ການໃຊ້ຢາສູບໄຟຟ້າໃນກຸ່ມໄວໜຸ່ມ ເເມ່ນນັບມື້ ນັບເພີ່ມຂຶ້ນຢ່າງຫຼວງຫຼາຍ ໃນທົ່ວໂລກ ລວມທັງ ສປປ ລາວ, ເຊິ່ງໄດ້ກາຍເປັນສິ່ງທີ່ໜ້າເປັນຫ່ວງທີ່ສຸດ ສຳລັບໄວໜຸ່ມ ເພາະເປັນໄວອາຍຸ ຂອງການຢາກຮູ້, ຢາກທົດລອງ ບວກກັບຮູບຊົງທີ່ທັນສະໄໝ, ມີຫຼາກຫຼາຍລົດຊາດ ຂອງ ຢາສູບໄຟຟ້າ ທີ່ມາເຈາະຈົງເຂົ້າເຖິງກຸ່ມ “ໄວໜຸ່ມ”. ຈຶ່ງເຮັດໃຫ້ໄວໜຸ່ມ ຊາວໜຸ່ມຫຼາຍຄົນ ຫຼົງໄຫຼ-ມົວເມົາ ກັບສິ່ງເສບຕິດທີ່ຜິດກົດໝາຍ ທີ່ມາໃນຮູບເເບບຂອງ “ຢາສູບໄຟຟ້າ” ນີ້.
ຢາສູບໄຟຟ້າ( Electronic Cigarette) ເປັນອຸປະກອນສູບອາຍນ້ຳ (vaporizer) ເຊິ່ງປະກອບດ້ວຍສານເຄມີຕ່າງໆ ທີ່ໃຊ້ກົນໄກໄຟຟ້າເພື່ອເຮັດໃຫ້ເກີດການນຳສົ່ງສານນິໂຄຕິນ ເຂົ້າສູ່ຮ່າງກາຍ ໂດຍບໍ່ຜ່ານຂະບວນການເຜົາໄໝ້ ຄືດັ່ງຢາສູບທຳມະດາ ເຊິ່ງຢາສູບໄຟຟ້າເຮັດວຽກໂດຍການໃຊ້ແບັດເຕີລີໃນການໃຫ້ຄວາມຮ້ອນເເກ່ຂອງເຫຼວທີ່ເຮົາເອີ້ນວ່າ ” ນ້ຳຢາສູບໄຟຟ້າ (e-liquuid) ” ຈົນເກີດການລະເຫີຍອາຍ ເເລ້ວຜູ້ສູບກໍສູບເອົາອາຍດັ່ງກ່າວນັ້ນເຂົ້າສູ່ຮ່າງກາຍ.
ເຖິງເເມ່ນວ່າຄົນສ່ວນໃຫຍ່ ຈະຄິດວ່າ ຢາສູບໄຟຟ້ານັ້ນມີກິ່ນຫອມ ເເລະ ບໍ່ເປັນອັນຕະລາຍຕໍ່ສຸຂະພາບ, ເເຕ່ໃນຄວາມເປັນຈິງເເລ້ວ ຢາສູບໄຟຟ້າເປັນອີກສາເຫດໜຶ່ງທີ່ເຮັດໃຫ້ ຄົນເຮົາເສບຕິດ ເເລະ ມັນຍັງສົ່ງຜົນເສຍຕໍ່ສຸຂະພາບຂອງສະໝອງຂອງກຸ່ມຄົນທີ່ນຳໃຊ້ສິ່ງດັ່ງກ່າວນີ້ອີກນຳ. ນອກຈາກນັ້ນ, ກໍຍັງມີສານອື່ນໆ ທີ່ທຳລາຍລະບົບທາງເດີນຫາຍໃຈ ເເລະ ຫົວໃຈ ຂອງຄົນທີ່ນຳໃຊ້ ເເລະ ຄົນທີ່ໄດ້ສູບດົມເອົາກິ່ນອາຍຂອງຢາສູບໄຟຟ້າ ເຊັ່ນ: ໂພຣພິລີນໄກຄອນ(ສານທີ່ເຮັດໃຫ້ເກີດອາການໄອ) ເເລະ ສານເເຕ່ງກິ່ນທີ່ອາດກໍ່ໃຫ້ເກີດປອດຮຸນເເຮງ (Popcorn Lung) ຍ້ອນກິ່ນທີ່ຄົນເຮົາຄິດວ່າຫອມໆນັ້ນ ເເຕ່ຄວາມເປັນຈິງເເລ້ວມັນເເອບເເຝງໄປດ້ວຍຜົນຮ້າຍທີ່ເປັນອັນຕະລາຍຮ້າຍເເຮງທີ່ສຸດ.
