ວັນທີ 21 ຕຸລາ 2026, ໃນໂອກາດເດີນທາງຢ້ຽມຢາມ ແລະ ເຮັດວຽກຢູ່ ສາທາລະນະລັດ ສັງຄົມນິຍົມ ຫວຽດນາມ, ສະຫາຍ ທອງລີ ສີສຸລິດ, ກຳມະການສູນກາງພັກ, ເລຂາຄະນະບໍລິຫານງານ ສູນກາງຊາວໜຸ່ມປະຊາຊົນປະຕິວັດລາວ ພ້ອມດ້ວຍຄະນະຜູ້ແທນ ໄດ້ເຂົ້າຢ້ຽມຂໍ່ານັບ ສະຫາຍ ເຈີ່ນ ເກີ້ມ ຕູ໊, ກຳມະການກົມການເມືອງ, ຜູ້ປະຈຳການຄະນະເລຂາທິການສູນກາງພັກກອມມູນິດຫວຽດນາມ.
ໃນໂອກາດດັ່ງກ່າວ, ສະຫາຍ ທອງລີ ສີສຸລິດ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງຝ່າຍຫວຽດນາມ, ພ້ອມທັງຊົມເຊີຍຜົນສຳເລັດຂອງພັກ, ລັດ ແລະ ປະຊາຊົນຫວຽດນາມ ໃນການສ້າງສາ ແລະ ພັດທະນາປະເທດ. ພ້ອມນັ້ນ ໄດ້ຢືນຢັນວ່າ ການສຶກສາອົບຮົມຄົນຮຸ່ນໃໝ່ໃຫ້ສືບທອດມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ–ຫວຽດນາມ ແມ່ນໜ້າທີ່ສຳຄັນຂອງອົງການຊາວໜຸ່ມສອງປະເທດ.
ສະຫາຍ ທອງລີ ສີສຸລິດ ຍັງໄດ້ລາຍງານຜົນການພົບປະກັບສູນກາງຊາວໜຸ່ມກອມມູນິດໂຮ່ຈີມິນ, ພ້ອມທັງຂອບໃຈການສະໜັບສະໜູນຂອງຫວຽດນາມຕໍ່ວຽກງານຊາວໜຸ່ມລາວ, ໂດຍສະເພາະໂຄງການສູນຝຶກອົບຮົມຊາວໜຸ່ມ–ເຍົາວະຊົນ ລາວ–ຫວຽດນາມ. ພ້ອມກັນນັ້ນ ໄດ້ສະເໜີ 3 ທິດທາງຮ່ວມມືໃນຕໍ່ໜ້າ ຄື: ການຝຶກອົບຮົມຜູ້ນຳຊາວໜຸ່ມຮຸ່ນໃໝ່, ການພັດທະນາທັກສະອາຊີບ ແລະ ດິຈິຕອນ, ແລະ ການສົ່ງເສີມກິດຈະກຳຊາວໜຸ່ມຊາຍແດນ ແລະ ອາສາສະໝັກ.
ສະຫາຍ ເຈີ່ນ ເກີ້ມ ຕູ໊ ໄດ້ສະແດງຄວາມຍິນດີຕ້ອນຮັບຄະນະຜູ້ແທນ ແລະ ໃຫ້ທິດຊີ້ນຳ 4 ປະເດັນສຳຄັນ ຄື:
1. ຈັດຂະບວນການ ແລະ ກິດຈະກຳຊາວໜຸ່ມຮ່ວມກັນ ເພື່ອຂ່ຳນັບຮັບຕ້ອນປີ 2027, ຊຶ່ງເປັນປີຄົບຮອບ 65 ປີ ແຫ່ງການສ້າງຕັ້ງສາຍພົວພັນທາງການທູດ ແລະ 50 ປີ ແຫ່ງການລົງນາມສົນທິສັນຍາມິດຕະພາບ ແລະ ການຮ່ວມມື ລາວ–ຫວຽດນາມ.
2. ສືບຕໍ່ຮັດແໜ້ນຄວາມສາມັກຄີພິເສດ ແລະ ເພີ່ມທະວີການແລກປ່ຽນບົດຮຽນດ້ານການສຶກສາອົບຮົມອຸດົມການໃຫ້ແກ່ຄົນຮຸ່ນໜຸ່ມ.
3. ຍົກສູງຄຸນນະພາບການຮ່ວມມືດ້ານການພັດທະນາຊັບພະຍາກອນມະນຸດ ໃຫ້ສອດຄ່ອງກັບຄວາມຕ້ອງການໃນໄລຍະໃໝ່.
4. ສົ່ງເສີມການນຳໃຊ້ສູນຝຶກອົບຮົມຊາວໜຸ່ມ ລາວ–ຫວຽດນາມ ໃຫ້ເກີດປະໂຫຍດສູງສຸດ ແລະ ສ້າງຜົນສຳເລັດທີ່ເປັນຮູບປະທຳ.
ຕອນທ້າຍ, ສະຫາຍ ທອງລີ ສີສຸລິດ ໄດ້ສະແດງຄວາມຂອບໃຈຕໍ່ຄຳໂອ້ລົມ ແລະ ທິດຊີ້ນຳຂອງການນຳຂັ້ນສູງຫວຽດນາມ, ພ້ອມຢືນຢັນຈະນຳໄປຜັນຂະຫຍາຍເປັນແຜນງານ ແລະ ກິດຈະກຳຮ່ວມມືຕົວຈິງ ເພື່ອປະກອບສ່ວນເສີມສ້າງສາຍພົວພັນພິເສດ ລາວ–ຫວຽດນາມ ໃຫ້ນັບມື້ໝັ້ນຄົງ ແລະ ມີເນື້ອໃນເລິກເຊິ່ງຍິ່ງຂຶ້ນ.
