ຫຼາຍຄົນອາດເຄີຍສັບສົນ ຫຼື ບາງທີກໍບໍ່ທັນແຍກອອກ ລະຫວ່າງ “ຄວາມຫຼົງໄຫຼ” ກັບ “ຄວາມຮັກ” ເຊິ່ງສອງຄຳນີ້ເບິ່ງຄືວ່າຈະມາພ້ອມກັນເລື້ອຍໆ ໂດຍສະເພາະໃນຄວາມສຳພັນຂອງຄົນສອງຄົນ, ແຕ່ຄວາມຈິງແລ້ວມັນແຕກຕ່າງກັນຫຼາຍເລີຍ.
1. ຄວາມຫຼົງໄຫຼ (Lust)
ເປັນຄວາມຮູ້ສຶກທີ່ເກີດຈາກແຮງດຶງດູດທາງເພດ, ຄວາມຕ້ອງການທາງກາຍ, ຄວາມເລົ້າໃຈ ຫຼື ຄວາມຫຼົງໄຫຼໃນຮູບຮ່າງໜ້າຕາ, ກິ່ນ, ສຽງ, ການສຳຜັດ ຫຼື ອັນໃດກໍຕາມທີ່ເຮັດໃຫ້ເຮົາຮູ້ສຶກ “ຢາກໄດ້”.
ເວົ້າງ່າຍໆກໍຄື: ຄວາມຫຼົງໄຫຼ ເເມ່ນສິ່ງທີ່ເກີດຂຶ້ນກັບຮ່າງກາຍແລະສະໝອງໄລຍະສັ້ນໆ, ມັນເລົ້າໂລມ, ຮຸນແຮງ, ແຕ່ກໍ່ຈາງຫາຍໄດ້ໄວເຊັ່ນກັນ ເຊິ່ງມັກຈະເກີດໃນໄລຍະທໍາອິດທີ່ຮູ້ຈັກກັນ ຫຼື ພົບກັນໃໝ່ໆ.
2. ຄວາມຮັກ (Love)
ຄວາມຮັກ ເເມ່ນສິ່ງທີ່ເລິກເຊິ່ງກວ່າ, ເປັນຄວາມຜູກພັນ, ຄວາມຫ່ວງໃຍ, ຄວາມເຂົ້າໃຈ, ການຍອມຮັບໃນຕົນຕົວຂອງກັນ ແລະ ກັນແມ່ນໃນມື້ທີ່ເຮົາບໍ່ສົມບູນເເບບ ເຊິ່ງມັນເປັນຄວາມຮູ້ສຶກທີ່ຄ່ອຍໆເຕີບໂຕເມື່ອເຮົາໄດ້ຮູ້ຈັກກັນຫຼາຍຂຶ້ນ, ຊ່ວຍເຫຼືອກັນ, ຮັບຟັງກັນ ແລະ ຜ່ານເລື່ອງຕ່າງໆມາດ້ວຍກັນ. ຄວາມຮັກບໍ່ໄດ້ຂຶ້ນຢູ່ກັບໜ້າຕາ ຫຼື ຮູບຮ່າງລັກສະນະພາຍນອກ, ແຕ່ມັນຄືການເລືອກທີ່ຈະຢູ່ຄຽງຂ້າງກັນ ເຖິງວ່າມື້ນັ້ນຈະແມ່ນມື້ທີ່ທຸກຢ່າງບໍ່ລຽບງ່າຍເລີຍ.
ແລ້ວເຮົາຈະຮູ້ໄດ້ແນວໃດວ່າອັນໃດຄືຮັກ, ອັນໃດຄືຄວາມຫຼົງໄຫຼ?
ລອງຖາມຕົວເອງເບິ່ງວ່າ:
– ທ່ານຍັງຢາກຢູ່ກັບລາວບໍ່ ແມ່ນແຕ່ໃນມື້ໜຶ່ງທີ່ລາວເຈັບປ່ວຍ ຫຼື ບໍ່ງາມຄືເກົ່າ?
– ທ່ານຄິດຮອດລາວແຕ່ຕອນຢາກກອດ ຫຼື ຄິດຮອດລາວເວລາເຫັນຫຍັງກໍຢາກເລົ່າໃຫ້ລາວຟັງ?
– ທ່ານຮູ້ສຶກປອດໄພ ເເລະ ສະບາຍໃຈເວລາມີລາວຢູ່ນຳບໍ່?
ເຊິ່ງຄຳຖາມເຫຼົ່ານີ້ຈະຊ່ວຍແຍກໃຫ້ເຮົາພໍຮູ້ວ່າເຮົາຮັກ ຫຼື ພຽງເເຕ່ຫຼົງໄຫຼ.
ທັງນີ້ທັງນັ້ນ “ຄວາມຫຼົງ” ກໍ່ບໍ່ແມ່ນເລື່ອງຜິດ ເເຕ່ມັນເປັນທຳມະຊາດຂອງມະນຸດ, ແຕ່ສິ່ງສຳຄັນຄືຢ່າໃຫ້ມັນປະສານກັບສຽງຂອງຫົວໃຈ ຈົນຫຼົງຄິດວ່າເປັນ “ຄວາມຮັກ” ທັງທີ່ຈິງມັນເປັນພຽງເເຕ່ “ຄວາມຕ້ອງການ”.
ສະຫຼຸບງ່າຍໆ:
– ຄວາມຫຼົງໄຫຼ = ແຮງດຶງດູດທາງເພດ, ຄວາມເລົ້າໂລມໃຈ ເເລະ ຈະຢູ່ພຽງຊົ່ວຄາວ
– ຄວາມຮັກ = ຄວາມຫ່ວງໃຍ, ຄວາມເຂົ້າໃຈ ເເລະ ຈະຢູ່ຍາວນານ.
ທີ່ມາ: postjung