ອີງຕາມການລາຍງານຂອງ ອົງການອະນາໄມໂລກ (WHO) ໄດ້ໃຫ້ຮູ້ວ່າ: ໃນທົ່ວໂລກມີຜູ້ສູບຢາປະມານ 1.1 ຕື້ຄົນ, ເເຕ່ລະປີ ຄົນທົ່ວໂລກຕາຍຍ້ອຍຢາສູບ ເຖິງ 8 ລ້ານຄົນ ເເລະ ອີກຫຼາຍກວ່າ 800,000 ຄົນຕາຍຍ້ອນພະຍາດທີ່ເກີດຈາກການໄດ້ຮັບຄັວນຢາສູບ. ນອກຈາກນີ້, ຍັງພົບວ່າເດັກ ເເລະ ໄວໜຸ່ມ ຈຳນວນຫຼວງຫຼາຍ ທີ່ລິເລີ່ມສູບຢາສູບໄຟຟ້າ ໄປພ້ອມໆກັບຢາສູບໂຮງງານ ເຮັດໃຫ້ມີຜົນຮ້າຍຕໍ່ສຸຂະພາບທີ່ເພີ່ມທະວີເປັນຫຼາຍເທົ່າ.
ອີງຕາມຂໍ້ມູນລ່າສຸດຂອງກະຊວງສາທາລະນະສຸກລາຍງານໃຫ້ຮູ້ວ່າ: ໃນປີ 2016 ພົບວ່າ ໄວໜຸ່ມຂອງ ສປປ ລາວ ອາຍຸ 13-15 ປີ ມີຜູ້ສູບຢາໄຟຟ້າ ເພດຊາຍ 5%, ເພດຍິງ 3,7% ແລະ ປັດຈຸບັນເຫັນວ່າ ສິ່ງດັ່ງກ່າວນີ້ມີຄວາມໜ້າເປັນຫ່ວງທີ່ສຸດ, ເມື່ອເຫັນວ່າ ໄວໜຸ່ມລາວທັງຍິງ ແລະ ຊາຍ ຫັນມາໃຊ້ຢາສູບໄຟຟ້າເພີ່ມຂຶ້ນ. ໃນນັ້ນ, ກໍຍັງມີການວິໄຈທີ່ພົບວ່າ ການນຳໃຊ້ຢາສູບໄຟຟ້າມີຄວາມສ່ຽງໃນການເປັນມະເຮັງສູງກວ່າ ຢາສູບທໍາມະດາເຖິງ 2,2 ເທົ່າ ເເລະ ການເປັນມະເຮັງທີ່ພົບເຫັນໃນຄົນສູບຢາໄຟຟ້າ ເເມ່ນມີຄວາມແຕກຕ່າງຈາກມະເຮັງທີ່ພົບເຫັນໃນທີ່ຄົນສູບຢາສູບທຳມະດາ. ນອກນັ້ນ, ການສູບຢາສູບໄຟຟ້າຍັງສ່ຽງຕໍ່ການເປັນພະຍາດປອດເຂົ້າຕອກແຕກ (Popcorn Lung) ຕື່ມອີກ.
ນອກຈາກນີ້, ກຸ່ມພວກບໍລິສັດຢາສູບໄຟຟ້າເອງ ກໍໄດ້ມີເລ່ຫຼ່ຽມກົນອຸບາຍການຕະຫຼາດຮູບແບບໃໝ່ອອກມາເລື້ອຍໆຕາມຍຸກຕາມສະໄໝ ໂດຍເຈາະເລິກກຸ່ມເປົ້າໝາຍ ນັ້ນກໍຄື “ເດັກນ້ອຍ ແລະ ໄວໜຸ່ມ” ເພື່ອເຮັດໃຫ້ເດັກເຫຼົ່ານັ້ນເກີດຄວາມສັບສົນ ເເລະ ເຂົ້າໃຈຜິດວ່າຢາສູບຮູບແບບໃໝ່ນີ້ ອາດຈະບໍ່ມີສ່ວນປະກອບຂອງຢາສູບທີ່ຮຸນເເຮງ, ເວລາສູບແລ້ວບໍ່ເຮັດໃຫ້ຕິດ ເເລະ ບໍ່ສົ່ງຜົນຮ້າຍຕໍ່ສຸຂະພາບ.
