“Happy Birthday to You” ບໍ່ໄດ້ເລີ່ມຕົ້ນຈາກງານລ້ຽງທີ່ຫຼູຫຼາ ແຕ່ມັນເກີດຈາກ “ຄວາມຮັກ ແລະ ຄວາມປາຖະໜາດີ” ຂອງສອງເອື້ອຍນ້ອງຄູສອນອະນຸບານໃນລັດ Kentucky ສະຫະລັດອາເມລິກາ. ໃນປີ 1893 Mildred J. Hill ແລະ Patty Smith Hill ໄດ້ຮ່ວມກັນແຕ່ງທໍານອງເພງງ່າຍໆ ເພື່ອໃຊ້ທັກທາຍເດັກນ້ອຍໃນຫ້ອງຮຽນທຸກໆເຊົ້າ. ໃນຕອນທໍາອິດ ເພງນີ້ມີຊື່ວ່າ “Good Morning to All” (ສະບາຍດີຕອນເຊົ້າທຸກໆຄົນ). ມັນເປັນບົດເພງທີ່ສ້າງຂຶ້ນເພື່ອໃຫ້ເດັກນ້ອຍຮູ້ສຶກເຖິງການຕ້ອນຮັບທີ່ອົບອຸ່ນ ແລະ ເລີ່ມຕົ້ນມື້ໃໝ່ດ້ວຍຮອຍຍິ້ມ.
ເມື່ອເວລາຜ່ານໄປ ດ້ວຍທໍານອງທີ່ຈົດຈໍາງ່າຍ ແລະ ຕິດຫູ ເດັກນ້ອຍ ແລະ ຜູ້ຄົນຈຶ່ງເລີ່ມປ່ຽນເນື້ອຮ້ອງຈາກການທັກທາຍຕອນເຊົ້າ ມາເປັນການອວຍພອນໃນວັນເກີດວ່າ “Happy Birthday to You” ໂດຍທີ່ບໍ່ມີໃຜຮູ້ແນ່ຊັດວ່າໃຜເປັນຜູ້ປ່ຽນເນື້ອຮ້ອງເປັນຄົນທໍາອິດ ແຕ່ພະລັງຂອງມັນໄດ້ແຜ່ຂະຫຍາຍໄປທົ່ວໂລກຢ່າງໄວວາ.
ຈາກຫ້ອງຮຽນນ້ອຍໆເພງນີ້ໄດ້ເດີນທາງຂ້າມທະວີບ ຂ້າມພາສາ ແລະ ຂ້າມວັດທະນະທໍາ. ບໍ່ວ່າທ່ານຈະຢູ່ມຸມໃດຂອງໂລກ ບໍ່ວ່າຈະທຸກ ຫຼື ມີ ເມື່ອທໍານອງນີ້ດັງຂຶ້ນມັນຄືສັນຍານແຫ່ງ ການສະເຫຼີມສະຫຼອງການມີຊີວິດຢູ່. ບົດເພງນີ້ເຕືອນໃຫ້ເຮົາຮູ້ວ່າ “ສິ່ງທີ່ມີຄ່າທີ່ສຸດ ອາດຈະບໍ່ແມ່ນຂອງຂວັນທີ່ລາຄາແພງ” ແຕ່ແມ່ນການທີ່ເຮົາມີໃຜບາງຄົນຢືນຢູ່ຄຽງຂ້າງແລ້ວຮ້ອງເພງນີ້ໃຫ້ເຮົາຟັງ.
ສອງເອື້ອຍນ້ອງຕະກູນ Hill ອາດບໍ່ເຄີຍຄາດຄິດວ່າ ບົດເພງສັ້ນໆທີ່ພວກເຂົາແຕ່ງຂຶ້ນດ້ວຍຄວາມຮັກທີ່ມີຕໍ່ເດັກນ້ອຍ ຈະກາຍເປັນ “ຄໍາອວຍພອນທີ່ຍິ່ງໃຫຍ່ທີ່ສຸດໃນໂລກ”. ມັນເປັນບົດເພງທີ່ເຊື່ອມໂຍງຫົວໃຈຂອງຄົນໃນຄອບຄົວ ໝູ່ເພື່ອນ ແລະ ຄົນຮັກເຂົ້າຫາກັນໃນມື້ທີ່ສໍາຄັນທີ່ສຸດຂອງຊີວິດ.
“ທຸກໆຄັ້ງທີ່ທ່ານຮ້ອງເພງ Happy Birthday ທ່ານກໍາລັງສົ່ງຕໍ່ມໍລະດົກແຫ່ງຄວາມຮັກທີ່ສອງເອື້ອຍນ້ອງໄດ້ຝາກໄວ້ໃຫ້ໂລກໃບນີ້ມາເປັນເວລາຮ້ອຍກວ່າປີ.”
ໝາຍເຫດ: “ສອງເອື້ອຍນ້ອງ Hill ເປັນເຈົ້າຂອງທຳນອງ ແຕ່ຜູ້ແຕ່ງເນື້ອຮ້ອງທີ່ກາຍເປັນຕຳນານນັ້ນ ຍັງຄົງເປັນບຸກຄົນປິດສະນາທີ່ໂລກບໍ່ເຄີຍຮູ້ຈັກ.” ນີ້ຄືເຫດຜົນໃນປີ 2016 ສານຂອງສະຫະລັດໄດ້ຕັດສິນໃຫ້ເພງນີ້ເປັນ “ຊັບສິນສາທາລະນະ” ເພາະບໍລິສັດທີ່ເຄີຍຖືລິຂະສິດ (Warner/Chappell) ບໍ່ສາມາດພິສູດໄດ້ວ່າໃຜເປັນຜູ້ແຕ່ງເນື້ອຮ້ອງ “Happy Birthday” ທີ່ແທ້ຈິງ ແລະ ສອງເອື້ອຍນ້ອງ Hill ກໍພຽງແຕ່ແຕ່ງທຳນອງໄວ້ເທົ່ານັ້ນ.
ເພງນີ້ໄດ້ຮັບການບັນທຶກສະຖິຕິໂລກວ່າເປັນ “ເພງພາສາອັງກິດທີ່ມີຄົນຮູ້ຈັກຫຼາຍທີ່ສຸດໃນໂລກ”
ທີ່ມາ: BBC News
