້ເວລາເຖິງ 1 ທົດສະວັດ ເພື່ອລໍຄອຍວັນທີ່ຝັນເປັນຈິງ.
ຄູ ສຸກສາຄອນ ທົງໄຊໂຍ ເປັນລູກຫລານຊາວນາທີ່ເມືອງສຸຂຸມາ ແຂວງຈຳປາສັກ ໃນປີ 2015 ພາຍຫຼັງຮຽນຈົບການສຶກສາ ຈາກວິທະຍາໄລຄູປາກເຊ ກໍໄດ້ຮັບຮູ້ເຖິງບັນຫາການຂາດແຄນຄູໃນບ້ານເກີດ ຈຶ່ງໄດ້ຕັດສິນໃຈເປັນຄູອາສາ ອາຊີບທີ່ເຮັດດ້ວຍໃຈ ບໍ່ມີຕົວເລກລັດຖະກອນ ແລະ ບໍ່ມີເງິນເດືອນ “ທັ້ງໆທີ່ລາວສາມາດເລືອກອາຊີບອື່ນໄດ້”.
ຕະຫຼອດ 10 ປີ ໃນອາຊີບຄູອາສາ, ຄູສຸກສາຄອນ ໄດ້ເຮັດວຽກຢູ່ໂຮງຮຽນ 3 ແຫ່ງ ແລະ ປັດຈຸບັນແມ່ນສອນຢູ່ທີ່ໂຮງຮຽນມັດທະຍົມຕອນຕົ້ນໂຄກກ່ອງ, ເຂດຫ່າງໄກສອກຫລີກ,ທີ່ຕ້ອງເດີນທາງຈາກບ້ານ ໄກກວ່າ 50 ກິໂລແມັດ ເພື່ອໄປເຮັດໜ້າທີ່ເປັນ “ແມ່ພິມຂອງຊາດ”.
ຄູ ສຸກສາຄອນ ທົງໄຊໂຍ ກ່າວວ່າ: ລາວສອນຢູ່ໂຮງຮຽນນ້ອຍໆ ທີ່ຂາດແຄນຫລາຍປັດໄຈ, ຕົນເອງຕ້ອງໄດ້ເຮັດບົດບາດຫຼາຍຢ່າງ ທັງເປັນຄູສອນ, ເປັນຄູປະຈຳຫ້ອງ; ກະກຽມບົດສອນຫລາຍວິຊາ, ຈັດກິດຈະກຳນອກໂມງຮຽນ; ເບິ່ງແຍງດູແລໃສ່ໃຈການຮຽນຂອງນັກຮຽນ, ຕິດຕາມຊີວິດການເປັນຢູ່ຂອງເຂົາເຈົ້າ.
ສາມາດເວົ້າໄດ້ວ່າ ຄູສຸກສາຄອນໄດ້ທຸ້ມເທທັງເຫື່ອແຮງ ແລະ ສະຕິປັນຍາເພື່ອການສຶກສາຂອງນັກຮຽນໃນເຂດຊົນນະບົດຫ່າງໄກສອກຫຼີກ ໃຫ້ຄ່ອຍໆເກີດດອກອອກຜົນພາຍໃຕ້ການສິດສອນ, ໂດຍສະເພາະໃນງານແຂ່ງຂັນສອບເສັງນັກຮຽນເກັ່ງວິຊາພາສາລາວຂັ້ນເມືອງ ນັກຮຽນຂອງເພິ່ນກໍສາມາດຍາດໄດ້ຮອງອັນດັບທີສອງ ແລະ ຮັບການຍ້ອງຍໍໃນຖານະຄູຕົວແບບໃນລະດັບເມືອງ ແລະ ແຂວງ.
ຕະຫລອດໄລຍະເວລາ 10 ປີຂອງການຍຶດໝັ້ນຕໍ່ອຸດົມການ: “ຄູຄືແມ່ພິມຂອງຊາດ, ຄູຄືຄົນຂອງພັກ” ບວກກັບຈິດໃຈທີ່ສັດຊື່ບໍລິສຸດ ແລະ ເຂັ້ມແຂງ.
ສຸກສາຄອນ ໄດ້ໃຊ້ເວລາໃນໄວໜຸ່ມ ແລະ ຄວາມມຸ່ງໝັ້ນຂອງຕົນເອງເພື່ອສະແດງໃຫ້ເຫັນຄວາມຮັບຜິດຊອບ ແລະ ແບກຫາບພາລະກິດຂອງໄວໜຸ່ມລາວຍຸກໃໝ່.
ຍ້ອນເຫັນໄດ້ເຖິງຜົນງານດັ່ງກ່າວ, ໃນວັນທີ 15 ສິງຫາ 2025 ທີ່ຜ່ານມາ ຄູສຸກສາຄອນ ໄດ້ເປັນໜຶ່ງໃນ 10 ຄົນ ທີ່ໄດ້ຮັບລາງວັນ “ຊາວໜຸ່ມຕົວແບບດີເດັ່ນ” ເຊິ່ງເປັນໂຄງການທີ່ຈັດໂດຍວິທະຍຸໂທລະພາບສູນກາງຈີນ CMG ປະຈຳລາວ ແລະ ສູນກາງຊາວຫນຸ່ມປະຊາຊົນປະຕິວັດລາວ.
ສິ້ນສຸດການລໍຄອຍ… ສູ່ບາດກ້າວໃໝ່ທີ່ໝັ້ນຄົງ, ໃນທີ່ສຸດ ສະຖານະພາບຄູອາສາສະໝັກທີ່ຍາວນານມາ 10 ປີ ກໍ່ສິ້ນສຸດລົງ ຄູສຸກສາຄອນ ທົງໄຊໂຍ ໄດ້ກາຍເປັນພະນັກງານລັດຖະກອນຢ່າງເຕັມຕົວ.
ຄູສຸກສາຄອນ ໄດ້ກ່າວອີກວ່າ ຕົນເອງສຸດທີ່ພາກພູມໃຈຈົນບໍ່ອາດຈະບັນຍາຍເປັນຄຳເວົ້າໄດ້ ແລະ ພ້ອມທີ່ຈະເຮັດໜ້າທີ່ນີ້ໃຫ້ດີທີ່ສຸດ ແລະ ຈະທຸ່ມເທສຸດຄວາມສາມາດ ເພື່ອຫຼໍ່ຫຼອມເຍົາວະຊົນລາວ ໃຫ້ກາຍເປັນໜໍ່ແໜງທີ່ເຂັ້ມແຂງຂອງປະເທດຊາດສືບຕໍ່ໄປ.
ຂໍສະແດງຄວາມຍິນດີ ແລະ ສັນລະເສີນ ຫົວໃຈຂອງ ຄູ ສຸກສາຄອນ ທົງໄຊໂຍ ແລະ ຄູອາສາທຸກໆທ່ານ ທີ່ໄດ້ບັນຈຸເປັນຄູລັດຖະກອນ 100%.
Cr: ສຸກສາຄອນ ທົງໄຊໂຍ, CMG
Lao Youth Radio FM90MHz