ຢາສູບໄຟຟ້າ ເເມ່ນມີຫຼາຍຮູບແບບ, ຖ້າຫາກຄົນສູບຈະໄດ້ຮັບນິໂກຕິນຂຶ້ນກັບຄວາມແຮງ ແລະ ປະລິມານການບັນຈຸຕາມລຳດັບຄື: ແບບເຂັ້ມຂຸ້ນສຸດ 36 mg, ເຂັ້ມຂຸ້ນຫຼາຍ 24 mg, ແບບເຂັ້ມຂຸ້ນ 16 mg, ແບບກາງໆ 11 mg ແລະ ແບບອ່ອນ 8 mg. ຢາສູບໄຟຟ້າມີລັກສະນະເປັນແທັງມີຂະໜາດໃຫຍ່ ເຊິ່ງເລີ່ມເປັນທີ່ນິຍົມໃຊ້ສູບໃນປີ 2011 ແລະ ຢາສູບໄຟຟ້າຍັງມີຫຼາຍຮູບແບບຄື: ແບບທີ 1 (Unregulated Mod) ຄວາມແຮງໄຟສູງ, ບໍ່ສາມາດຄວບຄຸມເເຮງໄຟໄດ້, ເຜົາໄໝ້ສູງ, ປັບແຕ່ງຫົວໄດ້ຫຼາກຫຼາຍ, ເຕີມນ້ຳຢາໄດ້ຫຼາກຫຼາຍ, ອາຍນ້ຳ/ຄວັນຫຼາຍທີ່ສຸດ, ໃຊ້ເວລາດົນໃນການປ່ຽນສຳລີ ແລະ ເຕີມນ້ຳ; ແບບທີ 2 Regular ສາມາດຄວບຄຸມຄວາມແຮງໄຟ, ເຜົາໄໝ້ຫຼາຍລະດັບ, ມີຫົວຫຼາກຫຼາຍແບບ, ເຕີມນໍ້າຢາໄດ້ຫຼາກຫຼາຍ ແລະ ມີຖັງເກັບນ້ຳ, ສະດວກສະບາຍໃນການໃຊ້ຕໍ່ເນື່ອງ, ສະດວກສະບາຍໃນການເຕີມນ້ຳຢາ ແລະ ເປັນຊະນິດທີ່ນິຍົມທີ່ສຸດໃນລາວ; ແບບທີ 3 ແລະ 4 Pod Mods ຫຼື Pod System ເປັນຢາສູບໄຟຟ້າຊະນິດທີ່ເນັ້ນການຮັບສານນິໂກຕິນ, ມີຂະໜາດນ້ອຍພົກພາສະດວກໃຊ້ງ່າຍເປັນທີ່ນິຍົມໃນປີ 2019 – ປັດຈຸບັນ. ພ້ອມນີ້, ຢາສູບໄຟຟ້າຍັງມີແບບ Open system ມີຊ່ອງໃຫ້ເຕີມນໍ້າຢາລົງໄປໃໝ່, ມີຫຼາກຫຼາຍສີ, ກິ່ນ ແລະ ຣົດຊາດແຕ່ຍາກໃນການເຕີມນ້ຳຢາ; ແບບ Closed System ບໍ່ຈໍາເປັນເຕີມນໍ້າຢາ, ສູບໝົດແລ້ວຖິ້ມປ່ຽນໃໝ່, ຫຼາກຫຼາຍສີ, ກິ່ນ ແລະ ຣົດຊາດກຳລັງເປັນທີ່ນິຍົມຫຼາຍ.
