ສະຫະພັນກິລາຂີ່ມ້າແຫ່ງຊາດລາວ ກຳລັງກະກຽມຈັດການແຂ່ງຂັນ ກິລາຂີ່ມ້າຊິງແຊ້ມປະເທດລາວ ໃນວັນທີ 28-29 ພະຈິກ 2026 ທີ່ສວນອາຊາສະເຕໂບ້, ບ້ານເພຍລາດ, ເມືອງສັງທອງ, ນະຄອນຫຼວງວຽງຈັນ. ໂດຍເປີດໃຫ້ປະຊາຊົນ ເຂົ້າຊົມຟຣີ.
ທ່ານ ທະນະເທພ ວິບູລ ປະທານສະຫະພັນກິລາຂີ່ມ້າແຫ່ງຊາດລາວ ໄດ້ໃຫ້ສຳພາດໃນລາຍການ “ເລື່ອງຈິງຄົນແທ້ ເລົ່າຈາກເລື່ອງຈິງ” ໃນຫົວຂໍ້ “ກິລາຂີ່ມ້າ” ເຊິ່ງໄດ້ເລົ່າເຖິງພັດທະນາການ ແລະ ທິດທາງການຍົກລະດັບກິລາຂີ່ມ້າຂອງລາວໃຫ້ກ້າວສູ່ມາດຕະຖານສາກົນ.
ຈາກຄວາມມັກ ສູ່ການພັດທະນາກິລາຂີ່ມ້າ
ທ່ານ ທະນະເທພ ວິບູລ ໃຫ້ຮູ້ວ່າ ການກໍ່ຕັ້ງສະຫະພັນກິລາຂີ່ມ້າແຫ່ງຊາດລາວ ເກີດຈາກຄວາມມັກສ່ວນຕົວໃນກິລາຂີ່ມ້າ ຄຽງຄູ່ກັບຄວາມຕັ້ງໃຈຢາກເຫັນກິລາຂີ່ມ້າຂອງລາວພັດທະນາໃຫ້ມີຄວາມເປັນມືອາຊີບ ແລະ ສາມາດທຽບເທົ່າກັບລະດັບສາກົນ.
ດ້ານງົບດຳເນີນງານພາຍໃນສະຫະພັນ ລວມເຖິງການນຳເຂົ້າວັດຖຸອຸປະກອນ ແລະ ມ້າຈາກຕ່າງປະເທດ ໃນຂໍ້ມູນຕົ້ນສະບັບລະບຸວ່າ ໃຊ້ທຶນສ່ວນຕົວຂອງທ່ານ ທະນະເທພ ວິບູລ 100%.
ມີມ້າກິລາ 37 ໂຕ ເບິ່ງແຍງຕາມລະບົບ
ປັດຈຸບັນ ສະຫະພັນມີມ້າກິລາຢູ່ໃນການຄຸ້ມຄອງ 37 ໂຕ ໂດຍມີໂປຣແກຣມເບິ່ງແຍງຮັກສາຢ່າງຊັດເຈນ ເຊັ່ນ:
– ຕັດເລັບທຸກໆ 2 ເດືອນ
– ຖ່າຍພະຍາດທຸກໆ 4 ເດືອນ
– ເຮັດແຂ້ວທຸກໆ 6 ເດືອນ
ສະຫະພັນໄດ້ວາງມາດຕະການດ້ານສຸຂະພາບຢ່າງເປັນລະບົບ ໂດຍມີການສັກວັກຊີນຈາກປະເທດຕົ້ນທາງກ່ອນນຳເຂົ້າ, ເຂັ້ມງວດການຂໍໃບເຄື່ອນຍ້າຍ ແລະ ກວດເລືອດທຸກຄັ້ງ ເມື່ອນຳມ້າເຂົ້າຈາກຕ່າງປະເທດ ຫຼື ນຳໄປແຂ່ງຂັນຕາມສະໜາມຕ່າງໆ.
ປັດຈຸບັນ ສະຫະພັນກິລາຂີ່ມ້າແຫ່ງຊາດລາວ ກຳລັງຢູ່ໃນຂັ້ນຕອນ ຍື່ນເອກະສານເຂົ້າເປັນສະມາຊິກຂອງສະຫະພັນກິລາຂີ່ມ້າສາກົນ (FEI) ເພື່ອປູທາງໃຫ້ນັກກິລາຂີ່ມ້າທີມຊາດລາວ ສາມາດກ້າວໄປແຂ່ງຂັນໃນເວທີພາກພື້ນ ແລະ ລະດັບສາກົນ.
ສະຫະພັນມີຄະນະບໍລິຫານງານຫຼາຍກວ່າ 10 ທ່ານ ປະກອບມີຜູ້ຊົງຄຸນນະວຸດ, ຜູ້ຊ່ຽວຊານ, ວິຊາການ ແລະ ສັດຕະວະແພດສາກົນ. ນອກນີ້ ຍັງໄດ້ເຊີນສັດຕະວະແພດຈາກປະເທດອິຕາລີ ຜູ້ຊ່ຽວຊານດ້ານມ້າ ມາເປັນທີ່ປຶກສາ.
ພ້ອມກັນນັ້ນ ຍັງມີແຜນພັດທະນາບຸກຄະລາກອນ ໃຫ້ກາຍເປັນນັກກິລາຂີ່ມ້າທີມຊາດ, ຄູຝຶກ ແລະ ກຳມະການ ໂດຍສົ່ງໄປຝຶກອົບຮົມ ແລະ ແລກປ່ຽນປະສົບການກັບສະຫະພັນກິລາຂີ່ມ້າຂອງຕ່າງປະເທດ.
ຊິງແຊ້ມປະເທດລາວ 2026
ກິລາຂີ່ມ້າເປັນກິລາທີ່ຕ້ອງອາໄສທັງຄົນ ແລະ ມ້າ ເປັນຄູ່ຮ່ວມກັນ ຈຶ່ງຕ້ອງອາໄສຄວາມຄຸ້ນເຄີຍ, ການຝຶກຝົນ, ຄວາມອົດທົນ ແລະ ລະບຽບວິໄນສູງ.
ດັ່ງນັ້ນ ການແຂ່ງຂັນ ກິລາຂີ່ມ້າຊິງແຊ້ມປະເທດລາວ 2026 ຈຶ່ງຖືເປັນອີກກ້າວສຳຄັນໃນການສົ່ງເສີມ ແລະ ຍົກລະດັບກິລາຂີ່ມ້າຂອງລາວ.
ສະຖານທີ່: ສວນອາຊາສະເຕໂບ້, ບ້ານເພຍລາດ, ເມືອງສັງທອງ, ນະຄອນຫຼວງວຽງຈັນ
ວັນທີ: 28-29 ພະຈິກ 2026
ເຂົ້າຊົມຟຣີ
ທີ່ມາ: Sports update
