ອັດຕະປື: ພະແນກແຮງງານ ແລະ ສະຫວັດດີການສັງຄົມ (ຮສສ) ແຂວງອັດຕະປື ໄດ້ຈັດກອງປະຊຸມສະຫຼຸບຜົນການດຳເນີນງານຂອງຈຸດບໍລິການຈັດຫາງານພາຍໃນ ແລະ ການແກ້ໄຂບັນຫາຂາດແຄນແຮງງານ ໃນໄລຍະ 6 ເດືອນຕົ້ນປີ 2026 ພ້ອມວາງແຜນສືບຕໍ່ແກ້ໄຂບັນຫາແຮງງານໃນ 6 ເດືອນທ້າຍປີ.
ກອງປະຊຸມຈັດຂຶ້ນໃນວັນທີ 20 ສິງຫາ 2026 ທີ່ແຂວງອັດຕະປື ໂດຍມີ ທ່ານ ນາງ ພອນມະນີ ຂຽນໄຊຍະວົງ ກຳມະການພັກແຂວງ ແລະ ຫົວໜ້າພະແນກ ຮສສ ແຂວງ ພ້ອມດ້ວຍຫົວໜ້າຫ້ອງການ ຮສສ ຈາກ 5 ເມືອງ ແລະ ພາກສ່ວນກ່ຽວຂ້ອງເຂົ້າຮ່ວມ.
ອັດຕະປືມີປະຊາກອນ 169,008 ຄົນ
ຕາມບົດສະຫຼຸບ ອັດຕະປືມີປະຊາກອນລວມ 169,008 ຄົນ ໃນນັ້ນເປັນເພດຍິງ 83,058 ຄົນ. ປະຊາກອນຢູ່ໃນເກນອາຍຸແຮງງານ 15-60 ປີ ມີ 101,307 ຄົນ ໃນນັ້ນເປັນເພດຍິງ 49,753 ຄົນ.
ອັດຕາການມີສ່ວນຮ່ວມໃນກຳລັງແຮງງານຢູ່ທີ່ 46.81% ຫຼື ເທົ່າກັບ 47,420 ຄົນ, ໃນນັ້ນມີຜູ້ມີວຽກເຮັດງານທຳ 46,282 ຄົນ.
ແຮງງານສ່ວນໃຫຍ່ຢູ່ຂະແໜງກະສິກຳ
ແຮງງານຂອງແຂວງສ່ວນໃຫຍ່ປະກອບອາຊີບຢູ່ 3 ຂົງເຂດຫຼັກ ຄື:
ຂະແໜງກະສິກຳ: 26,315 ຄົນ ຫຼື 56.8%
ຂະແໜງອຸດສາຫະກຳ: 15,242 ຄົນ ຫຼື 32.9%
ຂະແໜງບໍລິການ: 4,725 ຄົນ ຫຼື 10.2%
ຂະນະທີ່ອັດຕາວ່າງງານຂອງແຮງງານຢູ່ທີ່ 2.4% ຫຼື ປະມານ 1,138 ຄົນ.
ທົ່ວແຂວງມີຫົວໜ່ວຍວິສາຫະກິດທັງໝົດ 2,368 ຫົວໜ່ວຍ, ໃນນັ້ນຂັ້ນແຂວງຄຸ້ມຄອງ 401 ຫົວໜ່ວຍ ແລະ ຂັ້ນເມືອງ 1,976 ຫົວໜ່ວຍ.
ເລັ່ງພັດທະນາຈຸດບໍລິການຈັດຫາງານ
ຈຸດບໍລິການຈັດຫາງານເປັນກົນໄກສຳຄັນຂອງຂະແໜງແຮງງານ ເພື່ອໃຫ້ບໍລິການແກ່ນາຍຈ້າງ, ຜູ້ໃຊ້ແຮງງານ ແລະ ຜູ້ຊອກວຽກ ໂດຍມີເປົ້າໝາຍຊ່ວຍໃຫ້ຜູ້ວ່າງງານສາມາດເຂົ້າເຖິງວຽກເຮັດງານທຳ ມີລາຍໄດ້ ແລະ ມີຊີວິດການເປັນຢູ່ດີຂຶ້ນ.
ນອກຈາກນີ້ ຍັງໄດ້ມີການເກັບກຳຂໍ້ມູນຜູ້ປະລະການຮຽນລະດັບມັດທະຍົມຕອນຕົ້ນ-ຕອນປາຍ ໃນທົ່ວແຂວງ ແຕ່ປີ 2022-2026 ພົບວ່າມີຈຳນວນ 5,237 ຄົນ, ໃນນັ້ນເປັນເພດຍິງ 2,634 ຄົນ.
ວາງແຜນ 6 ເດືອນທ້າຍປີ
ກອງປະຊຸມໄດ້ມີການແລກປ່ຽນຄຳເຫັນ ແລະ ສະເໜີບັນດາບັນຫາທີ່ຄວນປັບປຸງ ເພື່ອໃຫ້ບົດສະຫຼຸບມີຄວາມສົມບູນ ແລະ ສອດຄ່ອງກັບສະພາບຕົວຈິງ.
ພ້ອມກັນນີ້ ຍັງໄດ້ກຳນົດທິດທາງແຜນການໃນ 6 ເດືອນທ້າຍປີ 2026 ເພື່ອຂະຫຍາຍການເຂົ້າເຖິງແຮງງານ, ພັດທະນາການຈັດຫາງານ ແລະ ຮ່ວມກັນແກ້ໄຂບັນຫາຂາດແຄນແຮງງານໃນແຂວງອັດຕະປື.
ທີ່ມາ: ເສດຖະກິດ-ສັງຄົມ