ອີງຕາມ ກົດໝາຍວ່າດ້ວຍການຄວບຄຸມຢາສູບ (ສະບັບປັບປຸງ) ເລກທີ 09/ສພຊ, ລົງວັນທີ 16 ພະຈິກ 2021 ໂດຍສະເພາະມາດຕາ 47 ທີ່ເວົ້າເຖິງຂໍ້ຫ້າມທົ່ວໄປວ່າ: ຫ້າມບຸກຄົນ, ຄອບຄົວ, ສັງຄົມ, ນິຕິບຸກຄົນ ແລະ ການຈັດຕັ້ງ ມີພຶດຕິກຳດັ່ງນີ້: ຊົມໃຊ້ຜະລິດຕະພັນຢາສູບຮູບແບບໃໝ່ເປັນຕົ້ນ ຢາສູບໄຟຟ້າ, ຢາສູບລະເຫີຍອາຍ, ຢາສູບຊີຊາ ຫຼື ບາຣາກູ ແລະ ມາດຕາ 49 ຂໍ້ຫ້າມສຳລັບຜູ້ຈຳໜ່າຍ, ຂາຍຍ່ອຍ ຜະລິດຕະພັນຢາສູບ. ຫ້າມຜູ້ຈຳໜ່າຍ, ຂາຍຍ່ອຍຜະລິດຕະພັນຢາສູບມີພຶດຕິກຳດັ່ງນີ້: ຫ້າມຈຳໜ່າຍ, ຊື້, ຂາຍຜະລິດຕະພັນຢາສູບຮູບແບບໃໝ່ເປັນຕົ້ນຢາສູບໄຟຟ້າ, ຢາສູບລະເຫີຍອາຍ, ຢາສູບຊີຊາ ຫຼື ບາລາກູ. ນອກຈາກນີ້, ກໍມີເເຈ້ງການຂອງພາກສ່ວນທີ່ກ່ຽວຂ້ອງຕ່າງໆອອກມາ ກ່ຽວກັບການເພີ່ມທະວີຕ້ານ ເເລະ ສະກັດກັ້ນຢາສູບໄຟຟ້າ ເປັນຈຳນວນຫຼາຍ.
ພ້ອມນັ້ນ, ຈຶ່ງຢາກໃຫ້ພໍ່ເເມ່ຜູ້ປົກຄອງເອົາໃຈໃສ່ໃນການເບິ່ງແຍງດູເເລລູກຫຼານຂອງຕົນເອງ ບໍ່ໃຫ້ໄປພົວພັນກັບສິ່ງເສບຕິດທີ່ມາໃນຮູບເເບບຂອງຢາສູບດັ່ງກ່າວເດັດຂາດ ເເລະ ຜູ້ປົກຄອງເອງ ກໍຍັງຕ້ອງໝັ່ນສັງເກດຕິດຕາມພຶດຕິກຳຂອງລູກຫຼານຂອງຕົນຢູ່ເລື້ອຍໆ ເພື່ອບໍ່ໃຫ້ພວກເຂົາໄປຫຍຸ້ງມົວເມົາກັບສິ່ງເສບຕິດທີ່ຜິດກົດໝາຍຊະນິດອື່ນໆອີກນຳ.
