ນະຄອນຫຼວງວຽງຈັນ – ໂຄງການ Asia Kakehashi Project Plus ກຳລັງເປີດໃຫ້ທຶນການສຶກສາ 100 ທຶນ ສຳລັບນັກຮຽນມັດທະຍົມຈາກ 4 ປະເທດ ລວມທັງ ສປປ ລາວ, ກຳປູເຈຍ, ຫວຽດນາມ ແລະ ໄທ ເພື່ອໄປສືບຕໍ່ການສຶກສາຢູ່ໂຮງຮຽນມັດທະຍົມໃນປະເທດຍີ່ປຸ່ນ ພ້ອມທັງໄດ້ປະສົບການວັດທະນະທຳຍີ່ປຸ່ນ.
ໂຄງການນີ້ຈັດຂຶ້ນໂດຍລັດຖະບານຍີ່ປຸ່ນ ຮ່ວມກັບອົງການ AFS Intercultural Programs ເພື່ອສ້າງຄວາມສຳພັນລະຫວ່າງນັກຮຽນມັດທະຍົມໃນຍີ່ປຸ່ນ ແລະ ທົ່ວເອເຊຍ ຕັ້ງແຕ່ປີ 2023 ຫາ 2027.
ນັກຮຽນທີ່ຖືກຄັດເລືອກຈະໄດ້ຮັບທຶນເຕັມຈຳນວນ ເພື່ອໄປຮຽນຢູ່ໂຮງຮຽນມັດທະຍົມໃນຍີ່ປຸ່ນ. ນັກຮຽນຈະໄດ້ພັກຢູ່ຫໍພັກ ຫຼື ພັກກັບຄອບຄົວອຸປະຖຳ ພ້ອມທັງເຂົ້າຮ່ວມກິດຈະກຳດ້ານວັດທະນະທຳ, ຊຸມຊົນ ແລະ ອຸດສາຫະກຳ.
ຄຸນສົມບັດຜູ້ສະໝັກ
ໃນຮອບທີ 4 ນີ້, ທຶນການສຶກສາເປີດໃຫ້ກັບນັກຮຽນທີ່ມີອາຍຸ 15 ຫາ 18 ປີ ທີ່ເກີດລະຫວ່າງວັນທີ 2 ເມສາ 2008 ຫາ 1 ເມສາ 2011. ຜູ້ສະໝັກຕ້ອງເປັນນັກຮຽນຊັ້ນມັດທະຍົມຕອນຕົ້ນປີສຸດທ້າຍ ຫາ ມັດທະຍົມຕອນປາຍປີທີ 2.
ຜູ້ສະໝັກຕ້ອງມີຜົນການຮຽນດີ ໂດຍຕ້ອງໄດ້ຢ່າງໜ້ອຍ 60 ສ່ວນຮ້ອຍ ໃນແຕ່ລະວິຊາຈາກການສອບຄັ້ງລ່າສຸດ ແລະ ມີຄະແນນສະເລ່ຍຢ່າງໜ້ອຍ 70 ສ່ວນຮ້ອຍ ຕໍ່ວິຊາໃນໄລຍະ 2 ປີທີ່ຜ່ານມາ.
ກຳນົດເວລາສະໝັກ
ການສະໝັກອອນລາຍເປີດຕັ້ງແຕ່ວັນທີ 30 ມັງກອນ ຫາ 26 ກຸມພາ ນີ້. ການສອບພາສາອັງກິດອອນລາຍຈະຈັດຂຶ້ນໃນວັນທີ 1 ມີນາ, ຕິດຕາມດ້ວຍການສຳພາດໃນຕົ້ນເດືອນມີນາ. ລາຍລະອຽດ ກ່ຽວກັບທຶນ ແລະ ວິທີການສະໝັກ ອ່ານໄດ້ ຢູ່ລິ້ງ ກ້ອງຄອມເມັ້ນ.
ໂຄງການແລກປ່ຽນດ້ານວິຊາການນີ້ຈະດຳເນີນຕັ້ງແຕ່ເດືອນສິງຫາ ຫາ ທັນວາ ປີນີ້.
ນີ້ເປັນໂອກາດທີ່ດີສຳລັບເຍົາວະຊົນລາວທີ່ຕ້ອງການຂະຫຍາຍວິໄສທັດ ແລະ ພັດທະນາຄວາມສາມາດດ້ານພາສາ ແລະ ວັດທະນະທຳສາກົນ.
Lao Youth Radio
