ອີງຕາມຂໍ້ມູນຈາກກອງປະຊຸມຝຶກອົບຮົມ ກ່ຽວກັບສິດທິພິເສດທາງການຄ້າ ຂອງສະຫະຣາຊະອານາຈັກອັງກິດ ແລະ ລະບົບການຄ້າສໍາລັບປະເທດກໍາລັງພັດທະນາ ທີ່ໄດ້ຈັດຂຶ້ນໃນທ້າຍເດືອນກຸມພາ 2025 ຜ່ານມານີ້ ຢູ່ກະຊວງອຸດສາຫະກໍາ ແລະ ການຄ້າ ນະຄອນຫຼວງວຽງຈັນ ຮູ່ວ່າ: ສປປ ລາວ ໄດ້ມີການຮ່ວມມືທາງການຄ້າ ກັບຫຼາຍກວ່າ 60 ປະເທດ ໃນທົ່ວໂລກ, ໃນນັ້ນ ໄດ້ຮັບສິດທິພິເສດທາງການຄ້າຈາກ 42 ປະເທດ ຊຶ່ງລວມທັງຣາຊະອານາຈັກອັງກິດ.
ສປປ ລາວ ແລະ ອັງກິດ ໄດ້ມີການພົວພັນການຄ້າ ລະຫວ່າງສອງປະເທດ ຢ່າງຕໍ່ເນື່ອງ ພາຍໃຕ້ສິດທິພິເສດທີ່ໄດ້ຮັບ, ໃນນັ້ນ ມູນຄ່າການຄ້າສອງຝ່າຍ ໃນປີ 2024 ຜ່ານມາ ສາມາດບັນລຸໄດ້ 38,272,000 ໂດລາສະຫະລັດ (ມູນຄ່າການ ນໍາເຂົ້າຈາກອັງກິດ 20,426,000 ໂດລາສະຫະລັດ ແລະ ສົ່ງອອກໄປອັງກິດ 17,866,000 ໂດລາສະຫະລັດ). ສິນຄ້າຫຼັກ ທີ່ ສປປ ລາວ ສົ່ງອອກໄປອັງກິດ ລວມມີສິນຄ້າ ປະເພດ: ເກີບ, ເຄື່ອງນຸ່ງຫົ່ມ, ນໍ້າຕານ, ໝວກ ແລະ ອື່ນໆ. ສ່ວນສິນຄ້າຫຼັກ ທີ່ ສປປ ລາວ ນໍາເຂົ້າຈາກອັງກິດ ລວມມີສິນຄ້າປະເພດ: ເຫຼົ້າ, ວາຍ, ເບຍ, ພາຫະນະ ແລະ ອື່ນໆ.
ສໍາລັບ ການຝຶກອົບຮົມດັ່ງກ່າວ ແມ່ນມີຈຸດປະສົງ ເພື່ອສ້າງຄວາມເຂົ້າໃຈກ່ຽວກັບລະບົບການຄ້າ ສໍາລັບປະເທດກໍາລັງພັດທະນາ, ຂັ້ນຕອນການແຈ້ງພາສີ ແລະ ເຄື່ອງມືການອໍານວຍຄວາມສະດວກຕ່າງໆ ສຳລັບການຄ້າກັບສະຫະຣາຊະອານາຈັກອັງກິດ ໃຫ້ແກ່ພາກລັດ ແລະ ພາກທຸລະກິດ, ພ້ອມທັງ ເປັນເວທີໃນການແລກປ່ຽນຄໍາຄິດເຫັນກ່ຽວກັບຂໍ້ສະດວກ, ຂໍ້ຫຍຸ້ງຍາກໃນການດຳເນີນທຸລະກິດ ລະຫວ່າງ ສປປ ລາວ ແລະ ສະຫະຣາຊະອານາຈັກອັງກິດ.
ທີ່ມາ: ວຽງຈັນທາຍ