ໃນນັ້ນ, ກໍຍັງມີຄຳບອກກ່າວຈາກບຸກຄົນທີ່ໄດ້ໃຊ້ຢາສູບໄຟຟ້າ ເຊິ່ງຜູ້ກ່ຽວເອງກໍເປັນຄົນໜຶ່ງໄດ້ຮັບຜົນກະທົບຈາກການກະທຳດັ່ງກ່າວຂອງຕົນໃນການນຳໃຊ້ຢາສູບໄຟຟ້າ ຈົນເຮັດໃຫ້ເກີດອາການປອດຮົ່ວ, ເນື້ອຫຸ້ມປອດຈີກ ຈົນເຮົດໃຫ້ປອດມີລັກສະນະແພັບລົງ ໂດຍຜ້ກ່ຽວໄດ້ໃຫ້ຂໍ້ມູນວ່າອາການເບື້ອງຕົ້ນ ເເມ່ນ ເລີ່ມຈາກເຈັບແອວ, ເເລ້ວຫາຍໃຈບໍ່ຄ່ອຍອອກ ຈົນເຮັດໃຫ້ຕ້ອງໄດ້ຖືກນຳສົ່ງໄປໂຮງໝໍໂດຍດ່ວນນ ເເລ້ວທ່ານໝໍກໍໄດ້ໃສ່ທໍ່ລະບາຍອາກາດແຍ່ເຂົ້າປອດໃຫ້. ຈາກການກວດ ເເລະ ວິນິໃສ ໄດ້ໃຫ້ຮູ້ວ່າ: ຜູ້ກ່ຽວໄດ້ສູບຄວັນ ຈາກຢາສູບໄຟຟ້າມາເປັນຈຳນວນຫຼາຍ ເນື່ອງຈາກຜູ້ກ່ຽວເລີ່ມໃຊ້ຢາສູບໄຟຟ້າຕັ້ງເເຕ່ອາຍຸຍັງນ້ອຍ ບວກກັບຝຸ່ນຄວັນ, ມົນລະພິດຕ່າງໆ ຈົນເຮັດໃຫ້ເນື້ອຫຸ້ມປອດບາງ ຈົນຈີກຂາດ ເເລະ ເເພັບລົງ ເຮັດໃຫ້ບໍ່ສາມາດຫຍຸ້ງກ່ຽວກັບປະເພດຝຸ່ນ-ຄວັນ ຕະຫຼອດຊີວິດ. ສະນັ້ນ, ຈຶ່ງຢາກຝາກເຖິງບຸກຄົນທີ່ຢາກທົດລອງນຳໃຊ້ຢາສູບໄຟຟ້າ ເເລະ ຢາສູບປະເພດອື່ນໆ ໃຫ້ຢຸດເຊົານຳໃຊ້ສິ່ງອັນຕະລາຍປະເພດນີ້ ກ່ອນທີ່ຈະຊ້າເກີນໄປ.
ທ່ານ ປອ. ດຣ ບຸນເເຝງ ພູມມະໄລສິດ ລັດຖະມົນຕີກະຊວງສາທາລະນະສຸກ ກໍໄດ້ມີຄຳເຫັນກ່ຽວກັບຜົນຮ້າຍຂອງຢາສູບວ່າ: ສິ່ງທີ່ໜ້າເປັນຫ່ວງທີ່ສຸດໃນປັດຈຸບັນ ເເມ່ນເລື່ອງຢາສູບໄຟຟ້າທີ່ກຳລັງເເຜ່ລະບາດໃນເດັກ ເເລະ ໄວໜຸ່ມ, ເຊິ່ງຢາສູບຮູບເເບບນີ້ໄດ້ນຳໃຊ້ອຸປະກອນເສີມທີ່ມີສີສັນຫຼາກຫຼາຍ, ມີຄວາມທັນສະໄໝ ທີ່ໃຊ້ສານປຸງເເຕ່ງກິ່ນ ເເລະ ລົດຊາດ ທີ່ເດັກ-ໄວໜຸ່ມ ມີຄວາມຄຸ້ນເຄີຍ ເເລະ ນິຍົມຊົມຊອບ ເຮັດໃຫ້ເດັກເຂົ້າໃຈຜິດວ່າສິ່ງດັ່ງກ່າວເປັນສະໝູນໄພ, ບໍ່ເປັນອັນຕະລາຍຕໍ່ສຸຂະພາບ ເເຕ່ໃນຄວາມເປັນຈິງເເລ້ວຢາສູບໄຟຟ້າມີຄວາມອັນຕະລາຍຫຼາຍກວ່າຢາສູບທົ່ວໄປ ເນື່ອງຈາກການສູບນິໂຄຕິນສົດໆ ເເລະ ສານປຸງເເຕ່ງກິ່ນທີ່ມີຜົນກະທົບ ເເລ້ວອຸປະກອນຍັງສາມາດນຳໃຊ້ໃນການເສບສານເສບຕິດຊະນະອື່ນໄດ້ນຳອີກ. ເເລ້ວທ່ານກໍຍັງເວົ້າເຕືອນວ່າ ຢ່າໄປຫຍຸ້ງກ່ຽວພົວພັນກັບສິ່ງດັ່ງກ່າວ.
ການເຂົ້າເຖີງຢາສູບໄຟຟ້າໃນ ສປປ ລາວ ແມ່ນຍັງຖືວ່າເຂົ້າເຖິງງ່າຍກວ່າ ຢາເສບຕິດປະເພດອື່ນໆ ຍ້ອນດ້ວຍຮູບເເບບຜະລິດຕະພັນທີ່ມີຄວາມຫຼາກຫຼາຍ ເຮັດໃຫ້ຖືກອອກແບບມາໃຫ້ມີຫຼາຍສີສັນ, ຫຼາຍລົດຊາດ ທີ່ພັດທະນາ ແລະ ອອກແບບມາເພື່ອເຈາະຈົງ ກຸ່ມໄວໜຸ່ມໂດຍສະເພາະ ແລະ ຍ້ອນດ້ວຍລະບຽບກົດໝາຍທີ່ຍັງ ບໍ່ທັນຫັດກຸມເທົ່າທີ່ຄວນ ເຮັດໃຫ້ຢາສູບໄຟຟ້າຍັງເເຜ່ຫຼາຍຢູ່ໃນການຄ້າຂາຍຕາມອິນເຕີເນັດ, ຕາມຮ້ານຄ້າ, ຮ້ານອາຫານ ແລະ ຮ້ານບັນເທີງຕ່າງໆ.
ໄວໜຸ່ມ ປຽບດັ່ງໜໍ່ເເໜ່ງ ເເລະ ເປັນກຳລັງຂັບເຄື່ອນທີ່ສຳຄັນໃນການພັດທະນາປະເທດຊາດ ຖ້າຫາກວ່າກຸ່ມຄົນຈຳນວນນີ້ ໄປຫຍຸ້ງກ່ຽວພົວພັນກັບສິ່ງເສບຕິດປະເພດທີ່ເອີ້ນວ່າ “ຢາສູບໄຟຟ້າ” ກໍຈະເຮັດໃຫ້ພວກເຂົາເຫຼົ່ານັ້ນໄດ້ຮັບຜົນກະທົບໂດຍກົງຈາກການນຳໃຊ້ສິ່ງດັ່ງກ່າວ ເປັນຕົ້ນເເມ່ນບັນຫາທາງດ້ານສຸຂະພາບຮ່າງກາຍ. ສະນັ້ນ, ຈຶ່ງເຫັນໄດ້ວ່າສິ່ງທີ່ເຮັດໃຫ້ໄວໜຸ່ມ ໄປຫຼົງໄຫຼມົວເມົາກັບສິ່ງເສບຕິດປະເພດນີ້ ເເມ່ນຍ້ອນຄວາມຢາກຮູ້, ຢາກລອງ, ຄວາມຮູ້ເທົ່າບໍ່ເຫັນການ ຕາມການໂຄສະນາຊວນເຊື່ອຂອງກຸ່ມບໍລິສັດຢາສູບໄຟຟ້າ ທີ່ມາໃນຮູບເເບບທີ່ທັນສະໄໝຕິດພັນກັບເຕັກໂນໂລຊີ ເພື່ອຫຼອກລໍ້ໃຫ້ໄວໜຸ່ມ ມີຄວາມສົນໃຈ, ຫຼົງໄຫຼ ເເລະ ຕ້ອງການຄົ້ນຫາຕໍ່ການໃຊ້ງານຂອງສິ່ງດັ່ງກ່າວ, ເມື່ອເຮົາເຫັນໄດ້ເຖິງ ຜົນຮ້າຍຂອງມັນກໍຄວນທີ່ຈະຫຼີກລ່ຽງ ເເລະ ຢູ່ຫ່າງໄກຈາກສິ່ງເສບຕິດທີ່ມາໃນຮູບເເບບຂອງຢາສູບໄຟຟ້າ. ດັ່ງນັ້ນ, ຮັກຊີວິດຢ່າຄິດ “ຢາກລອງ” ເພາະຈະເຮັດໃຫ້ຕິດໄປຕະຫຼອດຊີວິດ ເເລະ ຢ່າປ່ອຍໃຫ້ຄວາມທັນສະໄໝ ເປັນສາເຫດເຮັດໃຫ້ເຮົາໄດ້ຜົນກະທົບທີ່ຮ້າຍເເຮງຈາກ “ຢາສູບໄຟຟ້າ”.
